"Prezident 4 saat davam edən mətbuat konfransında olduqca əhəmiyyətli tezislərlə çıxış etdi"

“Prezident İlham Əliyevin bu gün keçirdiyi mətbuat konfransında 44 günlük Vətən Müharibəsində Azərbaycanın qələbə qazanması və bundan sonrakı proseslərlə bağlı səsləndirdiyi fikirlər ən əhəmiyyətlilərdəndir”.

Bunu Pravda.az-a açıqlamasında Milli Məclisin deputatı Elman Nəsirov deyib.

E.Nəsirov xatırladıb ki, dünyanın nüfuzlu Kütləvi İnformasiya Vasitələrinin nümayəndələrinin də iştirak etdiyi mətbuat konfransı 4 saat davam edib: “Prezident konfrans zamanı olduqca mühüm məsələlərə münasibət bildirdi. Dövlət başçısı bildirdi ki, bu gün Ermənistanda revanşist qüvvələr hakimiyyətə gələrək əldə edilmiş razılaşmaların üstündən xətt çəkmək istəyirlər. Ən arzulanmaz məsələ odur ki, artıq Ermənistana dəstək göstərən dövlətlər var və həmin dövlətlər Ermənistanı silah-sursatla təmin edirlər. Onların məqsədi Ermənistan tərəfindən həmin silahları Azərbaycana qarşı istifadə etdirməkdir?! Prezidentimiz bu məqamda qeyd etdi ki, “dəmir yumruq” hər zaman yerindədir”.

Deputat hesab edir ki, indiki vəziyyətdə ilk növbədə yeganə variant əməkdaşlıq mühitinin formalaşmasıdır: “Azərbaycan tərəfi bununla bağlı altılıq əməkdaşlıq formatını Ermənistana da təklif edib. Həmçinin konfransda qeyd olundu ki, bu istiqamətdə müsbət dəyişikliklər baş verib və müəyyən addımlar atılmaqdadır. Bununla yanaşı, Ermənistanda revanşizm meylləri güclüdür. Ermənistanın hazırki siyasi vəziyyəti Azərbaycanın 1990-ci illərin əvvələrindəki vəziyyəti xatırladır. Ölkə xaos içərisində, üstəlik vətəndaş müharibəsi astasındadır və hər kəs bir-birinə düşmən kimi yanaşır, bir-birilərini xəyanətdə ittiham edirlər və sair”.

Deputat həmçinin Amerikanın Azərbaycana birbaşa dövlət yardımını yasaqlayan qərarları barədə də danışıb: “Cənab Prezident bildirdi ki, dəfələrlə Azərbaycana qarşı haqsız yanaşmalar olub. Azərbaycan torpaqlarının işğal altında olduğu vəziyyətdə ABŞ Konqresi Azərbaycana qarşı “Azadlığa Dəstək” aktına 907-ci qadağanı tətbiq edir. Bütün postsovet ölkələrinə iqtisadi yardım göstərilir, amma bizə qadağan tətbiq edilir. Sual yaranır ki, buna səbəb nədir? Guya biz Ermənistanı blokadada saxlayırıq. Anlamaq lazımdır ki, blokadada saxlamağımıza səbəb onların bizim torpaqlarımızı işğal altında saxlaması olub. Amma təbii olaraq bu səbəbi görmək istəmirdilər, özlərini görməzliyə vururdular. Biz ikili standartların nə olduğunu çox yaxşı bilirik. Cənab İlham Əliyev də söylədi ki, biz hələ bundan sonra da güclənəcəyik, hərbi və iqtisadi potensialımız artacaq, beləliklə Azərbaycanla revanşist mövqedən çıxış edən tərəflər bilməlidirlər ki, ölkəmizin “dəmir yumruğ”u hər zaman hazır vəziyyətdədir, onların başını bundan sonra da əzəcək. Sadəcə, izləyib nəticə çıxarmaq lazımdır”.

Nəzrin Cavid

Tarix: 26 Fevral 2021, 17:30

Xəbər lenti