Prezident İlham Əliyev dünyaya bir daha sülh mesajı verdi – TƏHLİL

Azərbaycan Prezidenti cənab İlham Əliyev “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumunun açılış mərasimində dünya ictimaiyyətinə olduqca vacib olan mesajlar verdi. Müxtəlif ölkələrdən dəvət edilən jurnalistlərlə açıq dialoq formatında qlobal və regional məsələləri müzakirə etmək forumun əsasını təşkil edir. Cənab İlham Əliyev bir neçə saat ərzində jurnalistlərin suallarını cavablandırdı. Prezidentinin çıxışının əsasında sülh, həmrəylik, birlik dayanır. Siyasi və iqtisadi baxımdan güclü ölkənin rəhbəri son dərəcə qətiyyətli mövqeyi ilə diqqət çəkdi.

Prezidentin Avropa Şurası ilə bağlı səsləndirdiyi fikirlər kifayət qədər əsaslı faktlar üzərində idi. Dövlət başçısının “Azərbaycan Avropa Şurasından tam şəkildə çıxsa, ölkəmizdə heç kəs bunu hiss etməyəcək. Yəni burada çox şey dəyişməyəcək, bəlkə də bundan daha yaxşı olacaq. Biz toqquşmaya getmək istəmirik, xüsusən də nəinki Avropa Şurası Parlament Assambleyasına gəldikdə, o cümlədən Avropa Parlamentini götürsək. Yenə də deyirəm, onlar bizə qarşı belə əsassız addımlar atırlar. Onlar Azərbaycana bu qədər xüsusi bir qərəzlə yanaşırlar. Bu, onların hücumlarıdır və onların hamısı əsassızdır” deməsi artıq vəziyyətin hansı mərhələdə olduğunun, Azərbaycanın hansı haqsızlıqlarla üzləşdiyinin göstəricisidir.

30 il torpaqları işğal altında olan dövlətə dəstək vermək əvəzinə, təzyiq göstərmək, ərazi bütövlüyü təmin edən zaman maneələr yaratmaq, qətnamələr qəbul etmək düşmənə açıq dəstək vermək deməkdir. Belə olan halda, Azərbaycan da haqlı olaraq, təşkilatdan çıxmaqla bağlı düşünür. Prezident İlham Əliyevi dinlədikcə ölkənin hansı gücə, qüdrətə sahib olduğu açıq görünür. Müasir dövrdə ərazi bütövlüyünü bərpa etmək, xarici anti-Azərbaycan dairələrə qarşı diplomatik mübarizə aparmaq heç də asan məsələ deyil. Bunun üçün yol xətirəsi, güclü iqtisadiyyat və xalq-iqtidar birliyi olmalıdır. Ölkəmiz bu istiqamətlər üzrə uğurla addımlayır. Prezidenti İlham Əliyevin rəhbərlik etdiyi Azərbaycanla yalnız qürur duymaq olar. Ölkəmizin keçdiyi inkişaf yolu digər ölkələr üçün nümunə ola bilər. Azərbaycanı itirmək yox, əməkdaşlıq, dostluq etmək lazımdır, hazırki hökumət bunun üçün nə lazımdırsa, edir. Prezidentin dediyin kimi, Azərbaycan etibarlı tərəfdaşdır, proqnozlaşdırılabilən mənbədir.

Dövlət başçısı çıxışında Rusiya-Ukrayna müharibəsinə də toxundu, müharibənin dərhal dayandırılması ilə bağlı mövqeyini ifadə etdi. Müharibə görmüş, üstəlik də qələbə əldə etmiş ölkənin rəhbərinin belə bir mövqedə olması xüsusi əhəmiyyət kəsb edir. Azərbaycanın lideri Fransa ilə bağlı “Uzun illərdir ki, Fransanın dənizaşırı əraziləri kolonial, müstəmləkəçilik siyasəti nəticəsində əziyyət çəkir. Orada hətta nüvə testləri həyata keçirilir. Polineziyada bəlkə 200-dən artıq nüvə sınaqları keçirilib” fikri ilə ədalətsizlə məruz qalanların yanında olduğunu bir daha göstərmiş oldu.

Azərbaycan Prezidentinin gənc nəslə müraciət edərək, milli kimliyi hər şeydən üstün tutmağa çağırması xüsusi diqqət çəkən məqamlardandır: “Azərbaycan xalqının əbədi qürurlu, qalib xalq kimi yaşaması üçün milli kimlik, milli ləyaqət hər şeydən üstün olmalıdır. Məğlub ola bilərsən, olur belə hadisələr. Amma gərək heç vaxt əyilməyəsən, sınmayasan. Heç vaxt işğalçı ilə razılaşmayasan. İşğalçının diktəsi ilə oturub durmamalısan. Lazım olsa, ölsən də belə, gərək ləyaqətlə yaşayasan, bunu öz övladlarına, nəvələrinə, nəticələrinə aşılayasan. Bizim gələcək inkişafımız gənc nəslə bağlı olacaq. Hardasa 20, 30, 50 ildən sonra onlar da bizim kimi olmalıdırlar. Vətənə bağlı, mətin, iradəli, güclü ki, daim Azərbaycan yüksəklərdə olsun”.

Bütün bunların Şuşadan, 44 günlük Vətən müharibəsinin qələbə rəmzinə çevrilən şəhərdən səsləndirilməsi sülh, milli birlik mesajlarını daha təsirli edir. Bir zamanlar işğal altında olan Şuşa dirçəlib, artıq siyasi mərkəzdir, Azərbaycan dünyaya mühüm mesajlarını məhz Şuşadan verir. Bu da təsadüfi deyil, Prezident İlham Əliyev beynəlxalq aləmə Qarabağın necə dirçəldiyini göstərir.

İlkin Pirəli

“Pravda.az” xəbər portalının baş redaktoru

Tarix: 13 İyul 2026, 18:08

Xəbər lenti