"Adam yandırmısınız, 250 manat verin, yoxsa…" - QALMAQAL

"Hərə özünə bir “knijka” düzəldib jurnalist olub. Bu sifətlərə və “jurnalist vəsiqələri”nə yaxşı baxın. Sonra da deyirik, biz informasiya məsələsində ermənilərə uduzuruq. Əgər hər yoldan ötən bu ölkədə “jurnalist” ola bilirsə, nə Mətbuat Şurası, nə Prezident Administrasiyasının strukturları, nə Daxili İşlər Nazirliyi, nə prokurorluq orqanları bu adamlarla bacara bilmirsə, deməli, günah ermənidə deyil".

Pravda.az-ın xəbərinə görə, bunu jurnalist Aygün Muradxanlı deyib.

A.Muradxanlının sözlərinə görə, özünü 6 saytın baş redaktoru kimi təqdim edən Çingiz Qurbanoğlu adlı şəxs Nərimanov rayonundakı qadın salonlarından birinə gedərək deyib ki, ona 250 manat versinlər: "Həmin şəxs salonda deyib ki, əks halda salon bağlanacaq. Niyə? Sizin lazer aparatınızda bir nəfər yanıb, mənə şikayət yazıb. Verirsiz, verin, vermirsiz Nərimanov polisində adamlarım var, tökəcəm salona sizin başınıza oyun açacam. “Ay adam, ay insan, kimi yandırmışıq, haçan yandırmışıq” soruşublar, 5 dəqiqədən sonra bir “şüvən” gəlib ki, məni. O da cibindən “jurnalist” vəsiqəsi çıxarıb. Bir həyasızlıq salıb, bir qiyamət qoparım, sözlə deyiləsi deyil. Bu iki “jurnalist”in salondakı həyasızlığının səsyazısını dinlədim, heyrət etdim… Nə qədər özgüvən... Sanki polis, prokurorluq bunların göstərişlərilə oturur-durur. Salonun sahibi yaxın rəfiqəmdir. Uzun illərdir tanıyırıq bir-birimizi. Haqqında bir fakt deyim, necə biri olduğunu təxmin edin. Ailə üzvləri arasında Milli Ordumuzun neçə zabiti var. Oğlu Aviasiya Akademiyasını yüksək qiymətlərlə bitirdi və hərbi aviasiya mühəndisidir. İndi küçədən keçən bir gəda ilə bir ləçər “jurnalist”əm deyib ona hücum edirlər. Çingiz Qurbanova zəng elədim. Deyirəm, sən nə haqla salona hücum eləmisən? Deyir, şikayət var. Deyirəm, şikayət varsa, sən onu işıqlandıra bilərsən, sənin işin bura qədərdir. Dedi, o sənə elə gəlir..., mənə jurnalistlik öyrətmə. 6 saytım var, 1992-ci ildən də baş redaktoram. Dedim, Mətbuat Şurasına deyəcəyik, güldü. Dedi, mən onların üzvü deyiləm, arxam da möhkəmdi, heç kim mənə heç nə edə bilməz. Onu da deyim ki, heç bir xəsarət faktı yoxdur, ola da bilməz. O aparat elə tək bizim evdə 3 nəfərə xidmət edir... Yüksək keyfiyyətlidir. Adi qızartı yaranıb ki, 2-3 saata keçir gedir. Tərəfləri danışdırdıq və ortaya çıxardığım nəticə budur - bu iki “jurnalist” rastgələ salon seçir, orda xidmət alır, xidmətlə bağlı saxta ittiham irəli sürür və sahiblərindən pul qoparır. “Jurnalistəm” səni biabır edəcəm, salonu bağlatdıracam hədə-qorxusu ilə. Əgər bu və bunun kimi “jurnalistlərlə” bağlı hüquqi tədbir görülməyəcəksə, ermənilər Gəncəyə qədər gələcək. İnformasiya mühitindəki biabırçılıqların, özbaşınalıqların kökü hara bağlıdır, bilən var?".

Ç.Qurbanoğlu isə A.Muradxanlıya belə cavab verib: "Siz kim olduğunuzu hamı yaxşı bilir. Müxalifətçi jurnalist… Birincisi, əlimizdə faktlar var. İkincisi də, siz cinayətkarı müdafiə edirsiniz. Sizə kim haqq verib ki, Mətbuat Şurasının adından danışırsınız?!"

Fotoları təqdim edirik