Özünə güvənən uşaq necə böyüdülür?

Özünə güvənən uşaq yetişdirmək üçün valideynin sevgi, dəstək və sağlam sərhədləri balanslı şəkildə tətbiq etməsi vacibdir. Uşağa aydın məqsədlər və gözləntilər vermək, eyni zamanda ona öz qərarlarını vermək və səhvlərindən öyrənmək imkanı yaratmaq özünəinamının formalaşmasına kömək edir.

Pravda.az bildirir ki, əgər uşağınızın daha özünə güvənən biri olmasını istəyirsinizsə, bu tövsiyələri nəzərə alın:

Məqsədiniz özünə güvənən fərd yetişdirmək olsun

Məqsədinizin özünə güvənən fərd yetişdirmək olduğunu unutmayın. Özünə güvənən insanlar dünyaya fərqli baxırlar. Onlar hər şeyi daha səmərəli şəkildə dəyərləndirir və həyatın mənfi tərəflərinin öhdəsindən daha yaxşı gəlirlər.

Evinizdə aydın rollar, məqsədlər və gözləntilərlə yanaşı, sevgi və qətiyyətə əsaslanan mühit yaradın.

Aydın rollar

Çox sadədir: siz valideynsiniz, o isə uşaqdır. Uşağınıza getməli olduğu yolu siz göstərir, həmin yolda nələri etməli və nələri etməməli olduğunu öyrədirsiniz.

Təbii ki, qaydalarınıza əməl etdikdə uşağınızı təsdiqləməli və təqdir etməlisiniz. Əksinə, qaydalara əməl edilmədikdə isə ardıcıl və məntiqli nəticələr olmalıdır.

Əgər heç bir sərhəd qoymasanız, uşağınız istədiyi hər şeyi edə biləcəyini düşünə bilər. İstədiyini edə bilmədikdə isə həm özünü, həm də sizi üzəcək davranışlar göstərə bilər.

Əlbəttə, burada diktatorluqdan söhbət getmir! Əgər uşaq sizdən və ya gücünüzdən qorxduğu üçün sizi dinləyir və qaydalara əməl edirsə, bu, sizə olan etibarının azalmasına səbəb ola bilər. Amma münasibətin təməlində sevgi olduqda, uşaq sizə güvənəcək və hörmət edəcək. Bu isə həm sizin, həm də onun xoşbəxtliyi üçün çox vacibdir.

Aydın məqsədlər

Uşaqlarınıza yaxşı rəhbər olmağın ən yaxşı yollarından biri onlarla arzu olunan istiqamətdə aydın məqsədlər haqqında danışmaqdır.

Uşağınızla əldə etmək istədiyiniz nəticələr və bunların onun üçün nə üçün faydalı olduğu barədə əvvəlcədən və açıq şəkildə danışmalısınız.

Nəticələri onun zehni və emosional olaraq təsəvvür etməsinə kömək edin. Daha sonra bu məqsədə çatmaq üçün ona lazım olan sərbəstliyi verin.

Özü üçün aydın məqsədlər müəyyənləşdirməsinə kömək edin.

Əlbəttə, bu yolda səhvlər edə bilər. Lakin bu səhvlər sizin yenidən valideyn kimi istiqamət verərək onu doğru yola yönəltməyiniz üçün bir fürsət də ola bilər.

Aydın gözləntilər

Aydın gözləntilər aydın məqsədlərə bənzəyir, lakin bir qədər fərqlidir.

Aydın məqsədlər əldə edilmək istənilən nəticələrlə bağlıdır. Aydın gözləntilər isə həmin nəticələrə nail olmaq üçün insanın necə davranmalı və necə bir insan olmalı olduğu ilə əlaqədardır.

Onun dəyərləri nələrdir? Standartları hansılardır? Özünü hansı şəkildə aparmalıdır?

Bu aydın gözləntilər evdə qaydaların və prinsiplərin müəyyən bir iyerarxiyasını da formalaşdırır.

Əminə Bayramova

Tarix: 7 Oktyabr 2026, 16:34

Xəbər lenti