“Qarşıya qoyulan bütün layihələrin reallaşdırılması üçün siyasi iradəmiz və maliyyə imkanlarımız var” - Deputat

“Qarşıya qoyulan bütün layihələrin reallaşdırılması üçün siyasi iradəmiz və maliyyə imkanlarımız var. Eyni zamanda biz prisipiallıq və qətiyyətə malikik. Şuşada keçirilən musiqi festivalı da bir daha Azərbaycan dövlətinin əzmini ortaya qoydu və qarşıda dayanan digər məsələlər də bu əzm nəticəsində öz müsbət həllini tapacaq”.

Bunu Pravda.az-a açıqlamasında Milli Məclisin deputatı Elman Nəsirov deyib.

Deputat bildirib ki, işğaldan azad edilən torpaqlarda ən müasir standartlara uyğun bərpa işlərinin həyata keçirilməsi Azərbaycanın gücünün və qüdrətinin təsdiqidir: “Əvvəla onu qeyd edim ki, Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi altında dövlətimiz təkcə hərbi cəbhədə deyil, eyni zamanda diplomatik cəbhədə və nəhayət Azərbaycanın mədəniyyət paytaxtı sayılan Şuşa şəhərində “Xarıbülbül” musiqi festivalına ev sahibliyi etməklə musiqi cəbhəsində də tarixi qələbəyə imza atıb. Yəni biz bu üçtərəfli qələbənin müəllifiyik. Bu qələbənin memarları Azərbaycan Prezidenti, Azərbaycan ordusu və Azərbaycan xalqıdır. İndi isə qarşımızda yeni vəzifələr durur. Bunlardan birincisi işğaldan azad olunmuş ərazilərimizin bərpası və yenidən qurulması siyasətdir. Hazırda bu istiqamətdə çox ciddi işlər görülməkdədir. Xüsusilə də tarixi, mədəni və dini abidələrimizin bərpası ilə bağlı nəhəng miqyaslı işlərə başlanılıb. Məlum olduğu kimi, erməni barbarları işğal etdikləri Azərbaycan torpaqlarında 67 məscidi məhv ediblər, bütövlükdə ölkəmizin tarixi-mədəni irsinə böyük zərbə vurublar”.

Elman Nəsirov vurğulayıb ki, Prezident İlham Əliyev, xüsusilə Birinci vitse-prezident Mehriban Əliyevanın rəhbərliyi altında Heydər Əliyev Fondu bu istiqamətdə çox ciddi işlərə start verib: “Artıq Şuşada məscidlərin bərpası istiqamətində işlər görülüb və Şuşanın simvoluna çevrilə biləcək böyük bir məscidin əsası qoyulub. Onun dizaynı göz oxşayır və böyük siyasi mənaya malikdir. Orada 8 və 11 işarələrindən istifadə olunub. Minarələrin 11 rəqəmini ifadə etməsi noyabr ayını, 8 rəqəmi isə həm Şuşanın sonsuz olaraq Azərbaycana məxsusluğunu, həm də noyabrın 8-ni işarə edir. İnfrastruktur layihələri deyərkən ilk yada düşən isə Zəngəzur dəhlizi məsələsidir. Bu, Azərbaycan üçün strateji əhəmiyyət kəsb edir və dövlət bu məsələdə israrlıdır. Beləliklə, Zəngəzur dəhlizinin açılması mütləq baş tutacaq və Azərbaycan ilə Naxçıvan arasında rabitə yaradılacaq. Yeri gəlmişkən qeyd edim ki, dəhlizin əhəmiyyəti o qədər böyükdür ki, layihənin reallaşmasını uzaq Çində də səbirsizliklə gözləyirlər. Əsas odur ki, bütün bunların reallaşdırılması üçün siyasi iradə və maliyyə imkanları var”.

Nəzrin Cavid

Tarix: 16 May 2021, 15:06

Xəbər lenti