“Prezident çalışır ki, biz tez bir zamanda işğaldan azad olunmuş ərazilərdə infrastruktur yaradılsın və insanlar köçürülsün”

"Şuşada infrastrukturun tam mövcud olduğunu demək olmaz. Çünki nəzərə almaq lazımdır ki, 30 ilə yaxın müddətdə ermənilər Şuşada heç bir iş görməyiblər, əksinə şəhəri ciddi şəkildə dağıdıblar və nəticədə bir çox binalar yararsız vəziyyətdədir".

Bunu Pravda.az-a açıqlamasında Milli Məclisin deputatı Ceyhun Məmmədov deyib.

Deputat bildirib ki, Qarabağa qayıdış prosesində elə ən maraqlı tərəf dövlətin özüdür: "Cənab Prezident çalışır ki, biz tez bir zamanda işğaldan azad olunmuş ərazilərdə infrastruktur yaradılsın və insanlar köçürülsün. Bunun artıq təməli qoyulub. Məsələn, biz Şuşaya getmişdik, şahidi olduq ki, şəhər, artıq elektrik enerjisi ilə təmin olunub, torpaq yol çəkilib və s. Amma bütün bunlarla yanaşı, demək olmaz ki, Şuşada infrastruktur tam mövcuddur. Çünki nəzərə almaq lazımdır ki, 30 ilə yaxın müddətdə ermənilər Şuşada heç bir iş görməyiblər, əksinə şəhəri ciddi şəkildə dağıdıblar və nəticədə bir çox binalar yararsız vəziyyətdədir. Əsas odur ki, köç məsələsi ilə bağlı bütün rayonlarımız da ciddi işlər - əhalinin sayının dəqiqləşdirilməsi, binaların inventarlaşdırılması, yaşayış binalarının təmiri və bərpası kimi işlər görülür. Bu cür işlərə təhlükəsizlik tədbirləri də daxildir. Əhali bilməlidir ki, dövlət bunun üçün çalışır və biz bir müddət səbrli olmalıyıq ki, proses uğurlu şəkildə həyata keçirilsin. Bildiyimiz kimi, Şuşaya artıq yeni nümayəndə də təyin edilib. Proses boyunca da əhali mərhələli şəkildə şəhərə köç edə biləcək".

C.Məmmədov əlavə edib ki, köçürülmə prosesi asan proses deyil: "Əhali köçürülərkən orada məktəblər, bağçalar, xəstəxanalar, köç edən insanların işlə təmin olunması kimi bir sıra vacib məsələlər nəzərə alınmalıdır. Yəni məsələyə kompleks yanaşma vacibdir. Baş plan olmadan, müvafiq infrastruktur tam yaradılmadan kütləvi köçü həyata keçirə bilmərik. Hazırda qaçqınlar və məcburi köçkünlər Bakıda və digər şəhərlərdə dövlətin onlar üçün yaratdığı şəraitdə yaşayırlar. Əgər hazırkı şəraitləri Şuşada və digər işğaldan azad edilmiş torpaqlarda hələ də tam yaradılmayıbsa, insanları ora köçürə bilmərik. Əlavə olaraq, nəzərə almaq lazımdır ki, Qarabağla bağlı bir sıra məlumatlar məhz ermənilər tərəfindən dövriyyəyə buraxılır. Hesab edirəm ki, Xankəndiyə ermənilərin yerləşdirilməsi kimi informasiyalar məqsədli olaraq tirajlanır. Ona görə də, bu kimi məlumatları oxuyarkən maksimum diqqətli olmalı və bilməliyik ki, bütün informasiyalar heç də bizə təqdim olunan formada deyil".

Nəzrin Cavid

Tarix: 19 May 2021, 16:27

Xəbər lenti