“Azərbaycan sədrliyi üzərinə götürməklə İslam həmrəyliyinin möhkəmləndirilməsinə təkan vermək niyyətini ortaya qoyur” - RƏY

“Azərbaycan Respublikasının paytaxtında İslam Əməkdaşlıq Təşkilatına üzv dövlətlərin Parlament İttifaqının 20-ci sessiyası keçirilir. Bu hadisə onu göstərir ki, Azərbaycan ilə İƏT arasında münasibətlər müsbət inkişaf tempinə malikdir və Azərbaycanın həm təşkilat çərçivəsində həm də ikitərəfli formatda üzv dövlətlərlə münasibətləri sürətlə inkişaf etməkdədir, qarşılıqlı faydalı əməkdaşlıq münasibətləridir. Fundamental məsələlərdə bizim mövqeyimiz üst-üstə düşür. İƏT dəfələrlə Ermənistanın Azərbaycana qarşı təcavüzkar siyasətini tənqid edən sənədlər qəbul edib, Azərbaycanın haqq işini müdafiə edib”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

Elman Nəsirov: “Azərbaycanda xalq-hakimiyyət birliyi olduğuna görə Nepal və digər ölkələrdəki proseslər burada baş vermir” Pravda.az

Deputat qeyd edib ki, işğaldan sonrakı dövrdə də Azərbaycanla Təşkilat arasında əlaqələr sürətlə inkişaf edir: “Azərbaycan Prezidenti cənab İlham Əliyevin də qeyd etdiyi kimi, gələn il Azərbaycan İƏT-ə sədrlik edəcək. Bu gün dünyada çox ciddi islamafobiya meylləri mövcuddur. Azərbaycan da hər zaman bu meyillərə qarşı öz haqq səsini ucaldıb və Azərbaycan öz əməli addımları ilə bunu təsdiqləyib. Nəzərə alsaq ki, 2017-ci ildə cənab Prezident İlham Əliyevin sərəncamı ilə ölkəmizdə “İslam Həmrəyliyi İli” elan edildi, eyni zamanda həmin il Azərbaycan sayca dördüncü İslam Həmrəyliyi Oyunlarına ev sahibliyi etdi və bu addımlar, sonuncu hadisənin özü də əslində idman hadisəsi idi, amma böyük siyasi rəmzi mənası da vardı. Cənab Prezident hələ o zaman söyləyirdi ki, bu günləri Azərbaycan paytaxtında İslam ölkələri idmançıları bir-birinin əlini sıxır, bir-birlərinə dost kimi baxırlar, ancaq təəssüf ki, bəzi müsəlman ölkələrinin liderləri bir-birinin əlini sıxa bilmir və Azərbaycan bu oyunları keçirtməklə və “İslam Həmrəylik İli”ni elan etməklə müsəlman dünyasını birliyə çağırdı”.

Deputatın sözlərinə görə, Ermənistanın işğalı dövründə Azərbaycana qarşı edilənlər, İslam dini və mədəni irsinin ciddi dağıntılara məruz qalması bütün müsəlman dünyasına qarşı nifrətin ifadəsi idi: “Cənab Prezident söyləyəndə ki, ermənilər bizim 67 məscidimizin 65-ni məhv ediblər, iki məsciddə isə onlar yarı sökülmüş, yarı dağıdılmış vəziyyətdə donuzları və inəkləri saxlayıblar, tövlə kimi istifadə ediblər. Bu, təkcə Azərbaycana qarşı həqarətli davranış deyil, bütün müsəlman dünyasına qarşı nifrətin ifadəsidir. Müsəlman dünyasını da bu nöqteyi-nəzərdən birliyə çağırmışdı və xüsusilə də, bəzi müsəlman ölkələrinin işğalçı Ermənistanla sıx təmaslarda olmalarını tənqid etmişdi. Bu günlər müsəlman dünyasını həmişəkindən daha çox birliyə ehtiyacı var. Azərbaycan 2027-ci ildə İƏT-ə sədrliyi üzərinə götürməklə İslam həmrəyliyinin möhkəmləndirilməsinə və üzv dövlətlər arasında əməkdaşlığın daha da genişləndirilməsinə təkan vermək niyyətini ortaya qoyur. Bu bizim dövlətimizin siyasətinin fəlsəfəsini təşkil edir, həm də ictimai sifarişdir”.

Şəhanə Qədirli

Tarix: 25 İyun 2026, 16:43

Xəbər lenti