Tanınmış hüquqşünas Ehram Məcidov və Fuad Muradovla bağlı DTX və DİN-ə müraciət etdi

"Əminəm ki, bu gedişlə yaxın zamanlarda ölkədə artıq reket dəstələri peyda olacaq. Ola bilsin, əvvəlki dəstələr kimi cinayət zamanı silah-sursatdan istifadə etməsinlər və onu sosial şəbəkədəki cinayətləri ilə əvəzləsinlər. Bu gedişlə buna əsla şübhəm yoxdur. Bu günə qədər dediklərimdə heç vaxt səhv etməmişəm. Yadınızdadırsa, Əli Həsənov ayrı-ayrı şəxslərə qarşı ləyaqətsiz davranışlara rəvac verəndə, yazmışdım ki, bir gün özü bu əməllərin qurbanı olacaq. İndi hamınız tək Əli Həsənovun yox, ona züy tutanların da məruz qaldıqları əxlaqsızlıqları görürsünüz".

Pravda.az xəbər verir ki, bu fikirləri tanınmış hüquqşünas Aslan İsmayılov bildirib.

A.İsmayılov bildirib ki, yeni reket dəstələrini himayə edən, onların ayrı-ayrı şəxslərə qarşı əxlaqsız davranışlarını təqdir edən və mükafatlandıran hakimiyyətdə təmsil olunan bəzi qruplardır: "Belələri vəzifələrə çəkilir, törətdikləri cinayətlərə görə məsuliyyətə cəlb edilməsinin qarşısı alınır. Bunlardan biri, şəhid valideynlərini, müharibə veteranları təşkilatlarının fəallarını daim təhqir edib cəzasız qalan, avtomat ilə bütün ölkəyə şəkillərini nümayiş etdirən Fuad Muradov haqqında bu günlərdə şəhid analarının videosunu paylaşıb DTX və DİN-ə müraciət etsəm də, bu günə qədər heç bir cavab yoxdur. Bu gün bu dəstənin daha bir üzvü idmançı Ehram Məcidov haqqında məlumat verim. 1979-cu il təvəllüdlü E.Məcidov qayınatası, 1953-cü il təvəllüdlü Bəhruz Dilbazini sözün əsl mənsında şil-küt etmişdi və buna görə prokuror ona 8 il müddətinə azadlıqdan məhrum etmə cəzası istədi. O, Cinayət Məcəlləsinin 126.2.3-cü (xüsusi amansızlıqla, zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə) və 126.2.4-cü (qəsdən sağlamlığa ağır zərər vurma; ümumi təhlükəli üsulla, xuliqanlıq niyyətilə törədildikdə) və 228-ci (soyuq silah gəzdirmə) maddələri ilə məhkum edilsə də ona himayədarlarının səyi nəticəsində 2019-cu il iyunun 25-də Bakı Ağır Cinayətlər Məhkəməsinin hökmü ilə 3 il 6 ay müddətinə azadlıqdan məhrum edilmə cəzası verildi və heç 1 il keçməmiş yenə himayədarlarının səyi nəticəsində həbsdən azad edildi. Bu gün F.Muradovla bir yerdə yenə hamıya güc nümayiş etdirir. Adlarını çəkdiklərimin varlığı ilə yoxluğunun mənim üçün heç bir əhəmiyyəti yoxdur və onlara vaxt itirmək istəməzdim. Ancaq bu təhlükəli tendensiyanın qarşısı alınmasa bizi çox pis günlər gözləyir. Nəhayət ki, hamı anlamalıdır ki, cinayətkar cəzasını almalı və həbsdə yatmalıdır. Əgər bu cür tərbiyəsizlər cəzasız qalacaqlarsa, artıq söyüşlə danışmaq bir normaya çevriləcək və bizim milli adət-ənənələrimizdən əsər əlamət qalmayacaq.

Hüquqşünas Azərbaycan Respublikası Dövlət Təhlükəsizliyi Xidməti və Azərbaycan Respublikasının Daxili İşlər Nazirliyi rəhbərliyinə müraciət edib: "Bunlar bütün qanunsuzluqlarını adıçəkilən təşkilatların adları arxasında edirlər".

Tarix: 9 Sentyabr 2021, 15:56

Xəbər lenti