Elman Nəsirov: “Prezident beynəlxalq ictimaiyyətə bəyan etdi ki...”

"Ötən gün Prezident İlham Əliyev olduqca vacib mövzulara - həm ümumbəşəri bəla olan COVID-19 pandemiyası ilə mübarizə məsələlərinə, həm də Azərbaycan-Ermənistan münasibətlərinə toxunub. Hesab edirəm ki, Prezident BMT-nin müzakirələrindəki həmin nitqi ilə beynəlxalq ictimaiyyət üçün bir sıra məsələlərə aydınlıq gətirdi".

Bunu Pravda.az-a açıqlamasında Milli Məclisin deputatı Elman Nəsirov deyib.

Parlament üzvü bildirib ki, Azərbaycan Respublikasının Prezidenti İlham Əliyev sentyabrın 23-də BMT-nin Baş Asambleyasının ümumi müzakirələrində iştirak edərək çıxış edib və müzakirələr zamanı olduqca əhəmiyyətli mövzuları ictimaiyyətin diqqətinə çatdırıb: "Azərbaycan xüsusilə də ümumbəşəri bəla olan koronavirus pandemiyası ilə mübarizədə verdiyi töhfələr diqqətə çatdırılıb və Prezident vurğulayıb ki, dövlətimiz bu prosesdə həm milli və regional, həm də beynəlxalq səviyyədə iştirak edib. Xüsusilə də may ayında Qoşulmama Hərəkatının sədri kimi Azərbaycan unikal bir təkliflə çıxıb edib, pandemiyaya qarşı mübarizədə beynəlxalq səylərin birləşdirilməsi məqsədilə BMT Baş Assambleyasının xüsusi sessiyasının keçirilməsi olub. Ötən ilin dekabr ayında baş tutan bu sessiya beynəlxalq səylərin birləşdirilməsi baxımından mühüm idi. Həmçinin Prezident qeyd etdi ki, ölkəmiz koronavirusla mübarizə üçün Ümumdünya Səhiyyə Təşkilatına 10 milyon dollar civarında vəsait ayırıb və 30-dan çox dövlətə maliyyə dəstəyi göstərib, o cümlədən bir sıra ölkələrə peyvənd hədiyyə edib. Bundan başqa, Prezident dünyada vaksinlərin bölüşdürülməsi ədalətlilik prinsipinin qorunması məsələsini diqqətə çatdırıb. Onu da qeyd etmək lazımdır ki, Azərbaycan koronavirus əleyhinə istifadə edilən vaksinlərin dünya ölkələri arasında ədalətli paylanmasını təmin etmək məqsədilə BMT-də xüsusi qətnamənin qəbul edilməsinə nail olub".

Deputat, həmçinin vurğulayıb ki, Prezident İlham Əliyevin nitqində regional sülh və təhlükəsizlik məsələləri də yer alıb: "Qeyd olundu ki, Azərbaycan BMT Təhlükəsizlik Şurasının 27 ildə icra edə bilmədiyi qətnamələri təkbaşına icra etdi. Prezident bildirdi ki, biz Vətən müharibəsində 300-dən çox yaşayış məntəqəsinin işğaldan azad olunmasına nail olduq və zəfər qazandıq. Eyni zamanda, qeyd etdi ki, əgər BMT və ATƏT-in Minsk Qrupu qətiyyətli mövqe ortaya qoymuş olsaydı, regionda sülh çoxdan bərqərar olardı. Həmçinin bir sıra ifadələrin düzgün işlədilməsinin zəruriliyi vurğulandı. Xüsusilə qeyd olundu ki, bu ilin iyulun 7-də Qarabağ və Şərqi Zəngəzur iqtisadi rayonları yaradılıb. Ona görə də, termin və ifadələrdən siyasi manipulyasiya elementi kimi istifadə etmək olmaz. Prezident beynəlxalq ictimaiyyətə bəyan etdi ki, Azərbaycanın inzibati əraziləri barədə danışarkən yeni reallıqları nəzərə almaq lazımdır".

Nəzrin Cavid

Tarix: 24 Sentyabr 2021, 15:45

Xəbər lenti