AQTA vaxtı keçmiş və istifadəyə yararsız pestisid və aqrokimyəvi maddələrlə çirklənmiş ərazilərin təmizlənməsinə 350 min xərcləyəcək

“Azərbaycan-Türkiyə münasibətlərinə zərbə vurmaq istəyən radikal qüvvələrin gözləntisi ictimai rəydə qarşılıqlı etimadsızlıq yaratmaqdır” - Deputat

Qorxmaz İbrahimli: “İstanbuldakı sel anomaliya deyil, məmurların özbaşınalığının fəlakətidir”

İstanbulda baş verən güclü yağışlar və sel hadisəsi təbii fəlakət risklərini yenidən gündəmə gətirib.

Bəs Türkiyədə yaşanan bu təbiət hadisəsi Azərbaycanda da təkrarlana bilərmi?

Mövzu ilə bağlı Pravda.az-a açıqlama verən ekoloq Qorxmaz İbrahimli bildirib ki, İstanbulda baş verən sel fəlakəti anomaliya və ya təsadüf deyil.

O bildirib ki, dünyada belə sellər, yağıntılar hər gün olur: “Xüsusilə okeana yaxın ərazilərdə insanlar aylarla musson yağışlarının bitəcəyini gözləyirlər. İlin müəyyən aylarında, xüsusilə yay mövsümündə musson yağışı başlayır və bitmək bilmir. O seldən isə ölən yoxdur. İstanbulda isə ölüm hadisəsi baş verdi, evlər su altında qaldı. Eynilə Bakıda da 2 il əvvəl belə bir hadisə baş verdi. Ani leysan, bir günlük yağışın aylıq normanı azacıq aşması faciəyə səbəb oldu. Faciə şəhər icra hakimiyyətinin iş bilməzliyindən, şəhərlərdə məmur özbaşınalığının, plansızlığın, infrastrukturun düzgün qurulmamasının nəticəsidir, kanalizasiyalar düzgün təşkil edilməyib. İki il əvvəl İstanbuldakı yağıntının onda biri Bakıya yağmamışdı. Bir az artıq yağsa, nə baş verəcək? Bakı yenə su altında qalacaq. Bakıda kanalizasiya strukturu düzgün qurulmayıb. Eynilə digər böyük şəhərlərdə və ya böyük dövlətlərdə belə şeylər nəzərə alınmalıdır. Bakıda elə yağış yağmır. Bakıya 220-240 millimetr yağıntı düşür. Bu, çox azdır. Bakı bir səhra şəhəridir. Amma El Nino iqlim hadisəsi və ya hər bir cərəyan bir yağış gətirsə, şimaldan qarlı-yağışlı hava gəlsə, necə olacaq? Atlantik okean havası gələndə özü ilə yağış gətirir. Bir az çox olarsa, necə olacaq? Deməli, eyni durumu biz də yaşayacağıq. Problem infrastukturun düzgün qurulmaması, hava məlumatlarının araşdırılmaması, yanlış ərazilərdə evlərin tikilməsidir. İllərlə yağış yağmır, sel olmur. İndi deyirlər ki, son 80 ildə belə yağış olmayıb. Deməli, 80 il əvvəl olub. Bunu nəzərə alıb yanlış yerdə bina tikilməməli idi, kanalizasiya sistemi düzgün qurulmalı idi. Nəticədə insan həyatı itirildi. Yəni bunu təbii fəlakət adlandırmaq olmaz. Səbəb normal yağış deyil, hansısa cərəyanla bağlı olan yağışa şəhərin hazır olmamasıdır. Buna təbii fəlakət demək doğru deyil. Məmurların özbaşınalığının fəlakətidir. Azərbaycanın dağlıq və dağətəyi ərazilərində yağış, sel ola bilər. Meşələr qırılıbsa, bu da təhlükə səbəbidir. Məsələn, inanmıram ki, Gəncə şəhərində yağış hansısa problem yarada, çünki orada infrastruktur düzgün qurulub. Əgər infrastruktur düzgün qurulmayıbsa normadan artıq yağan yağış sel fəlakəti yarada bilər”.

Şəhanə Qədirli

Tarix: 19 Oktyabr 2026, 14:09

Xəbər lenti