"Olympus Park"dan qəribə addım: İdman klubunu sökdüyünü etiraf edirdi, indi isə 1 milyon istəyir

Bakıda idmançıların klubunu gecə ilə sökən tikinti şirkəti olduqca absurd bir addım atıb. İdman klubunu sökdüyünü dəfələrlə etiraf edən şirkət bu dəfə məhkəməyə müraciət edərək bildirib ki, klubu idmançılar özü söküb.

Pravda.az xəbər verir ki, “Olympus Park” tikinti şirkəti Xətai rayonunda "Lider" idman klubunu söküb. Şirkətin bu qanunsuz hərəkəti ilə bağlı dəfələrlə yerli mətbuatda məlumatlar dərc edilib.

Şirkət klubun rəhbəri İlham Sərdarovla dəfələrlə görüşdüyünü, lakin hələ də kompensasiya ilə bağlı razılığa gələ bilmədiklərini deyirdi.

Mövzu ilə bağlı təqdim olunan reportajda özünü şirkətin icraçı direktoru kimi təqdim edən Mehdi Bəbirov da məsələ ilə bağlı danışaraq demişdi ki, idmançıların klubu məhz tikinti qəzası nəticəsində dağılıb. M.Bəbirov onu da qeyd etmişdi ki, İlham Sərdarovla danışıqlar apararaq məsələnin həllinə çalışırlar.

Amma indi işin çox ilginc və absurd tərəfi üzə çıxıb. Bütün yerli mətbuata açıqlamasında idman klubunu sökdüyünü etiraf edən şirkət Xətai Rayon Məhkəməsinə iddia ilə müraciət edib.

Rəsmi olaraq “RS Construction” MMC olaraq qeyd edilən şirkət (Olympus Park) iddia ərizəsində göstərir ki, idman klubunu İlham Sərdarov özü söküb. Əlavə olaraq şirkət İlham Sərdarovdan 1 milyon manat da təzminat istəyir. Bu təminatı da belə əsaslandırır ki, İlham Rəhimov mətbuata verdiyi açıqlamalarla şirkətin işgüzar nüfuzuna xələl gətiribmiş.

Bundan sonra İlham Rəhimov Xətai Rayon Məhkəməsinə qarşılıqlı iddia təqdim edib. İlham Sərdarov iddia ərizəsində göstərir ki, sökülən qeyri-yaşayış sahəsi mülkiyyət hüquqi ilə ona məxsusdur.

"Mənə məxsus “Lider İdman Klubu”nun dağıdılması nəticəsində mülkiyyətimdə tək dolanışıq yeri olan obyektimdən kommersiya məqsədi ilə istifadə etməkdən məhrum edilmişəm.Həmçinin obyekt sökülərkən içərisində avadanlıqlar, bahalı idman əşyaları da məhv edilib. Mənə dəymiş maddi və mənəvi ziyan da ödənilməlidir. Mülkiyyətimdə olan qeyri-yaşayış sahəsi əvvəlki vəziyyətinə qaytarılmalı, dağıdılmış obyektimdə olan əşya və avadanlıqlar talanmaqla, məhv edilməklə vurulmuş maddi ziyana görə 500 min manat, mənəvi ziyana görə bir milyon manat məbləğində kompensasiya ödənilməsi öhdəliyinin cavabdeh “RS Construction” MMC -nin üzərinə qoyulması barədə qətnamə qəbul edilməlidir",-deyə İlham Sərdarov iddia ərizəsində göstərir.

Xatırladaq ki, bir müddət əvvəl də Fövqəladə Hallar Nazirliyi şirkətin tikinti işlərini dayandırmışdı. Qeyd edək ki, adı çəkilən şirkət İlham Sərdarovun razılığı olmadan onun idman klubunu içərisində əşyaları olmaqla gecə yarısı sökmüşdü. İlham Sərdarov bu cinayət hadisəsi ilə bağlı bir ildən çoxdur rəsmi qurumlara və məhkəməyə müraciət edib.

Xatırladaq edək ki, “Olympus Park” tikinti şirkətinin adı daha əvvəl də bu cür problemlərdə çəkilib. Vətəndaşın razılığı olmadan evlər sökülüb, kompensasiya ilə razılaşmayan vətəndaşlarla narazılıqlar yaranıb.

Şirkət isə vətəndaşların evinin, əmlakının qanunsuz olaraq sökülməsini tikinti qəzası kimi şərh edir.

Musavat.com

Tarix: 9 İyul 2021, 18:20

Xəbər lenti