Tanışına balta və dəryazla xəsarət yetirən 10 uşaq atasına hökm oxundu

Bakı Ağır Cinayətlər Məhkəməsində qəsdən sağlamlığa az ağır zərər vurmada təqsirləndirilən Möhtəmən Səmədovun (soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Eldar İsmayılovun sədrliyi ilə keçirilən prosesdə hökm oxunub.

Məhkəmənin hökmü ilə ona şərti cəza verilib.

İttihama görə, hadisə 2025-ci ildə təxminən saat 22 radələrində fəhlə kimi işlədiyi Bakı şəhəri, Xəzər rayonu, Türkan qəsəbəsi, Üzümçülük sovxozunda yerləşən nömrəsiz fərdi evin həyətində olarkən baş verib.

Belə ki, Möhtəmən Səmədovun tanışı, zərərçəkmiş Elçini Qurbanov alkoqol sərxoşluğu vəziyyətində onun icazəsi olmadan həyətə daxil olub. Zərərçəkmiş şəxs həmin vaxt təqsirləndirilən şəxsin ünvanına nalayiq ifadələr işlədib, sonra isə onun üzərinə hücum çəkməyə çalışıb.

Bu səbəbdən tərəflər arasında mübahisə yaranıb. Mübahisə zamanı Möhtəmən əvvəlcə əlində olan baltanın arxa, küt hissəsi ilə Elçinin baş nahiyəsinin arxa hissəsinə bir dəfə zərbə endirib. Bundan sonra o, həyətdə olan dəryazı götürərək onun küt tərəfi ilə zərərçəkmiş şəxsin sol qabırğa nahiyəsinə qəsdən zərbə vurub.

Nəticədə Elçini Qurbanova sol tərəfli hemopnevmotoraksla müşayiət olunan, sol VII, VIII və IX qabırğaların qəlpəli və yerdəyişən sınıqları kimi qiymətləndirilən ağır xəsarətlər yetirilib. Məhkəmə-tibbi ekspertizasının rəyinə əsasən, həmin xəsarətlər ümumilikdə insan həyatı üçün təhlükəli olan sağlamlığa ağır zərərvurmaya aid edilib.

Məhkəmə iclasında Möhtəmən Səmədov elan olunmuş ittiham üzrə özünü təqsirli bilib.

O, ifadəsində göstərib ki, zərərçəkmiş Elçin Qurbanovu 3-4 il əvvəl tanıyıb və onun dəmir yığmaqla məşğul olduğunu bilib. Aralarında əvvəllər hər hansı münaqişə olmayıb və münasibətləri normal olub.

Təqsirləndirilən şəxsin sözlərinə görə, hadisə baş verən gün Türkan qəsəbəsində Siyavuş adlı şəxsə məxsus evdə usta kimi işləyib. Axşam saatlarında işini bitirərkən Elçin sərxoş vəziyyətdə və yanında tanımadığı bir şəxslə birlikdə həyətə daxil olub. Zərərçəkmiş şəxsə həyətə daxil olmamasını və nə sözü varsa, çöldə danışmasını deyib. Lakin sərxoş vəziyyətdə olan Elçin buna əsəbiləşərək onun üzərinə hücum etmək istəyib.

Möhtəmən Səmədov qeyd edib ki, əvvəlcə onu əli ilə itələyib və zərərçəkmiş şəxs yerə yıxılıb. Sonradan yenidən ayağa qalxaraq onun üstünə gəldiyi üçün həyətdə olan dəryazı götürərək kəsici olmayan küt tərəfi ilə onun sol bel nahiyəsinə bir dəfə zərbə vurub. Bundan sonra Elçin hadisə yerini tərk edərək avtomobilinə minib gedib.

Təqsirləndirilən şəxs məhkəmədə həm özünün, həm də qohumlarının hadisədən sonra zərərçəkmiş şəxslə maraqlandıqlarını, onun müalicəsinə maddi yardım göstərdiklərini söyləyib

Möhtəmən Səmədov hazırda Elçin Qurbanovla barışdıqlarını, sonuncunun ona qarşı heç bir şikayət və tələbinin olmadığını da qeyd edib.

Təqsirləndirilən şəxs həmçinin ailə vəziyyəti barədə məlumat verərək rəsmi nikahda olduğu həyat yoldaşı ilə yanaşı, digər bir qadınla da qeyri-rəsmi nikah münasibətlərində yaşadığını, ümumilikdə 10 övladının olduğunu, həmin uşaqlardan birinin azyaşlı olduğunu bildirib.

Sonda o, zərərçəkmiş şəxsə qarşı törətdiyi əmələ görə peşman olduğunu və baş verən hadisədən dərin təəssüf hissi keçirdiyini məhkəmənin diqqətinə çatdırıb.

Kamal Məmmədov

Tarix: 24 İyun 2026, 09:26

Xəbər lenti