Eldar Quliyev: "Fransada belə qadınlar küçədə dayanırlar"

“Bəlkə 50 dəfə Parisə gedib-gəlmişəm, birinci dəfə deyil. İnsanlar hər kəsi öz arşınları ilə ölçməsinlər. Müxtəlif cəmiyyətlərdə insanlarla görüşüb söhbətlər apara bilərik. Biz insan hüquqlarından, təlimdən-tərbiyədən danışırıq. Oğlum 10 il Fransada yaşayıb, diplomat kimi fəaliyyət göstərib. Bu səbəbdən də Fransaya tez-tez gedib gəlirik. İnsanlar necə düşünür ki, mənim oğlum, gəlinim, uşaqlarım orda ola-ola mən hansısa özümə yaraşmayan işlərlə məşğul ola bilərəm?!”

Bunu Pravda.az-a açıqlamasında ötən gün feministlərin aksiyası ilə bağlı verdiyi açıqlamaya aydınlıq gətirmək üçün Milli Məclisin deputatı Eldar Quliyev deyib.

Deputat bildirib: "Sadəcə olaraq nümunə ilə aksiyada iştirak edənlərə, bizim gəncliyə irad tutdum ki, bu şəkildə olmaz, doğru deyil, müsəlman dövlətiyik, biz ana-bacı, qeyrət məsələlərini hər zaman uca tutmuşuq. Biz beynəlxalq təşkilatların tədbirlərində iştirak edirik. Bizim o yaşımız deyil ki... İnsanlarla rastlaşırıq söhbət edirik. Bilmirlər ki, belə adamlar adətən küçədə dayanıb özləri yaxınlaşırlar?! Öyrənsinlər, gedib görsünlər ki Fransada belə qadınlar küçədə dayanırlar, yoxsa yox?! Mən heç bilmirdim xanım nə işlə məşğuldur. Sadəcə, mənə yaxınlaşdı, mən də normal xanım kimi gördüyüm üçün soruşmaq istədim. Həm tək də deyildim, yanımda 3-4 yoldaş var idi. Xanımla ingilis dilində danışdıq, fransızların demək olar ki, hamısı ingilis dilində çox yaxşı danışırlar. Küçədəki qeyd etdiyim qısa dialoqdan sonra sağollaşdıq, çıxıb getdim. Birincisi, mən mentalitet fərqinə diqqət çəkmək üçün belə bir nümunə gətirdim, ikincisi isə bilirsiz ki, Fransa ilə münasibətlərimizdə son dövrlər erməni məsələləri ilə əlaqədar olaraq həm parlamentlərarası, həm də diaspora səviyyəsində müəyyən qədər soyuqluq yaranıb. Həmçinin bu mənada izah vermək istədim ki, bu millətin mentaliteti də belədir”.

Eldar Quliyev martın 8-də bir qrup feministin aksiya keçirməsinə bir daha münasibət bildirib: “Bilmək istəyirəm ki, askiyaya qoşulan qızların hansı hüquqları pozulub? Söz azadlıqları var, istədikləri hər şeyi yazırlar, gəzib dolaşırlar. Kim istəyir başını bağlayır, kim istəyir açır. Yəni burada hansı məhdudlaşdırmadan söhbət gedə bilər? Yadınızdadırsa, təxminən 1 il bundan əvvəl də eyni plakatlarla aksiyaya çıxmışdılar. Nəzərə almaq lazımdır ki, bizim gənclərimiz, uşaqlarımız yetişir. Bu xanımlar nə istəyirlər, hansı tərəfdən öyrədilirlər, başa düşə bilmirəm. Allaha şükür, hamısı da universitet, kollec oxuyurlar. Plakatla çıxdıqlarına görə 10-15 gün saxlanılıb çıxırlar, sonra guya siyasi məhbus olurlar. Siyasət başqa şeydi, küçələrə çıxıb plakat saxlamaqla deyil. Biz o nəslin övladlarıyıq ki, bizim dövrdə belə şeylər olmayıb, bundan sonra da olmasını istəmirik”.

Qeyd: E.Quliyevin martın 9-da verdiyi açıqlama qalmaqala səbəb olub. Deputat bildirmişdi ki, Fransada bir xanımla söhbətləşərkən xanım deyib ki, ailəlidir, müəllim işləyir: "Soruşdum ki, bəs burda neynirsən? Dedi, həftəsonları pul qazanmaq üçün gəlirəm. Yəni oralarda bu mövzular artıq adi hal kimi qəbul edilir. Bir daha təkrar edirəm, Azərbaycan qızlarının isməti bizim üçün çox önəmlidir”.

Tarix: 10 Mart 2021, 11:16

Xəbər lenti