Gəlini tərəfindən döyülən qayınana məhkəmədə onu bağışladı

Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Xariqə Əsədovanın (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Vaqif Həsənovun sədrliyi ilə keçirilən prosesdə hökm oxunub.

Məhkəmənin hökmü ilə icraat materialına xitam verilib və o, cinayət məsuliyyətindən azad edilib.

İş materiallarına əsasən, hadisə 2026-cı ilin iyun ayında Xırdalan şəhərində yerləşən fərdi yaşayış evində baş verib.

Belə ki, Xariqə Əsədova ailə üzvləri ilə birlikdə yaşadığı evdə qayınanası. Zərərçəkmiş Alimə Əsədova (adı, soyadı şərtidir) ilə birgə yaşamaq məsələsinə görə mübahisə edib.

Mübahisənin böyüməsi nəticəsində təqsirləndirilən şəxs əsəbiləşərək qayınanasının üzərinə hücum edib. O, zərərçəkmişə əl və yumruq zərbələri endirərək sifətinə, başına, qollarına, kürəyinə və bədəninin müxtəlif nahiyələrinə xəsarətlər yetirib.

Məhkəmə-tibbi ekspertizasının rəyinə əsasən, Alimə Əsədovanın sol qolunda, sağ çiyin və kürək nahiyəsində qançırlar, sol dirsək və sağ bazuda hərəkət məhdudluğu ilə müşayiət olunan şişkinliklər, həmçinin çənəaltı və üst dodaq nahiyəsində sıyrıqlar aşkarlanıb. Bu xəsarətlər sağlamlığın qısa müddətə pozulmasına səbəb olan qəsdən sağlamlığa yüngül zərər vurma kimi qiymətləndirilib.

Məhkəmə iclasında Xariqə Əsədova özünü tam təqsirli bilib. O deyib ki, həyat yoldaşı ilə uzun illər qeyri-rəsmi nikah münasibətində yaşayıb, 2026-cı ilin may ayında isə nikahlarını rəsmiləşdiriblər. Onların bir azyaşlı övladı var. Həyat yoldaşının əvvəlki nikahdan olan iki övladı da ailə ilə birlikdə yaşayır.

Təqsirləndirilən şəxsin sözlərinə görə, qayınanası Alimə Əsədova onun həmin evdə yaşamasını istəmədiyi üçün ailədaxili narazılıqlar tez-tez baş verib. Hadisə günü də qayınanası ona evi tərk etməsini tələb edib. Bu səbəbdən tərəflər arasında mübahisə yaranıb və o, əsəblərinə hakim ola bilməyərək Alimə Əsədovaya yumruq zərbələri endirib.

Xariqə Əsədova bildirib ki, münaqişə təxminən 3-5 dəqiqə davam edib və həmin vaxt evdə olan qayınatası onları ayıraraq insidentin qarşısını alıb.

Təqsirləndirilən şəxs törətdiyi əməldən peşman olduğunu, zərərçəkmiş şəxslə barışdığını və vurduğu zərəri tam ödədiyini deyərək məhkəmədən cinayət işinə xitam verilməsini xahiş edib.

Zərərçəkmiş Alimə Əsədova da məhkəmədə verdiyi ifadəsində hadisənin ailədaxili mübahisə zəminində baş verdiyini təsdiqləyib. O deyib ki, gəlininin onlarla birlikdə yaşamasını istəmədiyi üçün aralarında vaxtaşırı mübahisələr yaranmışdı. Hadisə günü də ona evi tərk etməsini tələb etdikdən sonra gəlini əsəbiləşərək əl və yumruq zərbələri ilə onu döyüb.

Zərərçəkmiş şəxsin sözlərinə görə, münaqişə zamanı həyat yoldaşı müdaxilə edərək tərəfləri ayırıb və hadisə bununla yekunlaşıb.

Bununla yanaşı, Alimə Əsədova məhkəməyə bildirib ki, hazırda gəlini Xariqə Əsədova ilə barışıb, dəymiş zərər tam ödənilib və onun barəsində heç bir şikayət və tələbi qalmayıb. O, cinayət işi üzrə icraata xitam verilməsini məhkəmədən xahiş edib.

Kamal Məmmədov

Tarix: 27 İyul 2026, 10:15

Xəbər lenti