Aslan İsmayılov: "Vətən Müharibəsindəki qələbədən sonra hər şey bitmiş kimi davranırıq"

Azərbaycanda hər şey kampaniya xarakteri daşıyır, o cümlədən müharibə də. Vətən Müharibəsindəki qələbədən sonra sanki yenə hər şey bitmiş kimi davranırıq. Qonşularımız isə acı məğlubiyyətdən sonra daha aktiv işləməyə başlayıblar. Erməni tulası Zatulin Lazaryev Klubu adı altında erməni, rus dövlət xadimləri, siyasi, ictimai fəallarla konfranslar keçirir, biz isə susuruq. Ümumiyyətlə bu tək azərbaycanlıların yox, bütün müsəlman aləminin və türk dünyasının xüsusiyyətidir. 1915-ci ildən sonra da türklər özlərini arxayınlaşdırıb eyforiyada yaşadılar, ermənilər isə bu müddət ərzində dünyaya türkləri vəhşi, özlərini isə mədəni, məzlum millət kimi tanıtdılar. Biz də bu gün eyni yolu gedirik.

Bu gün dünyanın hansı tanınmış elm ocağına baş vursanız, orada hansısa erməninin müəllim işlədiyini, yaxud doktorluq dissertasiyası yazdığını şahidi olacaqsınız, çünki erməni hakimiyyəti, diasporası onların hər birini nəzarətdə saxlayır, əlaqə yaradır və həm maddi, həm də digər köməklikləri edir. Bu gün Harvard, Stanford, Yale, Columbia, Berkley, Oxford və digər tanınmış universitetlərdə onlarla, yüzlərlə erməni ya dərs deyir, yaxud doktorluq dissertasiyası müdafiə edir. Məhz bu tipli insanlar dünyada rəy formalaşdırırlar. Hər bir dərs deyən, yaxud elmi iş yazan erməni Qarabağa heç bir aidiyyatı olmayan mövzuda da dolayısı ilə bu problemi özləri istədikləri kimi təqdim edirlər. Dəniz hüququndan, yaxud ekologiyadan dərs deyən, yaxud müdafiə edən erməni hökmən qeyd edir ki, Xəzərdə ekologiya çox çirklidir, çünki Azərbaycan neft istehsalatı zamanı nefti Xəzərə axıdır və neftdən qazanılmış pullarla ermənilərə məxsus olan Dağlıq Qarabağda etnik təmizləmə aparırlar, yaxud mövzu rəqəmsal texnologiyadan olanda qeyd edirlər ki, türklər öz PUA-ları ilə Azərbaycana Dağlıq Qarabağı işğal etməyə kömək etdilər və s. və i.

Azərbaycanlılar ermənilərdən qat-qat savadlı və işgüzardılar, ancaq maddi, mənəvi dayaq olmadığından həmin elm ocaqlarında çox azdırlar və olanlarla da heç bir əlaqə yoxdur. Əslində əgər normal iş qurulsa, dünyanın tanınmış elm ocaqlarına qəbul olanlara, yaxud orada elmi iş müdafiə edənlərə maddi dəstək olsa əminəm ki, azərbaycanlılar dünyanın aparıcı elm ocaqlarında ermənilərdən çox olarlar. Özüm dəfələrlə şahidi olmuşam ki, bir çox azərbaycanlılar tanınmış universitetlərə qəbul olsalar da təhsil haqqının yüksək olmasından daha ucuz ödəmələr olan universitetləri seçməyə məcbur olublar, yaxud ümumiyyətlə ölkəni tərk edə bilməyiblər. Özüm imkanlarım çərçivəsində bir çox azərbaycanlıların Vaşinqton, Strasburq və digər universitetlərə qəbul olunmasına kömək edən zaman bu hadisələrin canlı şahidi olmuşam. Başqa bir problem isə elə universitetlərdə təhsil alan gənclərimizlə heç bir əlaqənin qurulmaması, onlara hansısa dəstəyin olmamasındadır. Bir neçə il bundan əvvəl oğlumdan Harvardda 29 yaşında elmi araşdırma, tədris aparan həmyerlimiz Fedik Rəhimov haqqında eşitdim. Onunla əlaqə yaratdım və toyunun olacağını bildikdə Qusarda toyunda iştirak etdim. Həmin məclisdə məndən başqa tanıdıqlarımdan, yaxud rayonun vəzifəli şəxslərindən heç kimi görmədim. Ancaq mənim zəngimdən sonra bir neçə nəfər yerli vəzifəlilərdən toya gələnlər oldu. Elə oradaca öyrəndim ki, dəvətimlə gələnlərdən bir vəzifəli bu ailə ilə yaxın qohum olsa da Fedikin belə gənc yaşlarında professor olması bir yana, heç harada oxumasından belə xəbəri yoxdur. Bizim həmin toyda iştirakımızın Fedikə və onun valideynlərinə hansı xoş təəssürat bağışladığını isə təsəvvür etmək belə çətindir. Məhz buna görə ikinci dəfə söz istəyib dedim ki, arzu edirəm ki, gələn dəfə Fedik Vətəninə gələndə ölkənin ən ali vəzifəli şəxsləri onu Bakıda Hava Limanında qarşılasınlar.

Bax belə çox bəsit hallara görə görə qəbul etməliyik ki, biz erməınilərdən geri qalırıq və qalacağıq. Ona görə də yeni Təhsil naziri Emin Əmrullayevdən, Diaspora Komitəsinin sədri Fuad Muradovdan hansısa bir strategiyaya uyğun bu işlərin nizama salınmasını və bu sahədə yanaşmaya köklü dəyişikliklər edilməsini xahiş edirəm. Nə qədər ki, insan resursundan doğru-düzgün istifadə etməyəcəyik xarici təbliğata xərclənən milyardların heç bir effekti olmayacaq.

Aslan İsmayılov

Hüquqşünas