“Biz heç kimə baş əymirik, əyməyəcəyik də!” mesajı milli maraqlar əsasında siyasət aparmaq prinsipinin ifadəsidir - RƏY

“Ölkə Prezidenti cənab İlham Əliyev sentyabrın 15-də Bakıda keçirilən beynəlxalq konfransların iştirakçıları ilə görüş zamanı bir sıra mesajlar ünvanladı. Bu da Azərbaycanın xarici siyasətində mühüm istiqamətləri bir daha ortaya qoymuş oldu. Dövlət başçısının Türk Dövlətləri Təşkilatı çərçivəsində əməkdaşlığın və İslam Həmrəyliyinin əhəmiyyətinə diqqət yetirməsi Azərbaycanın özünü həm Türk Dünyasının, eyni zamanda İslam aləminin mühüm əməkdaşlıq platformalarından biri kimi təqdim etdiyini göstərir. Son dövrlər bu istiqamət ardıcıl şəkildə gündəmdə saxlanılır. Azərbaycan türk dövlətləri ilə istər siyasi, istərsə də iqtisadi, humanitar və mədəni əlaqələrin dərinləşdirilməsini birmənalı dəstəkləyir. Cənab Prezident əvvəl də Türk Dövlətləri Təşkilatında birləşən ölkələrin həmrəyliyinin və çoxşaxəli əməkdaşlığının qlobal səviyyədə əhəmiyyətini dəfələrlə vurğulayıb. İslam həmrəyliyi məsələsi Azərbaycanın xarici siyasətində uzun illərdir ki, prioritet yer tutur. 2027-ci ildə Azərbaycan İslam Əməkdaşlıq Təşkilatının zirvə konfransına ev sahibliyi edəcək, eyni zamanda Təşkilata sədrlik edəcəyi nəzərdə tutulub. Bu baxımdan, Bakıda keçirilən beynəlxalq tədbirlər təkcə dini və mənəvi müstəvidən deyil, həmçinin dövlətlərarası əməkdaşlıq baxımı da xüsusi əhəmiyyət kəsb edir”.

Bu sözləri Pravda.az-a açıqlamasında Milli Məclisin deputatı Samir Vəliyev deyib.

Samir Vəliyev: “Avropa Parlamenti Azərbaycanın erməni separatizminin kökünü kəsməsini həzm edə bilmir” Pravda.az

Deputat vurğulayıb ki, Prezident İlham Əliyevin toxunduğu ən önəmli məsələlərdən biri də sülh məsələsidir: “Azərbaycan rəhbərliyi son dövrlərdə regional sülh və sabitliyin təmin olunmasını beynəlxalq gündəmdə önə çəkir. Məsələn, 2026-cı ilin iyununda Şuşada keçirilən "Qlobal təhlükəsizliyə regional töhfə: Cənubi Qafqazda sülh quruculuğu" mövzusunda beynəlxalq konfrans da bu yanaşmanın nümunələrindən biridir. Cənab Prezidentin “Biz heç kimə baş əymirik, əyməyəcəyik də!” mesajını isə Azərbaycanın dövlət müstəqilliyi və milli maraqlar əsasında siyasət aparmaq prinsipinin ifadəsi kimi qiymətləndirmək olar. Burada söhbət hər hansı dövlətlə qarşıdurmadan deyil, Azərbaycanın öz qərarlarını müstəqil şəkildə qəbul etmək, milli maraqlarımızı qorumaq və beynəlxalq münasibətlərdə bərabərhüquqlu tərəf kimi çıxış etmək mövqeyindən gedir. Beləliklə, cənab Prezident İlham Əliyevin dünənki görüş zamanı verdiyi mesajları üç əsas istiqamətdə ümumiləşdirmək mümkündür - Türk Dünyasında həmrəyliyin möhkəmləndirilməsi, İslam ölkələri ilə əməkdaşlığın dərinləşdirilməsi və Azərbaycanın suveren, müstəqil xarici siyasət xəttinin davam etdirilməsi. Eyni zamanda bu siyasətin mühüm komponentlərindən biri, təbii ki, regional sülh və sabitliyin təmin olunmasıdır”

Aytəkin Qardaşova

Tarix: 16 Sentyabr 2026, 11:02

Xəbər lenti