Müşfiq Cəfərov: “Azərbaycan və Türkmənistan arasında genişmiqyaslı əməkdaşlıqlar planlaşdırılır”

“Türkmənistan Prezidenti Sərdar Berdiməhəmmədovun ölkəmizə rəsmi səfəri çərçivəsində 20-yə yaxın sənəd imzalanıb. Enerji, kənd təsərrüfatı, elm-təhsil, turizm, mədəniyyət, idman və digər sahələrdə əməkdaşlığa dair ətraflı fikir mübadiləsi aparılıb. Türkmənistanın dövlət başçısının Azərbaycan Respublikasının Prezidenti İlham Əliyevlə təkbətək görüşləri olub. Nümayəndə heyətlərinin iştirakı ilə geniş tərkibdə görüş keçirilib. Bir sözlə, bu səfər Azərbaycan-Türkmənistan strateji əməkdaşlığını bir daha təsdiqləyərək onun inkişafına yeni təkan verdi. Hər iki prezident sənədlərin imzalanmasından sonra bəyanatla çıxış ediblər. Azərbaycan və Türkmənistan beynəlxalq təşkilatlar çərçivəsində, xüsusilə Birləşmiş Millətlər Təşkilatı, Qoşulmama Hərəkatı, İslam Əməkdaşlıq Təşkilatı kimi nüfuzlu təsisatlarla sıx əməkdaşlıq edirlər. Müasir beynəlxalq münasibətlər sistemində Azərbaycanın Mərkəzi Asiya regionu, xüsusən də geostrateji tərəfdaşı olan Türkmənistanla qurduğu çoxşaxəli əlaqələr xüsusi əhəmiyyət kəsb edir. Bu gün rəsmi Bakı və Aşqabad arasında mövcud olan qardaşlıq bağları həm güclü liderlərin siyasi iradəsi, həm də Trans-Xəzər nəqliyyat və enerji layihələrinin iqtisadi səmərəliliyindən irəli gəlir”.

Bu sözləri Pravda.az-a açıqlamasında Milli Məclisin Azərbaycan-Türkmənistan parlamentlərarası əlaqələr üzrə işçi qrupunun üzvü Müşfiq Cəfərov deyib.

Deputat qeyd edib ki, iki ölkə daim bir-birinin təşəbbüslərini dəstəkləyir: “Azərbaycanla Türkmənistanın bir-birinə dəstəyi özünü həm ikitərəfli, həm də çoxtərəfli formatda göstərir. Azərbaycan və Türkmənistan prezidentlərinin qarşılıqlı səfərləri həyata keçirilir. Keçən il dövlət başçıları həm Bakıda, həm də Aşqabadda görüşmüşdülər. Azərbaycan və Türkmənistan prezidentlərinin Bakıdakı yüksək səviyyəli görüşlərində enerji, nəqliyyat, tranzit və Xəzər dənizində əməkdaşlığın strateji səviyyəyə qaldırılması müzakirə olunub. Tərəflər iqtisadiyyat, gömrük və energetika sahələrini əhat edən 12 mühüm sənəd, o cümlədən yeni enerji sazişi və sənaye əməkdaşlığı proqramı imzalayıblar. Azərbaycan və Türkmənistan arasında enerji, nəqliyyat-logistika və birgə iqtisadi layihələrin inkişafını hədəfləyən genişmiqyaslı əməkdaşlıqlar planlaşdırılır. Tərəflər Xəzər dənizindəki "Dostluq" yatağının birgə işlənilməsi, Transxəzər marşrutları üzrə tranzit imkanlarının artırılması və enerji resurslarının diversifikasiyası istiqamətində danışıqları intensivləşdiriblər”.

Şəhanə Qədirli

Tarix: 24 İyun 2026, 10:28

Xəbər lenti