“Laçın Zəfərdən sonra Azərbaycanın qurduğu yeni regional reallığın mühüm dayaqlarından biridir” – Rövşən Muradov

“26 avqustun Laçın şəhəri günü kimi qeyd olunması Laçının tarixi əhəmiyyətinin dövlət səviyyəsində xüsusi qiymətləndirilməsinin ifadəsidir. Bu tarix bir tərəfdən Laçının 2022-ci il avqustun 26-da azad edilməsini milli yaddaşda yaşadır, digər tərəfdən isə şəhərin Qarabağ və Şərqi Zəngəzurun postmünaqişə dövründə formalaşan yeni iqtisadi, sosial və strateji məkanındakı rolunu diqqətə çatdırır”.

Bu sözləri Pravda.az-a açıqlamasında Milli Məclisin deputatı Rövşən Muradov deyib.

R.Muradov qeyd edib ki, Laçının geosiyasi əhəmiyyətini onun coğrafi mövqeyindən ayrı təsəvvür etmək mümkün deyil: “Rayon Kəlbəcər, Qubadlı, Xocalı, Şuşa və Xocavənd rayonları ilə həmsərhəd olmaqla yanaşı, Ermənistanla sərhəddə yerləşir. Bu coğrafi mövqe Laçını Qarabağ və Şərqi Zəngəzur arasında əlaqələrin, nəqliyyat və enerji infrastrukturunun, regional inkişaf layihələrinin mühüm elementinə çevirir. Məhz buna görə Laçının işğalı 1992-ci ildə hərbi və humanitar faciə olmaqla yanaşı, ciddi strateji nəticələr yaradıb. Laçının işğalı Ermənistanla keçmiş Dağlıq Qarabağ Muxtar Vilayəti arasında coğrafi əlaqənin formalaşmasına imkan yaratmış və Azərbaycanın sonrakı ərazi itkilərinin genişlənməsinə təsir göstərmişdi. Laçının azad edilməsi isə bu strateji reallığın köklü şəkildə dəyişdirilməsi demək idi. Bu gün həmin coğrafi mövqe artıq işğal siyasətinin elementi kimi deyil, regional inkişafın resursuna çevrilir. Kəlbəcər-Laçın avtomobil yolunun tikintisi, tunellər və körpülər vasitəsilə nəqliyyat əlaqələrinin gücləndirilməsi, Laçın Beynəlxalq Hava Limanının fəaliyyəti şəhərin regional kommunikasiya sistemindəki rolunu əhəmiyyətli dərəcədə artırır. Laçının strateji əhəmiyyəti enerji sektorunda da aydın görünür. Rayonun zəngin hidroenerji potensialının sistemli şəkildə istifadəyə verilməsi nəticəsində burada çoxsaylı su elektrik stansiyaları yaradılır. 2026-cı ilin iyulunda Hoçaz çayı üzərində “Ağbulaq-1”, “Ağbulaq-2” və “Şeylanlı” su elektrik stansiyalarının açılması ilə Laçının elektrik tələbatının yaşıl enerji hesabına qarşılanması daha da möhkəmlənib. Bu proses Laçını Azərbaycanın yaşıl enerji xəritəsində xüsusi mövqeyə çıxarır. Rayonun istehsal etdiyi artıq enerjinin ölkənin enerji sisteminə ötürülməsi Laçının enerji istehlakçısından enerji istehsal edən və sistemə töhfə verən əraziyə çevrildiyini göstərir. Bu, işğaldan azad edilmiş ərazilərin iqtisadi modelinin mahiyyətini xarakterizə edən mühüm göstəricidir. “Həkəriçay” su anbarı layihəsi Laçının regional funksiyalarını daha da genişləndirir. Azərbaycanın ərazisində formalaşan Həkəri çayı üzərində yaradılacaq su anbarının təqribən 700 min nəfərin içməli su təminatına töhfə verməsi və layihə çərçivəsində yeni su elektrik stansiyalarının nəzərdə tutulması Laçının su, enerji və regional infrastruktur siyasətindəki rolunu əhəmiyyətli dərəcədə artırır”.

Deputatın sözlərinə görə, Laçının yeni inkişaf modelinin başqa bir mühüm istiqaməti iqtisadiyyatın şaxələndirilməsidir:

“Aqro-sənaye parkı, mebel və tekstil istehsalı, ayaqqabı fabrikləri, balıqçılıq, heyvandarlıq və turizm infrastrukturu şəhərin yalnız yaşayış məkanı kimi deyil, iqtisadi fəaliyyət mərkəzi kimi inkişaf etdiyini göstərir. Bütün bunların mərkəzində insan amili dayanır. Laçınlıların doğma yurda qayıdışı dövlət siyasətinin ən mühüm nəticəsidir. 2023-cü ildən etibarən başlayan məskunlaşma prosesi şəhərin sosial həyatını bərpa edir və Laçını yenidən canlı Azərbaycan şəhərinə çevirir. Laçın şəhəri günü mənim üçün məhz bu böyük tarixi dəyişimin ifadəsidir. Laçın artıq yalnız keçmişin ağrısını xatırladan şəhər kimi düşünülə bilməz. Bu gün Laçın Zəfərdən sonra Azərbaycanın qurduğu yeni regional reallığın mühüm dayaqlarından biridir. Laçının dirçəlişi Azərbaycanın dövlətçilik iradəsinin, iqtisadi imkanlarının və strateji planlaşdırma qabiliyyətinin vəhdətini nümayiş etdirir. 26 avqust isə bütün bunların fonunda bir həqiqəti xüsusi aydınlıqla ifadə edir: Azərbaycan Laçını yalnız azad etməyib, Laçının gələcəyini də qurur”.

Şəhanə Qədirli

Tarix: 26 Avqust 2026, 12:28

Xəbər lenti