“Azərbaycanla Avropa İttifaqı arasında anlaşılmaz durumun olmadığını açıq formada görmək mümkündür” - RƏY

“İyulun 18-də Avropa İttifaqı Şurasının Prezidenti Şarl Mişelin Azərbaycana səfəri baş tutub. Səfər daxilində ölkə rəhbərliyi ilə keçirilən görüşü və görüşdən sonra baş tutmuş birgə mətbuat konfransını təhlil etdikdə Azərbaycanla Avropa İttifaqı arasında anlaşılmaz durumun olmadığını açıq formada görmək mümkündür”.

Pravda.az-ın xəbərinə görə, bunu Gələcək Azərbaycan Partiyasının sədri Ağasif Şakiroğlu deyib.

A.Şakiroğlu bildirib ki, bu görüşlər ərəfəsində Avropa İttifaqının Azərbaycana 150 milyon avro, Ermənistana 2,6 milyard avro maddi yardım ayırması da diqqət çəkib: “Bir çoxları bu hadisəni doğru təhlil etmədən, bir çoxları isə qəsdən, bilərəkdən süni ajotaj yaratmağa cəhd etdi. Hətta bunu “ikili standartlarla” da əlaqələndirməkdən çəkinmədilər… Bəzi qüvvələr Avropa İttifaqı ilə Azərbaycan arasında mövcud olan münasibətlərə xələl gətirmək üçün maksimum çalışdılar. Bu cəhd isə Avropa İttifaqı Şurasının Prezidenti Şarl Mişelin Prezident İlham Əliyevlə görüş keçirdiyi, Qarabağ həqiqətləri ilə tanış olduğu bir zamana təsadüf etdi… Əcaba, bu ara qarışdırmaq istəyənlərin heçmi ağlına gəlmədi ki, bu yardım hansı kriteryalar əsasında verilib? Məgər “bu ikili standartdır” deyənlər Azərbaycanın iqtisadi gücündən, valyuta rezervlərindən, dövlət gəlirlərindən və sairə iqtisadi imkanlardan həqiqətənmi bixəbərdirlər?! Həqiqətənmi anlamırlar ki, Azərbaycan bir dövlət olaraq yardım almaqdan daha çox başqalarına yardım edən bir dövlətə çevrilib?! İqtisadi göstəricilər, ölkənin dövlət büdcəsi, valyuta ehtiyatı Avropa İttifaqına Azərbaycana yardım etməmək üçün kifayər qədər əsas verir. Yardıma ehtiyacı olan, borc içində batan, məhvə məhkum olmuş, iqtisadiyyatı dağılmış və dünyadan yardım diləyən Ermənistanla Azərbaycanı bir tərəziyə qoymaq nə dərəcədə doğrudur? Anlamaq heç də çətin deyil ki, Avropa İttifaqının Azərbaycana ayırdığı 150 milyon avroluq yardım simvolik xarakter daşıyıb və dövlətimizin bu yardıma heç bir ehtiyacı belə yoxdur… Burada heç kim süni qalmaqal, ajiotaj yaratmağa çalışmasın. Hər kəs dövlətinin gücünü, potensialını doğru dəyərləndirməli, pozuculuq niyyətlərindən uzaq olmalıdır! Onu da anlamaq lazımdır ki, Ermənistana edilmiş məlum yardım həm də Ermənistanı Rusiya Federasiyasının təsirindən, asılığından tamlıqla xilas etməyə hesablanmış bir addımdır. Hansı ki, bu da öz növbəsində dövlətimizin, xalqımızın ümumi mənafeyinə uyğun bir prosesdir. “Rusbaş”ların narahatlığını, “ikili standart” nağıllarını və Azərbaycanla Qərbi üz-üzə qaymaq cəhdini tam anlayıram. Bunu da deməyi özümə borc bilirəm ki, hər kəs ayıq sayıq olmalı, rusbaşların başlatdığı məlum “xor”a qoşulmamalıdır. Belə olacağı halda bu cəhdlər uğursuzluğa məhkumdur”.

Tarix: 19 İyul 2021, 15:08

Xəbər lenti