Sərxoş vəziyyətdə qəza törədərək dostunun ölümünə səbəb olan sürücüyə hökm oxundu

Lənkəran Ağır Cinayətlər Məhkəməsində ölümlə nəticələnən ağır yol-nəqliyyat hadisəsi törətməkdə təqsirləndirilən Rövşən Namazəliyevin cinayət işi üzrə məhkəmə iclası başa çatıb.

Pravda.az-ın əldə etdiyi məlumata görə, hakim Cavid Səfərlinin sədrliyi ilə keçirilən prosesdə hökm oxunub.

Məhkəmənin hökmü ilə ona cəzasını məntəqə tipli cəzaçəkmə müəssisəsində çəkməklə 5 il müddətə azadlıqdan məhrumetmə cəzası təyin edilib.

İttihama görə, Rövşən Namazəliyev sərxoş vəziyyətdə və sürücülük hüququ olmadan avtomobil idarə edərək yol hərəkəti qaydalarını kobud şəkildə pozub. Nəticədə avtomobil yoldan çıxaraq aşıb, bir nəfər hadisə yerində ölüb, özü isə ağır bədən xəsarətləri alıb.

Belə ki, təqsirləndirilən şəxs "Yol hərəkəti haqqında" Qanunun nəqliyyat vasitəsini idarə etmək hüququ, sərxoş vəziyyətdə avtomobil idarə edilməsinin yolverilməzliyi və yol hərəkəti iştirakçılarının təhlükəsizliyi ilə bağlı müddəalarının tələblərini pozaraq 2025-ci ilin dekabr ayının 6-sı axşam saatlarında faktiki istifadəsində olan "Mercedes-Benz E230" markalı avtomobillə Yuxarı Qarabağ kanalı–Daşburun avtomobil yolunun Beyləqan rayonu Birinci Aşıqlı kəndi ərazisindən keçən hissəsində hərəkətdə olub.

O, hadisənin qarşısını almaq üçün texniki imkanı olduğu halda avtomobilin idarəetməsini itirib. Nəticədə nəqliyyat vasitəsi yolun hərəkət hissəsindən çıxaraq aşıb.

Qəza zamanı maşının arxa oturacağında əyləşən sərnişin - Nizami Məmmədov çoxsaylı qabırğa sınıqları, ağciyərlərin cırılması, ikitərəfli hemotoraks, bədənin müxtəlif nahiyələrinin zədələnməsi və digər ağır xəsarətlər alıb. Ön sərnişin oturacağında olan Hafiz Məmmədov isə baş beyninin ağır əzilməsi, kəllə sümüklərinin sınıqları, diffuz aksonal zədələnmə, çoxsaylı qabırğa sınıqları və digər həyati təhlükəli travmalar alıb.

Məhkəmə-tibbi ekspertizasının rəyinə əsasən, arxa oturacaqda əyləşən Nizami Məmmədov aldığı çoxsaylı qabırğa sınıqları, ağciyərin cırılması nəticəsində baş vermiş kəskin qanitirmə və ağır travmatik şok səbəbindən hadisə yerində həyatını itirib.

Məhkəmə iclasında ifadə verən Rövşən Namazəliyev ittiham üzrə özünü təqsirli bildiyini deyib.

Onun sözlərinə görə, hadisə günü tanışları ilə birlikdə balıq ovuna gedərək spirtli içki qəbul ediblər. Axşam saatlarında geri qayıdarkən hər üçü sərxoş vəziyyətdə olub.

İfadəsində bildirib ki, əvvəlcə avtomobili Hafiz idarə etsə də, sonradan özünü pis hiss etdiyi üçün sükanı ona verib: "Maşını idarə etməyə başlayandan təxminən 3-4 dəqiqə sonra güclü zərbə hiss etdim. Sonrasını xatırlamıram. Ayılanda artıq Bakıdakı xəstəxanada idim. Sonradan öyrəndim ki, dostlarımızdan biri hadisə zamanı dünyasını dəyişib”.

Rövşən Namazəliyev baş verənlərdən dərin peşman olduğunu, zərərçəkmiş şəxslərlə barışdığını və məhkəmədən ona yüngül cəza təyin edilməsini xahiş edib.

Məhkəmə baxışı zamanı həlak olan şəxsin hüquqi varisi səhhətində yaranmış problemlər səbəbindən prosesdə iştirak edə bilməyib.

O, məhkəməyə göndərdiyi teleqramda təqsirləndirilən şəxslə barışdığını, dəymiş ziyanın tam ödənildiyini, ona qarşı hər hansı şikayət və ya tələbinin olmadığını bildirib. Hüquqi varis həmçinin məhkəmədən Rövşən Namazəliyevə yüngül cəza verilməsini xahiş edib.

Kamal Məmmədov

Tarix: 4 Avqust 2026, 08:15

Xəbər lenti