“Azərbaycan-Türkiyə münasibətlərinə zərbə vurmaq istəyən radikal qüvvələrin gözləntisi ictimai rəydə qarşılıqlı etimadsızlıq yaratmaqdır” - Deputat

“Azərbaycan-Türkiyə münasibətləri tarixi qardaşlıq, ortaq milli-mənəvi dəyərlər, strateji tərəfdaşlıq və müttəfiqlik kimi möhkəm siyasi-hüquqi əsaslar üzərində qurulub. Bu münasibətlərin miqyası və strateji əhəmiyyəti imkan vermir ki, ayrı-ayrı məsələlər ətrafında yaranmış fikir ayrılıqları süni şəkildə dərinləşdirilərək iki dövlət arasında fundamental ziddiyyət görüntüsü yaradılsın. Görünən odur ki, son günlər yaranmış həssas informasiya mühiti Azərbaycan-Türkiyə münasibətlərinə mənfi təsir göstərməkdə maraqlı olan radikal, marginal və destruktiv dairələrin fəallaşması üçün əlverişli zəmin yaradıb. Belə qüvvələrin əsas məqsədi mövcud fikir ayrılıqlarını şişirtməklə ictimai rəydə qarşıdurma təsəvvürü yaratmaq və iki qardaş xalq arasında etimadı zəiflətməkdir. Bu cür yanaşmalar heç bir halda Azərbaycan və Türkiyənin milli maraqlarına xidmət etmir”.

Bu sözləri Pravda.az-a açıqlamasında Milli Məclisin deputatı Aydın Hüseynov deyib.

Deputat vurğulayıb ki, xüsusilə, sosial media platformalarında emosional, təxribatçı və manipulyativ məzmunun geniş dövriyyəyə buraxılması informasiya mühitinin çox həssas şəkildə idarə olunmalı olduğunu göstərir: “Nəzərə almaq lazımdır ki, Azərbaycan və Türkiyə arasında münasibətlər təkcə emosional qardaşlıq üzərində deyil, konkret strateji maraqlar əsasında formalaşıb. Bizi müdafiə və təhlükəsizlik əməkdaşlığı, enerji siyasəti, Orta Dəhliz, nəqliyyat-logistika layihələri, Türk Dövlətləri Təşkilatı, regional sabitlik, iqtisadi inteqrasiya və geniş geosiyasi əməkdaşlıq birləşdirir. Bu qədər böyük strateji gündəliyə malik iki dövlətin münasibətlərinin ayrı-ayrı polemikaların girovuna çevrilməsi mümkün deyil. Bu səbəbdən hesab edirəm ki, ilk növbədə rəsmi dövlət mövqeyi ilə ayrı-ayrı siyasətçilərin, media qurumlarının və sosial şəbəkə istifadəçilərinin mövqeyi arasında aydın sərhəd qoyulmalıdır, izahat işləri düzgün qurulmalıdır. Eyni zamanda problemlərin sosial şəbəkələr və emosional media ritorikası üzərindən həllinə çalışmaq münasibətlərin mahiyyətinə uyğun deyil. Çünki Azərbaycan-Türkiyə münasibətlərinə zərbə vurmaq istəyən radikal, marginal və destruktiv dairələrin ən böyük gözləntisi iki ölkənin ictimai rəyində qarşılıqlı etimadsızlıq yaratmaqdır. Bütövlükdə, Azərbaycan-Türkiyə müttəfiqliyi qarşılıqlı suverenlik, bərabərhüquqluluq, daxili işlərə hörmət, siyasi etimad və strateji həmrəylik prinsipləri üzərində inkişaf etdirilməlidir. “Bir millət, iki dövlət“ anlayışı həm ortaq tarixi-mənəvi bağlılığımızı, həm də iki müstəqil və suveren dövlətin mövcudluğunu ifadə edir. Buna görə də siyasi təmkin nümayiş etdirilməli və münasibətləri süni qarşıdurmaya sürükləməyə çalışan qüvvələrin informasiya manipulyasiyalarına imkan verməməlidir”.

Aytəkin Qardaşova

Tarix: 19 Oktyabr 2026, 14:31

Xəbər lenti