Dəbdə rahatlıq axtaranlar üçün: Ən rahat 5 şalvar modeli

Dəb dünyasında trendlər sürətlə dəyişsə də, populyarlığını heç vaxt itirməyən və hər zaman ön planda olan tək bir şey var: Rahatlıq. Gün boyu qaçhaqaçda, ofisdə, gəzintidə və ya səyahətdə bədənimizi sıxmayan, hərəkət azadlığı verən şalvarlar qarderobumuzun xilaskarına çevrilir.

Pravda.az həm şıq görünmək, həm də konfortundan güzəştə getmək istəməyənlər üçün mövsümün ən rahat 5 şalvar modelini və onların kombinlənmə qaydalarını təqdim edirik:

"Jogger" şalvarlar

Bel hissəsinin elastik (rezinli) olması və topuqda yığılan rezinli paçaları sayəsində "jogger" şalvarlar həm idman, həm də rahat bir tərz təqdim edir. Əksərən pambıq, viskon və ya elastik parçalardan hazırlanan bu modellər hərəkət azadlığı verir və günün hər anına uyğunlaşır.

Necə kombinləməli?

Gündəlik üslub: Sadə bir futbolka, krossovka (sneaker) və bel çantası ilə həm rahat, həm də müasir görünə bilərsiniz.

İdman-şıq görünüş: Böyük bədən (oversize) köynək və lofer (loafer) ayaqqabılarla "jogger"ı daha dəbli formaya sala bilərsiniz.

Sərin havalarda: Kapüşonlu svitşört (sweatshirt) və şişmə gödəkçə ilə kombinləyərək rahatlığınızı qoruya bilərsiniz.

Kətan şalvarlar

Xüsusilə yay və yaz aylarının əvəzedilməzi olan kətan şalvarlar, nəfəs alan toxuması sayəsində istidə sərinlik bəxş edir. Təbii və zərif görünüşü ilə həm dəniz kənarında, həm də şəhər gəzintilərində rahatlıqla istifadə oluna bilər.

Necə kombinləməli?

Rahat yay stili: Ağ köynək, futbolka, sandalet və həsir çanta ilə yay aylarının ab-havasına uyğun şəhər kombinləri edə bilərsiniz.

Ofis uyğunluğu: İncə parçadan olan köynək və blazer pencəklə həm rəsmi, həm də rahat bir görünüş əldə etmək mümkündür.

Tətildə: Çimərlik geyimlərinin üzərindən və ya kətan köynəklə sahil üçün mükəmməldir.

Geniş balaq (Palazzo) şalvarlar

Beldən oturan və aşağıya doğru genişlənən kəsimi ilə həm bədən xətlərini incə göstərir, həm də inanılmaz dərəcədə rahat bir hərəkət sahəsi yaradır. İpək, viskon və ya yüngül trikotaj parçalardan hazırlanan "palazzo" şalvarlar qarderobun ən funksional parçalarındandır.

Necə kombinləməli?

Gündəlik rahatlıq: Sadə futbolka, idman ayaqqabısı və kiçik çiyin çantası ilə gündəlik kombinlər üçün idealdır.

Trend görünüş: Qısa üst geyimləri (crop top), blazer pencək və dikdaban sandaletlərlə müasir və şıq bir stil tuta bilərsiniz.

Qış stili: Qalın toxunma sviterlər və çəkmələrlə həm isti, həm də tərz bir görünüş yarada bilərsiniz.

Boş kəsimli cinslər (Boyfriend & Mom Jeans)

Dar cinslərin dövrü geridə qalır. Bel hissəsi rahat oturan, lakin omba və ayaq hissəsi boş qalan "mom" və "boyfriend" cins şalvarlar denim modasında rahatlığın simvoludur.

Necə kombinləməli?

Küçə modası: Böyük bədən svitşört, papaq və krossovka ilə gənc və enerjili bir görünüş əldə edə bilərsiniz.

Fərqli bir toxunuş: Qısa top və yüngül makiyajla idman tərzinə qadınsı bir hava qata bilərsiniz.

Təbəqəli stil: Dəri gödəkçə və ya uzun trençkotla kombinləyərək şalvara daha eleqant bir görünüş vermək mümkündür.

Trikotaj şalvarlar

Xüsusilə evdən işləyənlərin, səyahət edənlərin və ya həftəsonu dincəlmək istəyənlərin bir nömrəli seçimi trikotaj şalvarlardır. Yumşaq toxunuşu və elastikliyi sayəsində bədəni heç sıxmır və ev konfortunu küçəyə daşıyır.

Necə kombinləməli?

Eyni rəngdə trikotaj sviterlə dəst (monoxrom) şəklində geyindikdə olduqca bahalı və dəbli görünür. Üzərindən uzun yun palto və altından qalın dabanlı idman ayaqqabıları ilə kombini tamamlaya bilərsiniz.

Əminə Bayramova

Tarix: 19 İyun 2026, 15:04

Xəbər lenti