Soğan qoxusunu yox etməyin ən asan yolları: Əldən, ağızdan və evdən qoxunu belə çıxarın

Soğan yeməklərə xüsusi dad versə də, doğradıqdan, bişirdikdən və ya yedikdən sonra əllərdə, ağızda, mətbəxdə və hətta qablarda kəskin qoxu buraxa bilər.

Pravda.az bildirir ki, bu qoxudan qurtulmaq üçün evdə olan sadə məhsullardan istifadə etmək mümkündür

Əldən soğan qoxusu necə çıxarılır?

Limonla ovuşdurun: Əllərinizi yarım limonla yüngülcə ovuşdurun. Daha sonra sabunlu su ilə yuyun.

Karbonatdan istifadə edin: Bir qədər karbonatı az su ilə qarışdırıb məcun halına gətirin. Əllərinizə çəkib yüngülcə ovuşdurduqdan sonra bol su ilə durulayın.

Sirkə ilə silin: Əlinizə az miqdarda sirkə töküb qısa müddət ovuşdurun. Daha sonra əllərinizi yaxşıca durulayın.

Paslanmayan poladdan istifadə edin: Əllərinizi axar su altında paslanmayan polad qaşıqla ovuşdurmaq qoxunu azaltmağa kömək edə bilər.

Qəhvə çöküntüsünü sınayın: Qəhvə çöküntüsünü əllərinizə çəkib yüngülcə ovuşdurun. Ardınca əllərinizi sabunla yuyun.

Duz və zeytun yağı: Az miqdarda duz və bir neçə damcı zeytun yağı ilə əllərinizi yüngülcə ovuşdurub durulayın.

Ağızdakı soğan qoxusu necə yox edilir?

Dişlərinizi və dilinizi fırçalayın: Soğan qoxusu yalnız dişlərdə deyil, dilin səthində də qala bilər. Buna görə dişlərlə yanaşı dili də təmizləmək vacibdir.

Bol su için: Su ağız boşluğunun təmizlənməsinə və qoxunun daha tez azalmasına kömək edir.

Cəfəri çeynəyin: Soğanlı yeməkdən sonra bir neçə budaq təzə cəfəri çeynəmək ağız qoxusunu azaltmağa kömək edə bilər.

Nanə və ya reyhan istifadə edin: Təzə nanə və reyhan xoş ətri ilə soğan qoxusunu maskalaya bilər.

Süd və ya qatıq yeyin: Süd və qatıq soğanın ağızda buraxdığı kəskin dadı yumşalda bilər.

Şəkərsiz saqqız çeynəyin: Saqqız tüpürcək ifrazını artırır və ağız boşluğunun təmizlənməsinə kömək edir.

Evdə soğan qoxusu necə çıxarılır?

Mətbəxi havalandırın: Soğan doğradıqdan və ya qovurduqdan sonra pəncərəni açın, aspiratoru işə salın və hava axını yaradın.

Sirkəli və ya limonlu su qaynadın: Kiçik qazanda suya bir neçə dilim limon və ya az miqdarda sirkə əlavə edib qısa müddət qaynadın. Buxar mətbəxdəki ağır qoxunun azalmasına kömək edə bilər.

Qəhvə çöküntüsü və ya karbonat qoyun: Kiçik qaba qəhvə çöküntüsü və ya karbonat töküb mətbəxdə saxlayın.

Zibili dərhal çıxarın: Soğan qabıqları zibil qutusunda qaldıqca qoxu yaymağa davam edə bilər.

Doğrama taxtasını dərhal yuyun: Soğan qoxusu doğrama taxtasına asanlıqla hopur. Taxtanı gözlətmədən isti su, qab yuyucu vasitə və lazım gələrsə limonla təmizləyin.

Qablardakı soğan qoxusundan necə qurtulmaq olar?

Limonla ovun: Plastik və ya şüşə qabları limonla ovuşdurub bir müddət saxlayın. Sonra isti su və yuyucu vasitə ilə yuyun.

Karbonatlı suda saxlayın: Qaba isti su və 1-2 çay qaşığı karbonat əlavə edib bir müddət gözləyin.

Sirkəli sudan istifadə edin: Qaba su və sirkə əlavə edib saxlayın. Daha sonra yaxşıca durulayıb qurudun.

Günəşdə havalandırın: Plastik qablarda qoxu daha qalıcı ola bilər. Qabı yuduqdan sonra qapağı açıq şəkildə havalandırın və imkan varsa günəş düşən yerdə saxlayın.

Qapağı ayrıca təmizləyin: Qoxu çox vaxt qapaqda və silikon hissələrində qalır. Qapağın kənarlarını və silikon hissələrini ayrıca təmizləmək lazımdır.

Çox qoxu hopmuş plastik qabları ayırın: Qoxu uzun müddət getmirsə, həmin qabı soğanlı yeməkləri saxlamaq üçün istifadə etmək daha məqsədəuyğun ola bilər.

Əminə Bayramova

Tarix: 18 Avqust 2026, 11:47

Xəbər lenti