Heç vaxt çatlamayan, pambıq kimi şokoladlı rulet resepti

Yumşaq pambıq kimi biskviti, ağızda əriyən kremi və zəngin şokolad dadı ilə hər kəsin bəyənəcəyi şirniyyat hazırlamaq istəyirsinizsə, bu resept məhz sizin üçündür. Çox vaxt rulet hazırlayarkən biskvitin qırılmasından və ya çatlamasından şikayət olunur. Lakin bu tam ölçülü reseptlə mükəmməl nəticə əldə edəcəksiniz!

Pravda.az evdə asanlıqla hazırlaya biləcəyiniz şokoladlı ruletin hazırlanma qaydasını təqdim edir:

Biskvit üçün:

4 ədəd yumurta (otaq temperaturunda)

1 çay stəkanı şəkər tozu

1 xörək qaşığı ilıq su

1 paket vanil

1 paket qabartma tozu

1 çay stəkanı un

3 xörək qaşığı kakao

Bir çimdik duz

Kremi üçün:

2.5 stəkan süd

1 çay stəkanı şəkər tozu

1 xörək qaşığı un

2 xörək qaşığı nişasta (qarğıdalı və ya buğda)

1 xörək qaşığı kərə yağı

1 paket vanil

80 qram tünd və ya südlü şokolad

Üzəri üçün:

100 ml maye qaymaq (35%-li)

100 qram şokolad

Daxili kremin hazırlanması:

Əvvəlcə ruletin daxili kremini hazırlayın ki, biskvit hazır olana qədər soyusun. Qazana süd, şəkər tozu, un və nişastanı əlavə edib yaxşıca qarışdırın. Ocağın üzərinə qoyub, qatılaşana qədər davamlı qarışdıraraq bişirin. Krem qaynayıb qatılaşdıqdan sonra ocaqdan götürün. İsti kremin içinə kərə yağı, vanil və xırdalanmış şokoladı əlavə edib, şokoladlar tam əriyənə qədər qarışdırın.

Biskvitin hazırlanması:

Yumurtaların ağını və sarısını diqqətlə fərqli qablara ayırın. Yumurta ağlarının üzərinə bir çimdik duz əlavə edib, mikserlə tam ağarıb qatı köpük olana qədər yaxşıca çalın. Başqa bir qabda isə yumurta sarılarını, şəkər tozunu və 1 xörək qaşığı ilıq suyu şəkər əriyib rəngi açılana qədər mikserlə çalın.

Quru komponentlərin əlavə edilməsi:

Yumurta sarılarının olduğu qaba un, kakao, qabartma tozu və vanili ələyərək əlavə edin və mikserin aşağı sürəti ilə qarışdırın. Daha sonra çaldığınız yumurta ağlarını bu qarışığa 3 dəfəyə, sönməməsi üçün aşağıdan yuxarıya doğru bir spatula köməyi ilə yavaş-yavaş qarışdıraraq yedirin.

Bişirilməsi:

Soba sinisinin içinə yağlı kağız sərin. Hazırladığınız biskvit xəmirini sininin hər tərəfinə bərabər şəkildə yayın. Əvvəlcədən 170 dərəəcə qızdırılmış sobada təxminən 10-12 dəqiqə nəzarətli şəkildə bişirin. Biskviti çox qurutmayın, yoxsa bükərkən çatlayar.

Rulet formasının verilməsi:

Biskviti sobadan çıxaran kimi, hələ isti ikən yağlı kağızla birlikdə geniş tərəfindən başlayaraq rulet formasında bükün və üzərinə nəm bir dəsmal qoyaraq 5 dəqiqə gözlədin. Bu üsul biskvitin nəmini qoruyacaq və çatlamasının qarşısını alacaq.

Birləşdirmə mərhələsi:

İlıq biskviti yavaşca açın. Hazırlayıb soyutduğunuz daxili kremi biskvitin hər tərəfinə bərabər formada yayın. İstəsəniz bu mərhələdə içinə banan dilimləri və ya şokolad damlaları da səpə bilərsiniz. Yağlı kağızı ayıraraq biskviti yenidən diqqətlə rulet formasında bükün.

Üzərinin bəzədilməsi:

Üzəri üçün qaymağı kiçik bir qazanda qaynama dərəcəsinə çatdırın, amma qaynatmayın və ocaqdan götürüb içinə şokoladları ataraq əridin. İstəyə görə karamelli və ya hazır şokoladlı sous da istifadə edə bilərsiniz. Hazırladığınız bu qlazuru ruletin üzərinə tökərək yayın.

Şirniyyat soyuducuda ən azı 2-3 saat dincəldikdən sonra dilimləyərək servis edilə bilər.

Əminə Bayramova

Tarix: 16 İyun 2026, 10:21

Xəbər lenti