Elman Nəsirov: “Azərbaycan AŞPA sıralarını tərk edəndə xalqımız qərarı dəstəkləyəcək, buna heç kimin şəkk-şübhəsi olmasın”

“Bəzi müxalif siyasi dairələr belə bir informasiya yaymağa çalışırlar ki, Avropa Şurasından çıxsa, Azərbaycana qarşı təzyiqlər daha da artacaq. Biz bu təzyiqləri həmişə görmüşük. Prezident cənab İlham Əliyev Şuşada keçirilən IV Qlobal Media Forumundakı çıxışında vurğuladığı kimi, biz hər zaman bu təzyiqlərə hazırıq. Xaricdən təzyiqlər ölkəmizə hər zaman olub, olacaq. Heç vaxt rahat ola bilmərik ki, bu təzyiqlərə son qoyuldu. Təzyiqlərə həmişə hazır vəziyyətdə olmalıyıq. Birliyimiz sayəsində, qətiyyətimizlə onların qarşısına çıxmalıyıq. Necə deyərlər, artıq bizdə immunitet də var. O qədər bu qurumların təzyiqi altında olmuşuq, eybəcər siyasi hoqqabazlıqlarını, oyunlarını görmüşük ki, artıq bizi təəccübləndirmək də mümkün deyil. Buna görə də radikal müxalifət sevinməsin. Azərbaycan güclü dövlətdir, işimiz haqq işidir. Xalqımız cənab Prezidentin yürütdüyü siyasəti birmənalı şəkildə dəstəkləyir. Sabah Azərbaycan AŞPA sıralarını tərk edəndə də bu siyasi qərarı xalqımız dəstəkləyəcək. Buna heç kimin şəkk-şübhəsi olmasın”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

Deputatın vurğulayıb ki, Prezident İlham Əliyev Şuşada keçirilən IV Qlobal Media Forumunda çıxışı zamanı strateji əhəmiyyətli bir sıra mesajlar verib: “Bu mesajlar təkcə ölkə ictimaiyyəti üçün deyil, daha çox beynəlxalq ictimaiyyətə ünvanlanmış ismarıclar idi. Bunlardan biri Azərbaycanın Avropa Şurasının üzvlüyündən çıxması ilə bağlı məsələ idi. Dövlətimizin başçısı bəyan etdi ki, Azərbaycan Avropa Şurasından çıxmaq məsələsini nəzərdən keçirir. Cənab Prezident həmçinin vurğuladı ki, bu qurumu tərk edəcəyimiz təqdirdə heç bir şey hiss etməyəcəyik. Yəni çıxsaq, bizim üçün daha yaxşı ola bilər. Cənab Prezident bildirdi ki, hələ 2001-ci ildə Avropa Şurası Parlament Assambleyasında Azərbaycan nümayəndə heyətinin rəhbəri olub. İki il ərzində bu rəhbərliyi həyata keçirib. Bu nöqteyi-nəzərdən AŞPA-nın bütün iş prinsiplərini çox gözəl bilir. Avropa Şurası 1949-cu ildə yaradılarkən hər bir Avropa vətəndaşının hüquqlarının müdafiəçisi olacağını bəyan etmişdi. Bu, müvafiq sənədlərdə də əksini tapıb, ancaq missiyasını yerinə yetirə bilmədi, Azərbaycana münasibətdə qərəzli oldu. Bir milyondan çox məcburi köçkün və qaçqınımızın total şəkildə pozulmuş hüquqlarının müdafiəsi ilə bağlı heç bir addım atmadı. Ermənistana qarşı hər hansı qətnamə qəbul etmədi. Eyni zamanda Ermənistanın AŞPA-dan çıxarılması məsələsini gündəmə gətirmədi, onunla fəaliyyətini dondurmadı, Azərbaycana münasibətdə isə ardıcıl qərəzli, təxribatçı addımlar atdı. Azərbaycan öz ərazi bütövlüyünü, suverenliyini tam və qəti şəkildə təmin etdikdən sonra isə ölkəmizə qarşı təzyiqlər daha sistemli xarakter aldı. Nəticə etibarilə, Azərbaycan de-fakto bu qurumda yoxdur. Cənab Prezidentin qeyd etdiyi kimi, Azərbaycan hüquqi baxımdan de-yure də bu təşkilatın sıralarını tərk edə bilər. Bunun bizə heç bir ziyanı olmayacaq. Əksinə, ziyandan çox faydası ola bilər. Necə deyərlər, top qarşı tərəfdədir”.

Aytəkin Qardaşova

Tarix: 14 İyul 2026, 15:57

Xəbər lenti