Ailəsinin yanında söyüş söyən şəxsi döyənlə bağlı QƏRAR

Şirvan Apellyasiya Məhkəməsində xuliqanlıq niyyətilə qəsdən sağlamlığa az ağır zərər vurmada təqsirləndirilən Zamiq Babayevin (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Əli Əliyevin sədrliyi ilə keçirilən prosesdə qərar elan olunub.

Qərara əsasən, apellyasiya şikayəti və apellyasiya protesti təmin edilməyib.

İttihama görə, hadisə 2024-cü ilin iyul ayında Astara şəhərinin Z.Bünyadov küçəsində yerləşən “Marciel” hotelin qarşısında baş verib.

Cinayət işi materiallarına əsasən, həmin vaxt zərərçəkmiş Babək Kərəmov (adı, soyadı şərtidir) yolu keçmək istəyərkən əlindəki mobil telefon yerə düşüb. Bu zaman Zamiq Babayevin ailə üzvlərinin yanında ünvansız nalayiq ifadələr işlətməsi təqsirləndirilən şəxsin narazılığına səbəb olub. Zamiq Babayev zərərçəkmişə bu davranışı ilə bağlı irad bildirib.

Tərəflər arasında yaranan qısa mübahisə zamanı Babək Kərəmovun yumruq atmasını bəhanə edən təqsirləndirilən şəxs heç bir əsaslı səbəb olmadan üstünlüyünü nümayiş etdirmək və xuliqanlıq niyyəti ilə zərərçəkmişə hücum edib. O, zərərçəkmiş şəxsin sağ göz nahiyəsinə bir dəfə yumruq zərbəsi endirib.

Nəticədə Vüqar Babayevə sağ gözdə torlu qişanın regmatogen, yəni hissəvi cırılma tipli qopması ilə müşayiət olunan, həmin gözdə görmənin zəifləməsi ilə nəticələnən sağ alt göz qapağı və gözaltı nahiyənin əzilmiş-cırılmış yaraları şəklində bədən xəsarətləri yetirilib.

Məhkəmə-tibbi ekspertizasının rəyinə əsasən, həmin xəsarətlər zərərçəkmişin həyatı üçün təhlükəli olmasa da, sağlamlığın uzun müddət pozulmasına səbəb olub və qəsdən sağlamlığa az ağır zərər vurma kimi qiymətləndirilib.

Astara Rayon Məhkəməsinin hökmü ilə təqsirləndirilən şəxs Cinayət Məcəlləsinin 127.2.3-cü maddəsi ilə təqsirli bilərək ona 3 il müddətinə azadlığın məhdudlaşdırılması cəzası təyin edib.

Lakin çıxarılan hökmdən tərəflər narazı qalıb.

Məhkum edilmiş şəxsin müdafiəçisi tərəfindən verilən apellyasiya şikayətində göstərilib ki, birinci instansiya məhkəməsi əməlin hüquqi tövsifini düzgün müəyyən etməyib. Müdafiə tərəfi Vüqar Babayeı elan olunmuş ittihamın dəyişdirilərək əməlin Cinayət Məcəlləsinin 127.1-ci maddəsinə tövsif edilməsini, barəsində amnistiya aktının tətbiq olunmasını və onun cinayət məsuliyyətindən azad edilməsini xahiş edib.

Zərərçəkmiş şəxs və onun nümayəndəsi də hökmdən apellyasiya şikayəti verərək cəzanın yüngül olduğunu bildiriblər. Şikayətdə birinci instansiya məhkəməsinin hökmünün cəzanın təyin edilməsi və mülki iddianın qismən təmin olunması hissəsində ləğv edilməsi, təqsirləndirilən şəxsə Cinayət Məcəlləsinin 127.2.3-cü maddəsi ilə 4 il müddətinə azadlıqdan məhrumetmə cəzasının təyin olunması və mülki iddianın tam həcmdə təmin edilməsi xahiş olunub.

Bundan başqa, dövlət ittihamçısı da hökmdən apellyasiya protesti verərək Vüqar Babayevə təyin olunmuş azadlığın məhdudlaşdırılması cəzasının yüngül olduğunu göstərib. Protestdə Cinayət Məcəlləsinin 127.2.3-cü maddəsinin sanksiyasında nəzərdə tutulmuş azadlıqdan məhrum etmə cəzasının təyin edilməsi üçün hökmün dəyişdirilməsi tələb olunub.

Kamal Məmmədov

Tarix: 29 İyun 2026, 08:30

Xəbər lenti