Eyyub Hüseynov: “Professora disk veriblər ki, başının altına qoy, ağrısı keçəcək...”

Sosial şəbəkələrdə mənşəyi bilinməyən dərmanların satışına, bu barədə iş təkliflərinə rast gəlinir. Müxtəlif vakansiya adı ilə insanlar işə cəlb edilir nəticədə isə vətəndaşa manipulyasiya üsulu ilə bir sıra dərmanlar satılaraq verilir və digər insanlara da satılması öhdəliyi qoyulur.

Mövzu ilə bağlı Pravda.az-a açıqlama verən Azad İstehlakçılar Birliyinin sədri Eyyub Hüseynovun sözlərinə görə, uzun illər, Azərbaycan müstəqillik qazanandan bəri bu cür piramida şirkətlər Azərbaycana daxil olub.

O qeyd edib ki, belə şirkətlərdən gələn şikayətlər isə kifayər qədərdir: “İlk daxil olanlardan biri “Qnet” şirkəti olub. Vaxtilə oradan mənə həddindən çox şikayətlər gəlirdi. Təsadüfi deyil ki, hətta onlar 70-ə qədər lal adamı şəbəkəyə cəlb etmişdilər. Danışıq yolu ilə onların təxminən 75000 dollar pulunu Malayziyadan qaytarmağa nail oldum. Çox geniş şəbəkə ilə yayılmışdı. Həddindən artıq böyük problem var idi. İnsanlar işsizlikdən əziyyət çəkdikləri üçün asan yolla pul qazanmağı seçirdilər. Orada tək işlə bağlı deyil, müxtəlif aldatma üsulları vardı. Həmçinin mallar və xidmətlərlə də insanları aldadırdılar. Məsələn, yanıma bir professor gəlmişdi. Dedi ki, başım ağrıyırdı, mənə bir disk verdilər ki, başının altına qoy, ağrısı keçəcək. Bunun üçün 1500 manat verib. Ancaq baş ağrısı keçməyib deyə şikayətə gəldi. Mən də dedim ki, görürsən, sənə xeyir edib, o vaxt ağlın yox idi, gedib belə iş tutdun, indi ağıllanmısan ki, müraciət etmisən. Təbii biz onun da pulunu geri qaytarmağa nail olduq”.

E.Hüseynov bildirib ki, hələ də fəaliyyətini bu növ davam etdirən şirkətlər mövcuddur və satdıqları dərmanlar standartlara uyğun deyil: ““Tiens”, “Dr.Nona”, Sibirskaya zdorovya" (hazırkı adı ilə Siberian Wellness) və bu kimi digər şirkətlərdən bəziləri hələ də Azərbaycanda fəaliyyət göstərirlər. Medianın köməyi ilə biz böyük anti-reklam kampaniyaları aparmışıq və onların xeyli azalmasına və fəaliyyətlərinin məhdudlaşdırılmasına nail olmuşuq. Təbii ki, dövlət orqanları da bu işdə bizə kömək ediblər. Birmənalı şəkildə dərman satışı ilə bağlı məsələdə istehlakçı hüquqları var. Onların satdıqları dərmanlar heç də standartlara uyğun satılan dərmanlar deyil. Məsələn, mənim yanıma da dəfələrlə “Tiens”dən nümayəndə gəlib. Onlar dünyanın müxtəlif yerlərində professorların fikirlərinin yer aldığı gözəl poliqrafiya ilə dərc olunan jurnalları gətirirdilər və deyirdilər ki, istehlakçı təşkilatı olaraq inan buna və bizi anti-reklam etmə. Mən isə bildirmişəm ki, bütün dünya istehlakçılarını aldatmaq üçün dünyada 20 nəfər pula satılmış professor tapmaq lazımdır. Bu da çox asandır. Demişəm ki, elmi jurnaldakı bu dərmanların xeyirli olduğunu sübut edən sənəd gətirin, ancaq belə bir sənəd gətirməyiblər. Poliqrafiyası yüksək səviyyədə olan jurnallar, müxtəlif adlar, rəylərin hamısı istehlakçını aldatmaq jestidir. Lakin nə etmək olar? Azad bazar iqtisadiyyatıdır və hökumətin tələbi odur ki, vergi versinlər. Vergi uçotuna dayanıbsa, kimsənin onunla işi yoxdur. Qeyd edim ki, bu cür fəaliyyətlər dünyanın bir çox ölkəsində var. Hətta Kanada kimi inkişaf etmiş ölkələrdə də belə hallara rast gəlmişəm. İnsanlar belə işlərə aldanmamalıdırlar. Belə halla rastlaşdıqları zaman Antiinhisar və İstehlak Bazarına Nəzarət Dövlət Agentliyinə müraciət etmələri tövsiyə edilir”.

Şəhanə Qədirli

Tarix: 7 İyul 2026, 13:39

Xəbər lenti