“ATƏT-in sədri üçtərəfli sazişdən irəli gələn məsələlərin həlli ilə bağlı proseslərə qoşulacaq” - ŞƏRH

"Reallıq öz sözünü deyəcək, real baxış qalib gələcək. Nəticə etibarilə, ATƏT-in sədri və özü əməli işlərə, yəni üçtərəfli sazişdən irəli gələn məsələlərin həlli ilə bağlı proseslərə qoşulacaq. Bu sazişdə isə, bildiyimiz kimi, statusla bağlı heç bir şey yoxdur".

Bunu Pravda.az-a açıqlamasında politoloq İlqar Vəlizadə deyib.

Rusiya çalışır ki, tərəfləri ortaq məxrəcə gətirsin - İlqar Vəlizadə

Politoloq bildirib ki, son ayların reallıqları onu göstərir ki, ATƏT-in Minsk qrupu artıq öz effektivliyini itirib, nəticədə bütün əsas razılaşmalar üçtərəfli formatda əldə edilir: "Bildiyimiz kimi, Azərbaycan və Ermənistan ATƏT-in üzvləridir və Dağlıq Qarabağ Ermənistan-Azərbaycan münaqişəsi ilk əvvəl məhz ATƏT çərçivəsində həll olunmalı idi və bu çərçivədə danışıqlar gedirdi. Əsas qurum burada Minsk qrupu təyin olunmuşdu. Beləliklə, bu problemin çözülməsi bu və ya digər şəkildə ATƏT-lə bağlıdır. Yəni 44 günlük müharibəyə qədər illər uzunu belə idi. Hər-halda son dövrlər bütün əsas razılaşmalar Azərbaycan-Ermənistan-Rusiya formatında əldə edilir. Bu, ATƏT-nin mandatından kənarda olan vəziyyət olsa da, reallıqdır. Düşünürəm ki, Prezident İlham Əliyev, ümumiyyətlə Azərbaycan rəsmiləri onlara real vəziyyəti izah ediblər. İndi ATƏT bu real vəziyyətdən çıxış etməlidir".

İlqar Vəlizadə indiki halda ATƏT-nin Azərbaycan üçün hansı məsələlərdə faydalı ola biləcəyi barədə danışıb: "Bu razılaşma ilə bağlı hazırda müəyyən işlər aparılır: deblokada, yəni yolların açılması və yeni iqtisadi münasibətlərin qurulması ilə bağlı məsələlər. Bu məsələlərlə bağlı üçtərəfli komissiya yaradılıb və komissiya konkret təkliflər hazırlayır. Fikrimcə, ATƏT əsasən bu mərhələdə müəyyən rol oynaya bilər, yalnız o şərtlə ki, iradəli olsun. ATƏT prosesin reallıqlarını nəzərə alaraq bu işə qoşulsa, sədrin səfəri bu məsələdə bizim xeyrimizə ola bilər. Yox, əgər köhnə yanaşmalar yenə də üstünlük təşkil etsə, Ermənistanın təkidi ilə status məsələsi gündəmə gətirilsə, əlbəttə ki, bu səfərin heç bir səmərəsi olmayacaq və ATƏT-in fəaliyyəti ötən 30 il ərzində fayda vermədiyi kimi yenə də faydasız qalacaq. Bu prizmadan yanaşsaq, düşünürəm ki, reallıq öz sözünü deyəcək, real baxış qalib gələcək. Nəticə etibarilə, ATƏT-nin sədri və özü əməli işlərə, yəni üçtərəfli sazişdən irəli gələn məsələlərin həlli ilə bağlı proseslərə qoşulacaq. Bu sazişdə isə, bildiyimiz kimi, statusla bağlı heç bir şey yoxdur. Təkrar edirəm, məhz bu səbəbdən ATƏT Dağlıq Qarabağın statusu məsələsi ilə bağlı deyil, real vəziyyətlə məşğul olmalıdır. Yəqin ki, cari sədr bununla bağlı kifayət qədər məlumat sahibidir və növbəti aylarda bu istiqamətdə müəyyən təkliflər verər".

Qeyd: Bu gün ATƏT-in hazırkı sədri, İsveçin xarici işlər naziri Ann Linde Azərbaycana səfər edəcək. Linde səfər çərçivəsində Azərbaycan Prezidenti İlham Əliyevlə görüşüb. Xarici işlər naziri Ceyhun Bayramov və Baş nazir Əli Əsədovla görüşəcək.

Nəzrin Cavid

Tarix: 15 Mart 2021, 09:46

Xəbər lenti