Xırdalanda küçədən oğurladığı avtomobili evə apardı, nömrəsini dəyişdi – CƏZA

Abşeron Rayon Məhkəməsində oğurluqda təqsirləndirilən Yunis İmanovun cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, sonuncu keçirilən prosesdə hökm oxunub.

Məhkəmənin hökmü ilə ona 2 il müddətinə azadlıqdan məhrumetmə cəzası təyin edilib. İş üzrə maddi sübut qismində tanınmış “VAZ-2107” markalı avtomobilin zərərçəkmişə qaytarılması nəzərə alınıb.

İş materiallarına görə, hadisə 2026-cı ildə, saat 01 radələrində Abşeron rayonu, Xırdalan şəhərində yerləşən “Səmayə” şadlıq sarayının yaxınlığında baş verib.

Belə ki, Yunis İmanov zərərçəkmiş İlqar Budaqova (adı, soyadı şərtidir) məxsus, 2004-cü il buraxılışlı, 3 500 manat dəyərində olan “VAZ-2107” markalı avtomobilin qapılarının açıq olmasından istifadə edib. Təqsirləndirilən şəxs avtomobili əli ilə itələyərək Abşeron rayonu, H.Z. Tağıyev küçəsində kirayədə yaşadığı evin həyətinə aparıb. O, törətdiyi əməli gizlətmək məqsədilə maşının üzərindəki dövlət qeydiyyat nişanını dəyişdirərək başqa qeydiyyat nişanı quraşdırıb.

Beləliklə, Yunis İmanov özgənin əmlakını gizli talayaraq oğurluq edib.

Məhkəmə iclasında ifadə verən Yunis İmanov elan olunmuş ittiham üzrə özünü təqsirli bilib.

O deyib ki, hadisə günü gecə saatlarında “Səmayə” şadlıq sarayının yaxınlığından piyada keçərkən yolun sağ tərəfində dayanmış “VAZ-2107” markalı avtomobili görüb. Ətrafa baxdıqda yaxınlıqda heç kimin olmadığını görüb avtomobili oğurlamaq qərarına gəlib.

Təqsirləndirilən şəxsin sözlərinə görə, məqsədi avtomobili sürmək olub. Avtomobilin mühərrikini işə salmaq üçün salonundakı naqilləri birləşdirməyə çalışsa da, buna nail ola bilməyib. Bundan sonra sürətlər qutusunu neytral vəziyyətə gətirərək maşını əli ilə itələməyə başlayıb.

Yunis İmanov yolda avtomobili itələməyə kömək etmələri üçün iki gəncə müraciət etdiyini, onların müəyyən məsafəyədək ona kömək göstərdiklərini, daha sonra isə maşını təkbaşına itələyərək kirayədə yaşadığı evin həyətinə apardığını bildirib.

İfadəsində təqsirləndirilən şəxs avtomobili həyətə gətirdikdən sonra üzərindəki dövlət qeydiyyat nişanlarını çıxardığını və təxminən bir ay əvvəl küçədən tapdığı başqa qeydiyyat nişanını avtomobilə bağladığını deyib.

O, bir neçə gün ərzində avtomobilin mühərrikini işə salmağa çalışsa da, bunu bacarmayıb. Daha sonra polis əməkdaşları yaşadığı evin həyətinə gələrək avtomobili aşkar ediblər. Yunis İmanov avtomobili polis əməkdaşlarına təhvil verdiyini bildirib.

Təqsirləndirilən şəxs avtomobili hissələrə ayıraraq satmaq niyyətinin olmadığını, hadisəni tək törətdiyini və avtomobili oğurlaması barədə heç kimə məlumat vermədiyini qeyd edib. Yunis İmanov törətdiyi əmələ görə peşman olduğunu da ifadə edib.

Məhkəmə iclasının sonunda Yunis İmanov zərərçəkmiş şəxsə dəymiş ziyanı tam ödədiyini və onunla barışdığını söyləyib. O, məhkəmədən barəsində yüngül cəza təyin edilməsini xahiş edib.

Kamal Məmmədov

Tarix: 22 Oktyabr 2026, 08:29

Xəbər lenti