AQTA-nın yanlış qida təhlükəsizliyi siyasəti: "Bunun qarşısı təcili alınmalıdır"

“AQTA-nın səhvlərindən biri ekspertiza və sertifikat verilməsinin bir arada həyata keçirilməsidir”.

Pravda.az-ın xəbərinə görə, bu sözləri Qida Təhlükəsizliyi Agentliyinin (AQTA) fəaliyyətinə münasibət bildirən Azad İstehlakçılar Birliyinin sədri Eyyub Hüseynov deyib.

AİB sədri bildirib ki, AQTA məqsədlərinə çatmaq üçün xeyli iş görsə də, bu, yetərli deyil, ona görə də qurumun fəaliyyətini qənaətbəşx hesab etmək olmaz:

“AQTA-nın əsasnaməsindən məlum olur ki, qarşıya son dərəcədə böyük strateji məqsədlər qoyulub. Bu məqsədlərdən biri qida təhlükəsizliyinin təmin olunması ilə yanaşı, Azərbaycan mallarının xarici ölkələrə ixrac olunmasıdır. AQTA-nın gördüyü işlər 2 ildən sonra nəticə verməyə başlayacaq. Məsələn, heyvan ətlərinin təhlükəsizliyinin təmin olunması və küçə kəsiminin yığışdırılmasının əsas yolu heyvanların identifikasiya olunmasından keçir. Yəni heyvan dünyaya gələndən sonra onun pasportu olmalıdır. Lakin ölkədəki heyvanların heç 1 faizi identifikasiya olunmayıb. Ona görə küçə kəsimi hələ də davam edir. Əslində, kəsim sexlərinin yaradılması AQTA-ya aid olan mövzu deyil. Qurum bu məsələdə sadəcə konsultasiya işləri apara bilər”.

Eyyub Hüseynov qeyd edib ki, AQTA-nın fəaliyyətinin qənaətbəxş olması üçün rayon icra hakimiyyətləri, vətəndaş cəmiyyətləri və bələdiyyələrin sinxron fəaliyyətinə ehtiyac var:

“AQTA-nın səhvlərindən biri ekspertiza və sertifikat verilməsinin bir arada həyata keçirilməsidir. Halbuki ekspertiza orqanı ayrı fəaliyyət göstərməlidir. Setifikat verən orqanla yoxlayan orqan eyni yerdə olmamalıdır. AQTA mallara həm serifikat verir, həm də yoxlayır. Bu necə ola bilər?! Bir sözlə, AQTA-nın qarşıya qoyduğu hədəflərə çatması üçün vaxt lazımdır.

Ümumilikdə, qida zəncirində iştirak edən bütün hüquqi və fiziki şəxslər AQTA-da reyestrə daxil olmalı və nəzarət altında saxlanmalıdır. Ancaq bu gün reallıq tamamilə başqadır. Supermarketlər və qidanın təhlükəsizliyinə nəzarət edən bəzi orqanlar vaxtı keçmiş qidaların insanların masasına çatmasına səbəb olurlar. Bu vəziyyətin qarşısını almaq üçün müasir proqramın tərtibi zəruridir. Həmin proqram vasitəsilə vaxtı keçmiş qidalar avtomatik olaraq qeydə alınır. Nəticədə AQTA hansı mağazada vaxtı keçmiş malların satıldığını öyrənəcək. AQTA və ya supermarketlərin təsiri ilə vaxtı keçmiş mallar satışdan çıxarılaraq istehsalçılara çatdırılır. İstehsalçılar isə etiketi dəyişib, məhsulu yenidən satışa çıxarırlar. Hazırda qida təhlükəsizliyi ilə bağlı vəziyyət ürəkaçan deyil və bunun qarşısı təcili alınmalıdır”.

Yenicag.az

Tarix: 3 İyun 2021, 19:30

Xəbər lenti