“Bəzi insanlar, sadəcə, cərimə olunmamaq üçün maska taxırlar”

“Əksər vətəndaşların maska istifadəsində əsas məqsədi hazırki epidemioloji vəziyyətdə virusa yoluxmamaq olmadığına görə, adətən, qara maskalardan istifadə edirlər. Ağ maskalardan istifadə olunmamasına səbəb odur ki, belə açıq rəngli maskalar çirklənən kimi tez görünür, səliqəsiz görüntü yaradır”.

 

Bu sözləri Pravda.az-a açıqlamasında tibb üzrə fəlsəfə doktoru Rafiq Bayramov deyib.

 

Həkim ftiziator təəssüf hissi ilə bildirib ki, pandemiya şəraitində əksər insanlar qoruyucu maska istifadəsinin mahiyyətinin fərqinə varmırlar: “Müşahidə etmişəm ki, bəzi insanlar, sadəcə, cərimə olunmamaq üçün maska taxırlar. Diqqət etsək görərik ki, hazırda müxtəlif cür - rəngli, rəsmli maskalardan istifadə aktual mövzulardan biridir. Lakin qeyd etdiyim kimi, əksər vətəndaşların maska istifadəsində əsas məqsədi hazırki epidemioloji vəziyyətdə virusa yoluxmamaq olmadığına görə, adətən, qara maskalardan istifadə edirlər.  Ağ maskalardan istifadə olunmamasına səbəb odur ki, belə açıq rəngli maskalar çirklənən kimi tez görünür, həmçinin səliqəsiz görüntü yaradır. Qara və yaxud da başqa tünd rəngli maskalardan zövq üçün istifadə etmək başqa, bu səbəb isə tamam başqa. Bu məqsədlə atılan addım düzgün deyil və anlamaq lazımdır ki, maskalardan istifadənin məcburi olması heç də inzibati tənbeh məqsədli deyil, özümüzü və ətrafımızdakları qorumaqdan ötrüdür. Ona görə də, fikrimcə, ağ rəngli maskalardan istifadə ən doğrusudur. Çünki qara rəngli maskalar çirkli olduğu halda gözlə görünmür və insanlar uzun müddət istifadə etməyə davam edirlər”.

 

R. Bayramov qeyd edib ki, maskaların hansı rəngdə olmasının xüsusi bir önəmi yoxdur, yəni bu, sadəcə, zövq məsələsidir: “Maskanın qoruyuculuq xüsusiyyəti onun lifləri arasında olan məsamələrin ölçüsündən asılıdır. Bu məsafə nə qədər kiçik olarsa, maskalar o qədər qoruyucu hesab edilir. Maskalar içərisində ən çox qoruyuculuq qabilliyyəti olan N95 adlı qoruyucu maskalardır. Oksigeni orqanizmə qəbul etməkdə zərərinə gəldikdə isə, rəngindən asılı olmayaraq hər birinin az ya daha çox olmaqla mənfi təsirləri mütləq var. Çünki maska istifadə etdiyimiz zaman biz verdiyimiz hava ilə təkrar nəfəs alırıq və karbon dioksidi yenidən uduruq. Bu baxımdan maskalardan istifadə təhlükəli hesab oluna bilər, lakin indiki epidemioloji vəziyyətdə başqa çarə yoxdur. Qorunmaq üçün əsas etməli olduğumuz işlərdən biri də məhz maska taxmaqdır”.

Tarix: 22 Fevral 2021, 18:10   
Xəbər lenti
Çox oxunanlar

Ən son xəbərləri səhifəmizdən də izləyin