Uşağınız tualet təliminə hazırdırmı? - Bu əlamətlərə DİQQƏT

Uşağa tualet vərdişi qazandırmaq həm valideynlər, həm də uşaqlar üçün böyük və həyəcanlı addımdır.

Pravda.az bildirir ki, bu prosesin uğurlu olması üçün tələsməmək, doğru zamanı gözləmək və səbirli olmaq lazımdır.

Doğru zaman nə vaxtdır?

Hər uşağın inkişaf sürəti fərqlidir, ona görə də tualet təliminə başlamaq üçün dəqiq bir yaş həddi yoxdur. Lakin uşaqlar adətən 18-36 ay (1.5 - 3 yaş) arasında həm fiziki, həm də psixoloji olaraq buna hazır olurlar.

Uşağınızın hazır olduğunu göstərən əlamətlər:

Gündüzlər bezinin ən azı 2 saat boyunca quru qalması.

Günorta yuxusundan quru oyanması.

Tualet ehtiyacını hərəkətləri ilə (küncə sıxılmaq, çömbəlmək) və ya sözlərlə bəlli etməsi.

Çirklənmiş bezi ilə gəzməkdən narahat olması və onu çıxarmaq istəməsi.

Sadə təlimatları məsələn, "bura gəl", "şalvarını aşağı çək" başa düşməsi və yerinə yetirməsi.

Sərbəst şəkildə yeriyə və otura bilməsi.

Hazırlıq mərhələsi

Təlimə başlamazdan əvvəl uşağı bu prosesə alışdırmaq lazımdır:

Qarşıdurma yaratmayın: Uşağınızla birlikdə gedib onun bəyəndiyi bir qorşok (oturaq) və ya unitaz adaptoru (uşaq oturacağı) seçin.

Tanışlıq: Qorşoku uşağın otağına və ya vanna otağına qoyun. Qoyun onunla tanış olsun, paltarlı halda üzərində otursun.

Nümunə göstərin: Uşaqlar təqlid edərək öyrənirlər. Eyni cinsdən olan valideynin (məsələn, qız uşağı üçün ananın, oğlan üçün atanın) tualetdən necə istifadə etdiyini görməsi faydalıdır.

Təlim prosesi

Bezi çıxarın: Təlimə başladığınız gün bez vurmağı tamamilə dayandırın. Həm bezi vurub, həm də "tualetə get" demək uşağın beynini qarışdıracaq. Yalnız gecə yuxusu üçün ilkin mərhələdə ehtiyat tədbiri görülə bilər, amma gündüzlər tamamilə bezsiz olmalıdır.

Tez-tez xatırladın: Uşaqdan "tualetin var?" deyə soruşmaq yerinə, müəyyən fasilələrlə, məsələn, hər 1.5-2 saatdan bir, yeməkdən sonra və ya yuxudan duranda onu tualetə aparın.

Rahat paltarlar seçin: Uşağın özünün də rahatlıqla çıxara biləcəyi, düyməsiz və ipli olmayan, elastik (rezinli) şalvarlar geyindirilməlidir.

Rutin yaradın: Tualetə getməyi əyləncəli bir fəaliyyətə çevirin. Orada keçirdiyi vaxtı sıxıcı etməmək üçün kitab oxuya bilərsiniz.

Bunlara diqqət:

Qəzalar qaçılmazdır: Uşağınız altını isladanda əsla qəzəblənməyin, onu cəzalandırmayın və ya utandırmayın. "Eybi yoxdur, gələn dəfə vaxtında çatdırarıq" deyərək ona dəstək olun. Təzyiq göstərmək prosesi daha da uzada və uşaqda qəbizliyə yol aça bilər.

Mükafatlandırın: Hər uğurlu cəhddən sonra onu tərifləyin. Məsələn,n"Afərin sənə, artıq böyümüsən!". Kiçik stikerlər və ya uğur cədvəlləri də uşağı həvəsləndirə bilər.

Doğru zamanı seçin: Ev köçürmə, yeni bacı-qardaşın doğulması, bağçaya başlama və ya boşanma kimi uşağın həyatında stres yaradan dövrlərdə tualet təliminə başlamayın.

Səbirli olun: Bu proses bir neçə gündən bir neçə həftəyə qədər çəkə bilər. Gecə tualet vərdişinin tam qazanılması isə bir neçə ay davam edə bilər.

Qeyd: Tualet təlimi bir yarış deyil. Uşağınızın fiziki və psixoloji hazırlığına hörmətlə, sevgi və səbirlə yanaşmaq bu prosesin ən böyük açarıdır.

Əminə Bayramova

Tarix: 23 İyun 2026, 16:04

Xəbər lenti