Hacı Qalibin narkoman adlandırdığı partiya sədri məhkəməyə müraciət edir: 3 milyonluq iddia

“Bu günədək Qalib Salahzadənin cəfəngiyyat fikirlərinə xüsusi bir münasibət bildirmək niyyətim olmayıb. Amma bu gün mətbuat səhifələrində onun səsləndirdiyi müəyyən fikirlərlə tanış oldum. O, Bakı Apellasiya məhkəməsinin 2010-cu ilin mart ayında vermiş olduğu qərarı, eyni zamanda Azərbaycan Respublikası adından Ali Məhkəmənin qəbul etdiyi məhkəmə qərarını, həmçinin Sabunçu rayon məhkəməsinin verdiyi qərarları “zakaz” adlandırıb. O, bu tip sərsəm açıqlamaları ilə Azərbaycan məhkəmə-hüquq sisteminə və Azərbaycan dövlətinin imicinə çox böyük zərbə vurmuş olub. Hesab edirəm ki, Azərbaycan məhkəmə-hüquq sistemi bu şəxsə qanun qarşısında yerini göstərməlidir. Bu fikirləri səsləndirən şəxs sıradan biri olsa üzərindən keçmək bəlkə də olardı. Lakin bu şəxs sabiq deputatdır. Eyni zamanda deputat Əliabbas Salahzadənin atasıdır… Qalib Salahzadə məlum sayaqlamasında Azərbaycan Parlamentinin ilk sədri, hörmətli Rəsul Quliyevi “vətən xaini”, məni isə “narkoman” adlandırıb. Hər iki ifadə qəbul edilməzdir”.

Bunu Pravda.az-a açıqlamasında Gələcək Azərbaycan Partiyasının sədri Ağasif Şakiroğlu deyib.

A.Şakiroğlu bildirib ki, “Vətən xaini” xüsusilə ağır ittihamdır: “Heç bir məhkəmə qərarı olmadan, heç bir istintaq hərəkəti aparılmadan ölkənin quruculuq prosesinə xüsusi tövhələr vermiş görkəmli ictimai-siyasi xadimi bu tip ağır cinayətdə ittiham etmək, ölkənin rəsmi dövlət qeydiyyatından keçmiş siyasi partiyalarından birinin rəhbəri olaraq məni “narkoman” adlandırmaq hesab edirəm ki, xüsusi ittiham qaydasında məhkəmə predmentidir. Burada şərəf və ləyaqətin alçaldılması, xüsusilə də ağır cinayətdə ittiham olduğu açıq-aydın görünür. Hesab edirəm ki, xüsusi ittiham qaydasında məhkəmə önündə Qalib Salahzadənin cavab vermək zamanı yetişib. Vəkillərimiz bu istiqamətdə zəruri addımları ən qısa zamanda atacaq. Xüsusi ittiham qaydası ilə yanaşı maddi və mənəvi zərərlə bağlı da 3 milyon manatlıq iddia qaldırmağı düşünürəm. Təbii ki, 3 milyonluq təzminatdan bizə 1 manat belə lazım deyil. Əgər məhkəmə iddiamızı təmin edərsə 3 milyonu qəpiyinədək şəhid və qazi ailələrinin sosial durumunun yaxşılaşdırılması məqsədilə yaradılmış “YAŞAT” Fonduna köçürülməsini məhkəmədən xahiş edəcəyik. İnsanın pulu çox olanda gərək ki, cızığından çıxmasın. Bu şəxs cızığından o qədər çıxıb ki, dövlətin məhkəmə-hüquq sistemini belə hədəf seçərək dövləti şantaj etmək yolu seçib. Hansısa mənə kimliyi məlum olmayan generalın sifarişi ilə (özü belə deyir) ona aid olmayan, mənə məxsus özəl mülkiyyətə basqın etdiyini bəyan edir… Və bu şəxs deputat atasıdır. Oğlu qanunverici hakimiyyətin nümayəndəsidir… Bu şəxs hələ də anlamır ki, Azərbaycan Respublikası adından verilmiş məhkəmə qərarı heç bir halda müzakirə predmeti ola bilməz. Qərar yalnız və yalnız icra edilə bilər”.

Tarix: 17 Sentyabr 2021, 13:21

Xəbər lenti