Şirkətin 36,5 minlik soya yağını mənimsəyən sürücüyə 3 il 6 ay həbs cəzası verildi

Sumqayıt Apellyasiya Məhkəməsində mənimsəmədə təqsirləndirilən Rauf Rəfizadənin (ad, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.

Pravda.az-ın əldə etdiyi məlumata görə, hakim Elçin Məmmədovun sədrliyi ilə keçirilən prosesdə qərar elan edilib.

Qərara əsasən, apellyasiya şikayəti təmin edilməyib.

İttihama görə, Rauf Rəfizadə 2025-ci ildə Siyəzən rayonunun Zarat kəndində yerləşən "Zarat İmport Export" MMC-də rəsmi əmək müqaviləsi olmadan, şifahi razılaşma əsasında sürücü işləyib. Tərəflər arasında əldə olunmuş razılaşmaya əsasən, o, maddi məsul şəxs kimi müəssisəyə məxsus yük avtomobilini idarə etməli, yüklənmiş məhsulları sifariş əsasında göstərilən ünvanlara çatdıraraq təhvil verməli idi.

Belə ki, təqsirləndirilən şəxsə etibarnamə əsasında istifadəsi həvalə edilmiş "KamAZ 53212" markalı yük avtomobilinə satış məqsədilə ümumi çəkisi 13 800 kiloqram, dəyəri isə 36 570 manat olan soya yağı yüklənib. O, "Mal buraxılışı üçün sifariş vərəqəsi"ni imzalayaraq yükü qəbul edib və məhsulu alıcı şirkətin anbarına çatdırmaq üçün yola çıxıb.

Lakin istintaqın müəyyən etdiyi hallara görə, Rauf Rəfizadə üzərinə götürdüyü öhdəliyi yerinə yetirməyib. O, məhsulu sifariş edilən ünvana aparıb təhvil vermək əvəzinə, əvvəlcədən formalaşdırdığı niyyət əsasında yükü mənimsəyərək satışa çıxarıb.

Cinayət işi materiallarında göstərilir ki, təqsirləndirilən şəxs ümumi bazar dəyəri 36 570 manat olan soya yağını əvvəlcədən tanıdığı şəxsə cəmi 15 200 manata satıb. Satışdan əldə etdiyi pul vəsaitini isə şəxsi ehtiyaclarına xərcləyib.

İstintaq orqanı onun hərəkətlərini Cinayət Məcəlləsinin 179.2.4-cü maddəsi (xeyli miqdarda özgə əmlakını mənimsəmə yolu ilə talama) ilə tövsif edib.

Siyəzən Rayon Məhkəməsi araşdırılmış sübutlar əsasında təqsirləndirilən şəxsi Cinayət Məcəlləsinin 179.2.4-cü maddəsi ilə təqsirli bilərək ona 3 il 6 ay müddətinə azadlıqdan məhrumetmə cəzası təyin edib.

Bununla yanaşı, məhkəmə "Zarat İmport Export" MMC-nin mülki iddiasını da təmin edib. Məhkəmə Rauf Rəfizadədən 36 570 manat maddi zərər, 199 manat 71 qəpik isə dövlət rüsumu tutularaq MMC-nin xeyrinə ödənilməsi barədə hökm çıxarıb.

Hökmdən narazı qalan "Zarat İmport Export" MMC-nin direktoru apellyasiya şikayəti verib. Şikayətdə birinci instansiya məhkəməsinin hökmünün yalnız cəza hissəsində dəyişdirilməsi, təqsirləndirilən şəxsə Cinayət Məcəlləsinin 179.2.4-cü maddəsinin sanksiyasında nəzərdə tutulmuş ən ağır azadlıqdan məhrumetmə cəzasının təyin edilməsi xahiş olunub.

Kamal Məmmədov

Tarix: 10 İyul 2026, 08:06

Xəbər lenti