Deputat: “Dindarlar gərək İranla bağlı səslərini çıxaraydılar, çünki buna borcludurlar…”

"Qafqaz Müsəlmanları İdarəsinin sədri Allahşükür Paşazadə uzun illərdir ki fəaliyyət göstərir və onun fəaliyyəti həm xalq, həm də dövlət tərəfindən qiymətləndirilir. Lakin müəyyən məsələlərdə kiçik də olsa laqeydlik göstərmək bizim dindarlara uyğun gəlmir. Bu gün əgər dindən, qanundan, islami dəyərlərdən danışırıqsa və özünü islamı dəyərlərin əsas təbliğatçısı hesab edən İran bu prinsipləri pozursa, Azərbaycanda fəaliyyət göstərən dindarlar mövqe bildirməlidirlər. Çünki İranın bu gün tutduğu mövqe nə beynəlxalq normalara, nə də islami dəyərlərə uyğun gəlir".

Bunu Pravda.az-a açıqlamasında Milli Məclisin deputatı Tahir Rzayev deyib.

T.Rzayev bildirib ki, İran “Qurani-Kərimdə qeyd edilən ali dəyərləri qorumuş olsaydı, ötən 30 ildə Azərbaycanın yanında olmalıydı: "Nəzərə almaq lazımdır ki, İran Azərbaycanın həm din və məzhəb qardaşıdır, həm də qonşu dövlətdir, eyni zamanda 35 milyondan çox azərbaycanlı soydaşlarımız İranda yaşayır. Lakin İran bunların heç birini nəzərə almır. İranın hansısa əyalət mollası Azərbaycan haqqında kəskin fikirlər səsləndirir və bu, dövlət səviyyəsinə qaldırılırsa, deməli, bu, elə doğrudan da İranın dövlət siyasətidir. Sadəcə olaraq, biz bunu əyalət mollasının dilindən eşitdik. Yəni, İranın əməlində biz dostluq-qardaşlıq yox, düşmənçilik görürük. Həm ötən 30 ildə və müharibə zamanı, həm də postmüharibə dövründə İran Ermənistana müxtəlif yollarla kömək edir. Belə olan halda bizim dindarlar gərək öz səslərini çıxaraydılar, çünki buna borcludurlar. Onlar Azərbaycanda yaşayır və Azərbaycan torpağından qidalanırlar. Həmin dindarların əksəriyyəti İranda təhsil alıblar və orada çoxlu dostları, daim əlaqədə olduqları tanışları var. Müxtəlif yollarda və heç olmasa mətbuat vasitəsilə İrana öz sözlərini çatdırmalı idilər".

Deputat qeyd edib ki, bu məsələdə hər bir vətəndaş məsuliyyət daşıyır, hər kəs yerini bilməlidir: "Hər şeyi təkcə Şeyxülislam Allahşükür Paşazadədən gözləmək doğru deyil. O, din xadimidir, Qafqaz Müsəlmanları İdarəsinin sədridir. Bizdə belə bir adət var: nə vaxt vətəndaş öz vəzifəsini yerinə yetirə bilmir, nöqsana yol verirsə, dövlətin və ya müvafiq qurumun rəhbərinin üstünə düşür. Bu, düzgün mövqe deyil. Allahşükür Paşazadə müəyyən məsələlərə münasibət bildirmirsə, bizim çox sayda axund və din xadimlərimiz mövqelərini ortaya qoya bilərlər. Allahşükür Paşazadənin bir səsi var, amma axundlar, digər din xadimləri daha çox olduğu üçün, deməli, onların səsi də çoxdur. Biri var bir nəfər desin, bir də var bütün din xadimləri çağırış etsin. Misal üçün, axund və imamlar toplaşaraq bəyanat imzlalaya bilərlər. Tək bir nəfərdən hər şeyi gözləmək doğru yanaşma deyil".

Nəzrin Cavid

Tarix: 12 Oktyabr 2021, 11:58

Xəbər lenti