“İncəsənət insanı üçün bu dönəmləri yaşamaq çox çətindir, biz konsertlərə, tədbirlərə öyrəşmişik”

Əməkdar artist, Sənətşünaslıq üzrə fəlsəfə doktoru, dosent Toğrul Əsədullayevin müsahibəsini təqdim edirik:

Kamança ifaçısı olan Toğrul bəy bizimlə söhbətində tarixi qələbəmizdən və milli dəyərlərimizə olan bağlılığımızdan danışdı.

- Xalqımızın bu tarixi qələbəsini necə qeyd etdiniz?

- 44 günlük müharibə bizə bir çox mətləbləri aydın etdi. Belə ki, rəşadətli ordumuz 30 ildir həsrətini çəkdiyimiz torpaqlarımızı 44 günə işğaldan azad etdi. Ordumuzun bu qələbəsini görüb, fəxarət hissi duyduq. Həmin günlər ərzində gecə-gündüz sosial şəbəkələri, mətbuatı, televiziya kanallarını izləyirdim. Rəsmi məlumatlara inanır və onu sosial şəbəkədə paylaşırdım. Əslində torpaqlarımızın nə zamansa bizə geri qayıdacağına ümidimiz var idi. Şükürlər olsun ki, torpaqlarımız sahibinə qayıtdı. Zəfər günü fərəh hissi keçirir, sevincimizin həddi-hüdudu yox idi. Sevincimizi sosial şəbəkələrdə paylaşırdıq. Bizi orada nəinki vətəndaşlarımız, eyni zamanda xaricilər də izləyir. Onlar da bizim sevincimizə şərik oldular. Əslində əldə etdiyimiz qələbə ilə kifayətlənməmliyik. Biz yenə də öz missiyamızı yerinə yeritməliyik. Düşmənə imkan verməməliyik ki, onlar bu səhvi təkrarlasın. Bunun üçün hər bir vətəndaş öz sahəsində daha peşəkar olmalıdır.

- Artıq 10 aydır ki, pandemiya ilə də mübarizə aparırıq. Aktiv həyat tərzi keçirən yaradıcı insanlar üçün bu şərait bir qədər çətin olmalıdır.

- Pandemiya dönəmində Azərbaycan Milli Konservatoriyasında, Azərbaycan Dövlət Mədəniyyət və İncəsənət Universitetində pedaqoq olaraq işimi davam etdirirəm. Hazırda onlayn dərslərim davam edir. Musiqiçi kimi efirlərə dəvət alır və karantin qaydalarına riayət edərək çıxış edirik.

Yaradıcı insan üçün passiv həyat rejiminə uyğunlaşmaq bir az çətindir. Belə ki, hər gün dövlət tədbiri, konsertləri olan yaradıcı insan üçün bu rejim bir qədər çətinlik törədir. Əsas odur ki, canımız sağlam olsun və sağlamlığımızın qeydinə qalaq. Bu çətin dönəmdən üzüağ çıxaq. Virus bizim gözəgörünməz düşmənimizdir. Biz görünməyən düşmənlə mübarizə aparırıq. Tətbiq edilən qaydalar isə bizim səhhətimizin təhlükəsizliyinə hesablanıb.

- Belə bir deyim var “Yaradıcı insan boş qalanda bəşəriyyətə nifrət edir”. Bu fikirlə nə qədər razısınız?

- Bu nifrət deyil. Yaradıcı insan daima aktiv həyat keçirir. Gün ərzində öz sənəti ilə məşğul olur. Elə bir zaman yetişir ki, gündəlik o işləri görmək mümkün olmur. Bu müvəqqəti çətinlikdir. Bütün bunlar bizim can sağlığımıza görədir. Yenə də tədbirlərimiz, konsertlərimiz olacaq. İndiki vəziyyət hər nə qədər sıxıcı olsa da, biz buna məcburuq. Ancaq bu günlər də bitəcək. Dünya bu vaxta qədər bir çox xəstəliklər, pandemiyalar görüb. Bunların hamısına qalib gəlib, ümid edirik ki, koronavirus da bir tarix olacaq. Özünüzü ruhdan salmayın, pessimist olmağa dəyməz.

- Füzuli şəhərinin Ermənistan tərəfindən dağıdılmış Mədəniyyət Mərkəzinin qarşısında 27 il sonra skripka ilə mahnı ifa edildi və bununla da dünyaya sülh mesajı verildi. Sizcə burda milli alətlərimizlə dünyaya sülh mesajı ötürülməsi daha yaxşı olmazdımı?

- Yəqin bunun da bir məqsədi var. Skripka dünyəvi alətdir. Belə bir layihədə milli musiqi aləti kimi kamançaya müraciət etsəydilər məmnuniyyətlə iştirak etməyə razı olardım. Azərbycan musiqisini təbliğ, təmsil etmək bizim borcumuzdur. Biz musiqi alətlərimizlə fəxr edirik. Əslində Gəncə hadisələri zamanı mənə belə bir təklif gəlmişdi. Daha sonra cəbhədə döyüşlər gərinləşdiyi üçün layihə dayandırıldı. Biz bunu dünən deyil, hər zaman edə bilərik. Milli alətlərimizin təbliği istiqmətində görülən bütün layihələrdə iştirak etəməyə hazıram.

- Pandemiya sizdə hər hansı ümidsizlik, qırılıq yaratdımı?

- Açığı koronaviris hələ ki, məndə ruh düşkünlüyü yaratmayıb. Düzdür, incəsənət insanı üçün bu dönəmləri yaşamaq çox çətindir. Biz konsertlərə, tədbirlərə öyrəşmişik. İnanırıq ki Allahın köməkliyi ilə bu pandemiyadan da üzüağ çıxacağıq. Bütün dünya bu bəladan əziyyət çəkir. Tez bir zamanda əvvəlki həyat rejimimizə qayıdacağıq. Bu 10 ay müddətində biz də boş dayanmadıq. Belə ki, məşqlərimizi edir, repertuarlarımızı yeniləyir və özümüzə zaman ayırdıq. Solo ifalarımızın sayını çoxaltdıq. Onu da qeyd edim ki, pandemiyadan sonra yeni layihələrim də baş tutacaq.Moderator

Tarix: 19 Dekabr 2020, 22:13

Xəbər lenti