Ev işlərini ədalətli formada necə bölüşə bilərik?

Eyni evi paylaşan cütlüklər və ya ailə üzvləri arasında ən çox mübahisə yaradan mövzulardan biri də ev işləridir. "Bu gün qabları kim yuyacaq?", "Evi niyə həmişə mən təmizləyirəm?" kimi suallar zamanla münasibətlərdə ciddi gərginliyə səbəb ola bilər. Bəs, ev işləri hər kəsin razı qalacağı, ədalətli bir şəkildə necə bölüşdürülə bilər?

Pravda.az evdə tarazlığı təmin etməyin və işləri asanlaşdırmağın yollarını təqdim edir:

Hər şeyi açıq formada danışın

İlk addım sakit bir vaxtda oturub bu mövzu barədə danışmaqdır. Təmizlik anlayışı hər kəs üçün fərqli ola bilər. Biri üçün həftədə bir dəfə toz almaq kifayətdirsə, digəri hər gün hər yerin parıldamasını istəyə bilər. Ortaq bir məxrəcə gəlin və nələrin, nə vaxt edilməsi lazım olduğunu dəqiqləşdirin.

Görüləcək işlərin siyahısını hazırlayın

Gözdən qaçan kiçik işlər bəzən ən çox yorucu olanlardır. Evdəki bütün işləri vizual olaraq görmək üçün bir siyahı tərtib edin:

Paltarların yuyulması və ütülənməsi

Yemək bişirilməsi və mətbəxin yığılması

Zibillərin atılması

Bazar-dükan alış-verişi

Hamam və tualet təmizliyi

İşləri bacarıqlara və istəklərə görə bölgü edin

Hər kəsin sevdiyi və ya nifrət etdiyi ev işləri fərqlidir. Ola bilsin ki, tərəfdaşınız yemək bişirməkdən zövq alır, amma qab yumağı sevmir. Siz isə musiqi dinləyərək qab yumağa etiraz etmirsiniz.

İşləri məcburi yox, bacarıq və üstünlüklərə görə bölüşdürəndə həm işlər daha tez bitir, həm də stress azalır.

Rolları dövri olaraq dəyişdirin

Heç kim hər həftə hamamı təmizləmək və ya hər gün zibil atmaq istəməz. Heç kimin sevmədiyi monoton işləri növbəli şəkildə etmək ədaləti təmin etməyin ən yaxşı yoludur.

"Zehni əmək" faktini unutmayın

Ev işləri təkcə fiziki güclə bitmir. "Bu gün nə bişəcək?", "Paltaryuyan dərmanı bitibmi?" kimi mövzuları düşünmək və planlaşdırmaq da böyük bir enerji aparır. İş bölgüsü edərkən bu planlaşdırma işlərini də nəzərə alın və bölüşdürün.

Mükəmməliyyətçilikdən əl çəkin

Tərəfdaşınız evi təmizləyəndə və ya paltarları qatlayanda bunu tam sizin istədiyiniz kimi etməyə bilər. Əgər iş görülübsə, kiçik detallara görə qarşı tərəfi tənqid etməyin. Bu, həm onun həvəsini qırar, həm də işin yenidən sizin üzərinizə qalmasına səbəb olar.

Texnologiyadan və tətbiqlərdən yararlanın

Əgər siyahıları kağızda tutmaq çətin gəlirsə, ortaq istifadə edə biləcəyiniz smartfon tətbiqlərindən, məsələn, Trello, Todoist və ya xüsusi ev işləri tətbiqləri olan OurHome, ChoreMonster istifadə edin. Bu tətbiqlər işləri əyləncəli hala gətirə və sizə xatırlatmalar göndərə bilər.

Qeyd: Ev işlərini bölüşmək sadəcə təmizlik etmək deyil, eyni zamanda bir-birinizin əməyinə və vaxtına hörmət etməkdir. Unutmayın ki, kiçik bir təşəkkür və "əllərinə sağlıq" sözü növbəti işi daha həvəslə görməyə kömək edir.

Əminə Bayramova

Tarix: 9 İyul 2026, 03:24

Xəbər lenti