Şagirdlər arasındakı mübahisə böyüdü: Valideyn məktəb önündə döyüldü

Şirvan Apellyasiya Məhkəməsində xuliqanlıqda təqsirləndirilən Vahid Əkbərovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Cavid Sultanovun sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İttihama görə, hadisə 2025-ci ildə Füzuli rayonunun Yuxarı Kürdmahmudlu kənd tam orta məktəbində baş verib.

Belə ki, Vahid Əkbərovun 5-ci sinifdə təhsil alan qızı ilə sinif yoldaşı arasında bir neçə gün əvvəl yaranmış mübahisəyə aydınlıq gətirilməsi məqsədilə məktəb rəhbərliyi hər iki tərəfin valideynlərini təhsil ocağına dəvət edib. Məktəb direktorunun otağında aparılan söhbətdən sonra tərəflər ordan çıxıblar.

İttihamda göstərilib ki, məktəb binasının qarşısından keçən kəndarası yolda təqsirləndirilən şəxs zərərçəkmiş Maqsud Davudovun (adı, soyadı şərtidir) ünvanına nalayiq ifadələr işlədərək onunla yenidən mübahisəyə başlayıb. Mübahisə zamanı Vahid Əkbərov əvvəlcə zərərçəkmişə yumruq zərbələri endirib, daha sonra isə yerdən götürdüyü daş parçasını silah qismində istifadə edərək onun baş nahiyəsinə bir neçə dəfə zərbə vurub.

Hadisə nəticəsində Maqsud Davudovun sağ gicgah nahiyəsində yumşaq toxumaların əzilməsi, başın sol təpə-gicgah və təpə-ənsə nahiyələrində əzilmiş yaralar, sol qulaq seyvanında və sol bazu nahiyəsində qançırlar müəyyən edilib. Məhkəmə-tibbi ekspertizasının rəyinə əsasən, baş nahiyəsindəki xəsarətlər sağlamlığın qısa müddətə pozulmasına səbəb olan yüngül bədən xəsarəti kimi qiymətləndirilib.

Bu səbəbdən təqsirləndirilən şəxsə Cinayət Məcəlləsinin 221.3-cü (silah qismində istifadə olunan əşyadan istifadə etməklə xuliqanlıq) maddəsi ilə ittiham irəli sürülüb.

Lakin işə baxan Füzuli Rayon Məhkəməsi sübutları araşdırdıqdan sonra hadisənin hüquqi qiymətləndirilməsini dəyişib. Məhkəmə hesab edib ki, baş vermiş hadisə ictimai qaydanın kobud şəkildə pozulmasına yönəlmiş xuliqanlıq deyil, şəxsi münasibətlər zəminində baş vermiş münaqişədir. Bu əsasla məhkəmə əməli Cinayət Məcəlləsinin 221.3-cü maddəsindən həmin Məcəllənin 128-ci maddəsinə – qəsdən sağlamlığa yüngül zərər vurma maddəsinə tövsif edib.

Hökmə əsasən, Vahid Əkbərov Cinayət Məcəlləsinin 128-ci maddəsi ilə təqsirli bilinərək 6 ay müddətinə azadlıqdan məhrumetmə cəzasına məhkum olunub. Bununla yanaşı, məhkəmə "Konstitusiya və Suverenlik İli" münasibətilə qəbul edilmiş amnistiya aktını tətbiq edib. Milli Məclisin müvafiq qərarının 1.16 və 5.1-ci bəndlərinə əsasən, təqsirləndirilən şəxs təyin olunmuş 6 aylıq azadlıqdan məhrumetmə cəzasını çəkməkdən azad edilib. Həmçinin onun barəsində seçilmiş polisin nəzarəti altına vermə qətimkan tədbiri də ləğv olunub.

Kamal Məmmədov

Tarix: 4 Avqust 2026, 10:23

Xəbər lenti