Saxta əmlak agentliyi adı ilə dələduzluq edən şəxslə bağlı qərar açıqlandı

Bakı Apellyasiya Məhkəməsində dələduzluqda təqsirləndirilən Saqif Həkimovun (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Mehriban Qarayevanın sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib, apellyasiya protesti təmin olunub, Bakı Ağır Cinayətlər Məhkəməsinin hökmü qismən ləğv edilib. Təqsirləndirilən şəxs Cinayət Məcəlləsinin 178.3.1-ci maddəsində nəzərdə tutulmuş cinayət əməllərini törətməkdə təqsirli bilinib və ona 6 il 6 ay müddətinə azadlıqdan məhrumetmə cəzası təyin olunub.

İttihama görə, təqsirləndirilən şəxs tamah niyyəti ilə xeyli miqdarda özgə əmlakını ələ keçirmək məqsədilə hüquqi şəxs kimi dövlət qeydiyyatından keçməyən və qanunsuz fəaliyyət göstərən şirkətdə daşınmaz əmlak agentliyi adı altında yaradılmış qurumun nümayəndəsi kimi fəaliyyət göstərib.

Cinayət işi materiallarında göstərilir ki, Saqif Həkimov qohumu və digər şəxslərlə birlikdə əvvəlcədən vəzifə bölgüsü apararaq mütəşəkkil dəstə şəklində fəaliyyət göstərib. Dəstə üzvləri sosial şəbəkələrdə güzəştli ipoteka və sərfəli kredit şərtləri ilə mənzil əldə etmək imkanları barədə həqiqəti əks etdirməyən elanlar paylaşaraq çoxsaylı vətəndaşların etibarını qazanmağa çalışıblar.

İstintaqın müəyyən etdiyi hallara görə, vətəndaşlara Mənzil İnşaatı Dövlət Agentliyinin inşa etdiyi yaşayış komplekslərindən güzəştli ipoteka şərtləri ilə mənzil almaqda köməklik göstəriləcəyi vəd edilib. Bu məqsədlə onlardan müxtəlif məbləğlərdə ilkin ödənişlər və digər ödənişlər adı ilə pul vəsaitləri alınıb.

Cinayət işinə əsasən, zərərçəkmişlərdən biri Yasamal rayonu ərazisində yerləşən MİDA yaşayış kompleksindən mənzil əldə edəcəyinə inandırılıb. Saqif Həkimov əvvəlcə 2021-ci ilin aprel ayının əvvəlində ondan 2 000 manat, daha sonra isə həmin ilin aprel ayında əlavə 18 000 manat nağd pul alıb.

Beləliklə, zərərçəkmişə ümumilikdə 20 000 manat maddi ziyan vurulub.

İstintaq materiallarına görə, eyni sxem digər vətəndaşa da tətbiq olunub. Ona da MİDA layihəsi çərçivəsində ipoteka ilə mənzil veriləcəyi vəd olunub. Aldadılan şəxs müxtəlif vaxtlarda ümumilikdə 30 min manat ödəyib. Pul vəsaiti təqsirləndirilən şəxslər tərəfindən mənimsənilərək şəxsi ehtiyaclara sərf edilib.

Cinayət işində qeyd olunur ki, daha bir vətəndaşa Masazır qəsəbəsində yerləşən mənzilin ipoteka yolu ilə alınacağı bildirilib. Bu məqsədlə müxtəlif tarixlərdə və müxtəlif üsullarla pul vəsaitləri qəbul olunub.

Beləliklə, həmin zərərçəkmişə 19 953 manat maddi ziyan vurulub.

Məhkəmə araşdırması zamanı təqsirləndirilən şəxsə əvvəlcə Cinayət Məcəlləsinin 178.3.1-ci maddəsi ilə verilmiş ittiham yenidən qiymətləndirilib. Nəticədə məhkəmə onun əməllərini Cinayət Məcəlləsinin 178.2.2-ci (təkrar dələduzluq) və 178.2.4-cü (xeyli miqdarda ziyan vurmaqla dələduzluq) maddələri ilə tövsif edib.

Bakı Ağır Cinayətlər Məhkəməsinin hökmü ilə Saqif Həkimov qeyd olunan maddələr üzrə təqsirli bilinərək 4 il 6 ay müddətinə azadlıqdan məhrum etmə cəzasına məhkum olunub.

Kamal Məmmədov

Tarix: 16 İyul 2026, 08:11

Xəbər lenti