Dələduzluq edən müstəntiqə nə qədər cəza verilib? – QƏRAR

Ali Məhkəmədə dələduzluqda təqsirləndirilən İlqar Həşimovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlkin Abdullayevin sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, hüquq-mühafizə orqanlarından birində müstəntiq işlədiyi dövrdə tanışı olan zərərçəkmiş Emin Bədirxanova özünü işgüzar şəxs kimi təqdim edib. O, Bakı şəhərində Mənzil Tikinti Kooperativlərindən biri tərəfindən inşa edilən çoxmərtəbəli yeni yaşayış binasından iki mənzil alaraq təmir etdirdikdən sonra satacağını və əldə olunacaq yüksək qazanca zərərçəkmiş şəxsi də şərik edəcəyini vəd edib.

Bu vəddən sonra o, Emin Bədirxanovdan 2016-cı ilin mart-avqust ayları ərzində ümumilikdə 164 500 ABŞ dolları ekvivalentində 27 9650 manat məbləğində pul vəsaitini alıb. Lakin təqsirləndirilən şəxs verdiyi vədə əməl etməyərək dələduzluq edib.

Bundan başqa, cinayət işi üzrə daha bir epizod isə İlqar Həşimovun müstəntiq vəzifəsində çalışdığı dövrə aiddir. Onun icraatında olan cinayət işi üzrə şikayətçi qismində çıxış edən digər zərərçəkmiş Hafiz Ağamalıyevə vurulmuş maddi ziyanın tam ödənilməsini təmin edəcəyini vəd edib. Bunun üçün müəyyən məbləğdə pul verilməsinin zəruri olduğunu deyərək həmin şəxsi aldatdığı və pul aldığı bildirilib.

İttihamda göstərilib ki, 2018-ci ilin aprel-may aylarında çalışdığı qurumun inzibati binasındakı iş otağında zərərçəkmiş şəxsdən 6 000 ABŞ dolları ekvivalentində 10 200 manat alınıb.

Sonuncu dəfə isə o, digər yerdə daha 940 manat götürüb.

Beləliklə, həmin epizod üzrə ümumilikdə 11 140 manat pul vəsaitinin alındığı və şəxsi ehtiyaclara sərf edildiyi ittiham olunub.

Bakı Ağır Cinayətlər Məhkəməsinin hökmü ilə İlqar Həşimov 7 il 6 ay müddətinə azadlıqdan məhrum edilib. Hökmdən məhkum və onun müdafiəçisi apellyasiya şikayəti verib. Bakı Apellyasiya Məhkəməsinin şikayətləri qismən təmin edib. Apellyasiya instansiyası Bakı Ağır Cinayətlər Məhkəməsinin hökmünü qismən ləğv edib və təqsirləndirilən şəxsə ikinci epizod – qulluq mövqeyindən istifadə etməklə zərərçəkmiş şəxsə 11 140 manat məbləğində maddi ziyan vurmaqla təkrarən dələduzluq etməsi ilə bağlı ittiham üzrə bəraət verib.

Məhkəmə həmin hissədə təqsirliliyin sübuta yetirilmədiyi qənaətinə gəlib.

Apellyasiya instansiyası Cinayət Məcəlləsinin 178.3.2-ci maddəsi ilə təyin edilmiş cəzanı da dəyişib. İlqar Həşimovun dövlət və yerli özünüidarəetmə orqanlarında rəhbər və maddi məsul vəzifə tutmaq hüququndan 2 il müddətinə məhrum edilməklə 7 il 6 ay azadlıqdan məhrum edilməsi barədə cəza 7 il 3 aya endirilib.

Bakı Apellyasiya Məhkəməsinin hökmündən dövlət ittihamçısı kassasiya protesti verib. Ali Məhkəmənin qərarı ilə dövlət ittihamçısının kassasiya protesti təmin edilməyib.

Bununla yanaşı, Bakı Apellyasiya Məhkəməsinin həmin hökmündən məhkum tərəfindən də kassasiya şikayəti verilib.

Kamal Məmmədov

Tarix: 11 Sentyabr 2026, 08:22

Xəbər lenti