Fazil Mustafa: “Azərbaycanda qeyri-ənənəvi oriyentasiyanın təmsilçilərinin yayğınlaşması müşahidə edilir”

Türkiyədə LGBTİ+ dərnəklərinə, internet resurslarına və sosial şəbəkə hesablarına qarşı genişmiqyaslı hüquqi araşdırmalar və əməliyyatlar başladılıb. “Ailəm Güvəndə” adı altında keçirilən bu əməliyyatlar çərçivəsində rəsmi qurumlar tərəfindən ciddi addımlar atılıb. Bunu təbliğ edənlər saxlanılır və hesablarına giriş qadağası qoyulur. Sosial şəbəkələrdə insanlar cinsi azlıqların Azərbaycanda da yetəri qədər olduğunu, təbliğatının aparıldığını dilə gətirərək belə bir əməliyyatın Azərbaycanda da keçirilməli olduğunu qeyd edirlər.

Mövzu ilə bağlı Pravda.az-a açıqlama verən Milli Məclisin deputatı Fazil Mustafa bildirib ki, Azərbaycanın ənənəvi ailə modelinin qorunması, milli-mənəvi dəyərlərin müəyyən deformasiyaya uğramaması üçün addımlar atılması vacibdir.

F.Mustafa qeyd edib ki, dövlət də bu istiqamətdə müəyyən addımlar atır: “İndi qeyri-ənənəvi oriyentasiyanın təmsilçilərinin Azərbaycanda da yayğınlaşması müşahidə edilir. Təbii ki, bütün bu məsələlərə hüquq çərçivəsində baxılmalıdır. Hansısa bir reydlər, əməliyyatlar ancaq qanunvericiliyə əsaslanmalıdır. Bunun birinci növbədə təbliğat tərəfi ciddi gücləndirilməlidir. Qeyri-ənənəvi ailə modelləri və ya belə şəxslərin həyat tərzləri insanın bioloji, sosial varlığa çevrildiyi bir situasiyada insan təbiətinə zidd olduğunu aşımalıyıq, çatdırmalıyıq. İnsanların bu formada olan həyat tərzindən yayındırmağa çalışmalıyıq. Amma indi bəlli hüquq çərçivəsində bunun edilməsi zəruridir. Çünki bütün hallarda söhbət insandan və insana baxışdan gedir. Baxmayaraq ki, biz cinayətkara da müəyyən məhdudiyyətlər gətirdiyimiz zamanda onun da hüququnu müəyyən çərçivədə pozmamağa çalışırıq, insan kimi müəyyən hüquqlarının qorunmasına təminat veririk. Bu baxımdan da qeyd edilən məsələlər cəmiyyətdə geniş müzakirə olunur. Hüquqi çərçivənin müəyyən olunduğu andan başlayaraq belə bir tədbirlərin görülməsi mümkün ola bilər. Hələlik Azərbaycanda hüquq müxanizmlərinin bu istiqamətdə sərt çərçivəsi nəzərdə tutulmadığına görə belə bir davranışları müəyyən dərəcədə əsaslandırmaq da problemlər yarada bilər. Çünki biz həm də Avropanın hüquq məkanındayıq və bu məkanın da prinsiplərinə görə, müəyyən addımlarımızı tənzimləməliyik. Təbii ki, mental ailə dəyərlərini qorumaq adına ciddi işlər görülməlidir və bu formada fəaliyyətlərə münasibətdə hər halda dövlətin qoruyucu mexanizmlərinin işə salınması ilə nəzərdə tutula bilər. Amma hüquq çərçivəsində müzakirə edərək müəyyənləşdirməliyik ki, sonradan qeyri-hüquqi davranışlara da yol verilməsin”.

Şəhanə Qədirli

Tarix: 15 Sentyabr 2026, 12:14

Xəbər lenti