Sabiq müdafi naziri: "Hərbi maşın ki, hərəkətə gəldi, işə düşdü, onu dayandırmaq olmaz"

Sabiq Müdafiə naziri, general-mayor Tacəddin Mehdiyev Azərbaycan ordusunun torpaqlarımızın azadlığı üçün apardığı əks-hücum əməliyyatları barədə danışıb, himanitar atəşkəs məsələsinə münasibət bildirib və bəzi təkliflər verib.

“Hərbçilər arasında belə bir məsəl var: hərbi maşın ki, hərəkətə gəldi, işə düşdü, onu dayandırmaq olmaz. Qətiyyən dayandırmaq olmaz... Bu atəşkəs oyunu ermənilərin ruslarla birgə işlədiyi növbəti fırıldaqları idi. Azərbaycan ordusunun böyük uğurlar qazandığını gördüklərindən onun hücumunu dayandırmağa çalışırlar. Harda görünüb ki, müharibə gedə-gedə meyit dəyişələr, əsir dəyişələr? Bunlar hamısı əməliyyatlar bitəndən sonra olmalıdır. Döyüş gedə-gedə belə işlərlə məşğul olmurlar. Bu, onların növbəti tələsi idi. Biz 1-ci Qarabağ savaşından yaxşı bilirik ki, neçə dəfə atəşkəs olubsa, birində Şuşa işğal edilib, o birində Ağdam işğal edilib. Odur ki, ermənilərin heç bir sözünə, heç imzaladıqları sənədə də inanmaq olmaz. Ona görə cənab Ali Baş Komandan çox düzgün dedi ki, biz onları axıradək qovacağıq və bütün torpaqlarımız azad olunmalıdır. Bir sözlə, bunlarla heç bir atəşkəsə getmək olmaz. Bunun ilk nəticəsini artıq Gəncədə gördük”- 1990-cı illərdə yenicə formalaşan Müdafiə Nazirliyində rəhbər vəzifələrdə çalışmış bir şəxs kimi xeyli təcrübəsi olan general Xankəndi, Şuşa, Laçın, Kəlbəcər istiqamətində hücumları dayandırmamağa çağırıb.

“Eşq olsun bizim ordumuza, əsgər, zabit və generallarımıza. Ordumuz qısa müddətdə düşmənin 30 illik müdafiə mövqelərini yarıb irəliləyir. Ancaq əsas problemlərdən biri mülki əhalini itkilərdən mümkün qədər qorumaqdır. Düşmənin Gəncə, Tərtər, Bərdə, Ağcabədi və s. kimi şəhərlərimizə raket, mərmi atışının qarşısını tamamilə almaq lazımdır. İnanırıq ki, bundan sonra Hava Hücumundan Müdafiə qüvvələrimiz Ermənistan və ya Qarabağdan atılan erməni raketlərini daha dəqiqliklə məhv edərək dinc insanlarımızı ölümdən, şikəst olmaqdan qoruyacaqlar. İnsanları itkilərdən qorumağın bir yolu da şəhərlərimizdə həyəcan siqnalı sistemi quraşdırılmasıdır. Bu, ondan ötrüdür ki, düşmən raketləri, yaxud bombardımançı təyyarələri radarlarda görünən kimi onların istiqamətləndiyi şəhər, qəsəbə və kəndlərdə ucadan sirena verilir və sakinlər sığınacaqlara, nisbətən təhlükəsiz yerlərə yığılır...

Allah Ali Baş Komandan başda olmaqla ordumuzu qorusun! İnşallah, tezliklə yeni-yeni qələbə xəbərləri eşidək...” -deyə sabiq Müdafiə naziri çıxışını nikbin notlarla bitirib.Moderator

Tarix: 13 Oktyabr 2020, 19:55

Xəbər lenti