Maska effekti yaratmadan makiyaj etməyin sirrləri

Makiyaj etməyə yeni başlayırsınızsa, çoxlu məhsullar arasında azıb qalmaq tamamilə normaldır. Kosmetika mağazalarındakı rəngbərəng rəflər göz qamaşdırsa da, düzgün seçimlər həm büdcənizi qoruyar, həm də süni görünüşdən uzaq, təbii gözəllik bəxş edər.

Bəs yeni başlayanlar üçün ən fundamental makiyaj qaydaları nələrdir?

Pravda.az göz qamaşdıran və qüsursuz görünüş üçün etməli olduqlarınızı təqdim edir:

Hər şeydən əvvəl: Dəri təmizliyi və nəmləndirmə

Uğurlu makiyajın sirri təmiz və nəm balansı qorunmuş dəridir. Kirli və ya quru dəriyə çəkilən tonal krem qabıq verir və süni görünür. Makiyaja başlamazdan əvvəl dərini mütləq tipinizə uyğun bir gellə yuyun və yaxşıca nəmləndirin. Dərinizin nəmləndiricini sorması üçün 5 dəqiqə gözləyin.

Tonal krem yerinə BB və ya CC kremlər

Yeni başlayanlar üçün ağır tərkibli, yüksək örtücülüyü olan tonal kremlər həm dərini yorur, həm də tətbiqi çətin olduğu üçün maska effekti yaradır. İlk mərhələdə dəri tonunu bərabərləşdirən, eyni zamanda dərini qidalandıran BB və ya CC kremlərə üstünlük verin. Bu məhsulları barmaq uclarınızla və ya nəm bir makiyaj süngəri ilə asanlıqla yaya bilərsiniz.

Gözaltı üçün korrektor

Yorğun görünüşü yox etməyin ən praktik yolu korrektordur. Göz altlarınıza daxili küncdən xaricə doğru kiçik nöqtələr qoyaraq vurun və barmağınızın istisi ilə yavaşca hərəkətlərlə yayın. Korrektorun rəngini dərinizdən maksimum 1 ton açıq seçməyə diqqət edin.

Təbii və canlı yanaqlar: Ənlik seçimi

Dərinizə canlandırmaq və sağlam bir parıltı vermək üçün ənlik şərtdir. Yeni başlayanlar üçün krem ənliklər daha idealdır, çünki fırçaya ehtiyac duymadan barmaqla asanlıqla yayılır və çox təbii qalır. Şaftalı və ya açıq çəhrayı tonları hər dəri rənginə təbii bir təravət bəxş edir.

Gözlərdə sadəlik: Tuş və yüngül kölgələr

Göz makiyajında dərhal mürəkkəb "smoky eyes" və ya layner çəkməyə çalışıb həvəsdən düşməyin.

İlk olaraq torpaq tonlarında (bej, qəhvəyi) tək rəng bir göz kölgəsini göz qapağınıza yayın.

Sonra kirpiklərinizi dolğun göstərəcək tuş tətbiq edin. Tuşu kirpik diblərindən uclara doğru ziqzaq hərəkətlərlə çəksəniz, topalanmanın qarşısını alarsınız.

Dodaqlar: Pomada yoxsa dodaq parıldadıcısı

Dodaq çərçivəsini qaçırmaq və ya mat pomadaların dodağı qurutması ilə mübarizə aparmaq yerinə, rəngli dodaq balzamları (lip balm) və ya şəffaf parıldadıcılar (gloss) ilə başlayın. Həm dodaqlarınız nəmli görünər, həm də gün ərzində aynaya baxmadan belə rahatca yeniləyə bilərsiniz.

Az həmişə çoxdur: Makiyajda məhsulu az istifadə edib, ehtiyac olduqca artırmaq ən doğru metoddur.

Fırça təmizliyi: İstifadə etdiyiniz süngər və fırçaları mütəmadi yuyun. Çirkli alətlər dəridə sızanaqlara yol açır.

Gün işığı testi: Makiyajınızı otaq işığında etdikdən sonra mütləq pəncərədən gələn gün işığında yoxlayın. Hər hansı bir ləkə və ya paylanmayan hissə qalıbsa, dərhal fərq edəcəksiniz.

Əminə Bayramova

Tarix: 29 İyun 2026, 13:03

Xəbər lenti