Aydın Mirzəzadə: “Azərbaycanda radikal müxalifəti problemlərin həlli deyil, dərinləşməsi maraqlandırır”

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə Xarici işlər naziri Ceyhun Bayramovun Moskva səfəri çərçivəsində Rusiya və Azərbaycan arasında diplomatik gərginliyin aradan qaldırılması barədə verilən mesajların müxalifət tərəfindən tənqid edilməsinə münasibət bildirib.

Deputat Pravda.az-a açıqalamsında deyib ki, Rusiya dünyanın böyük güc mərkəzlərindən biridir və Azərbaycanın birbaşa qonşusudur.

A.Mirzəzadə qeyd edib ki, Azərbaycanda radikal müxalifəti problemlərin həlli deyil, problemlərin olması, hətta dərinləşməsi maraqlandırır: “Onlar üçün vəziyyət nə qədər pis olarsa, hakimiyyəti bir o qədər çox pisləmək, ancaq özlərini Azərbaycanın taleyini həll edəcək qüvvə kimi göstərmək imkanları yaranır. Bu gün Arif Hacılını, İlqar Məmmədovu, Sərdar Cəlaloğlunu Azərbaycanın büdcəsinin ildən-ilə artması, işğaldan azad olunan ərazilərin bərpası, dünyanın böyük qüvvələri ilə Azərbaycanın bərabər hüquqda münasibətlərini qurması maraqlandırmır. Onlar istənilən məsələnin həllini çox böyük narazılıqla qarşılayırlar. Rusiyada yüz minlərlə azərbaycanlı yaşayır. Eyni zamanda Azərbaycanda da yüz mindən çox rus icması var. Qonşu ölkələrlə münasibətlərin yaxşı olmasını bütün ölkələr arzulayır və bunun üçün çalışır. Sərnişin təyyarəmizin Rusiya ərazisində vurulması, əlbəttə, Azərbaycanla Rusiya arasında gərginlik yaratdı. Azərbaycan öz suveren hüquqlarını, vətəndaşlarının təhlükəsizliyini çox sərt şəkildə ortaya qoydu, Rusiyanı bu məsələdə Azərbaycana cavab verməyə, təyyarə qəzasından sonra yaranan problemləri həll etməyə çağırdı. Görünən budur ki, Azərbaycanın prinsipial mövqeyi bu problemi həll etdi. Bu gün Rusiya Azərbaycanla yaxşı münasibətlərdə maraqlıdır. Moskva Bakı ilə əməkdaşlıq etməyə, qarşılıqlı surətdə investisiya qoymağa və regional əməkdaşlığı gücləndirməkdə maraqlı olduğunu ortaya qoyur. Əlbəttə, o məsələlər ki Azərbaycanın milli maraqlarına cavab verir, regionda və dünyada sülhün təhlükəsizliyinin təmin edilməsinə şərait yaradır, belə halda Azərbaycan həmişə əməkdaşlıq etməyə hazırdır. Bu mövqeyi cənab Prezident İlham Əliyev dəfələrlə səsləndirib. Xarici işlər naziri Ceyhun Bayramovun Moskva səfəri bir daha göstərdi ki, Azərbaycanın öz maraqlarını yüksək səviyyədə qoruması digər dövlətlərin Azərbaycanı ciddi bir dövlət kimi qəbul etmələrinə gətirib çıxarır. Bundan sonra da həmişə maraqlarımızın, vətəndaşlarımızın təhlükəsizliyinin, hüquqlarının qorunması Azərbaycan dövlətinin əsas prioriteti olacaq”.

Aytəkin Qardaşova

Tarix: 20 İyul 2026, 12:51

Xəbər lenti