Deputat: “Erməni diversiya qruplarının təminatı Rusiya sülhməramlıların himayəsi altında həyata keçirilir”

"Rusiya sülhməramlıları həmin separatçı rejimi torpaqlarımızdan çıxarmaq istəmirsə, kənara çəkilsin və işimizə qarışmasın. Ərazilərimizi separatçılardan və qeyri-qanuni silahlı birləşmələrdən təmizləmək bizim borcumuz və hüququmuzdur. Buna görə hərbi gücümüzdən istifadə edib anti-terror əməliyyatları həyata keçirə bilərik. Həmin qruplar ərazilərimizdə sərbəst hərəkət etdikcə, belə terror aktları davamlı və qorxulu hal ala bilər. Digər tərəfdən isə, Ermənistan heç vaxt xoşluqla sülh sazişi imzalamayacaq".

Bunu Pravda.az-a açıqlamasında Milli Məclisin deputatı Elman Məmmədov deyib.

Deputat bildirib ki, Ermənistan dövləti və xalqı xoşluqla söz qanan millət deyil, ona görə də onların başı üstündə hər zaman dəmir yumruq olmalıdır: "Hamıya məlumdur ki, işğaldan azad edilmiş ərazilərin bir hissəsində 1991-ci ilin payızından mövcud olan separatçı-cinayətkar rejim hələ də fəaliyyət göstərir. Separatçı rejim öz mövcudluğunu Azərbaycan ərazisində saxlamaqdadır. Həmin qeyri-qanuni quruma məxsus cinayətkar dəstələr, diversiya qrupları da Azərbaycan torpaqlarında mövcuddur. Bu terrorçuların mövcudluğu ilə yaxından tanış olanlardan ən birincisi Qarabağda müvəqqəti yerləşdirilən Rusiyanın sülhməramlı kontingentidir. Rus sülhməramlıları terrorçuların sayını, təminatını, silah-sursat ehtiyatını çox yaxşı bilirlər, çünki onlarla əməkdaşlıq edirlər. Diversiya qrupunun bütün təminatı sülhməramlıların himayəsi altında həyata keçirilir. Üç dövlət rəhbəri tərəfindən imzalanmış 2020-ci il 10 noyabr və 2021-ci 11 yanvar tarixli sənədlərdə birmənalı olaraq göstərilir ki, qeyri-qanuni qurum və seperatçı birləşmələr Azərbaycan ərazisindən çıxarılmalıdır. Bu öhdəliyi isə öz üzərinə vasitəçi kimi çıxış edən Rusiya dövləti götürüb. Yəni, bu məsuliyyət Rusiya sülhməramlılarının boynuna düşür. Onlar bizim ərazilərimizdə yerləşdikləri gündən ən əsas bunun üçün çalışmalı idilər. Həmin sənədlərin 1 ilinin tamam olmasına sayılı günlər qalıb, lakin ötən müddət ərzində sülhməramlılar həmin qüvvələri ərazilərimizdən qovmaq əvəzinə, onların təminatı və mövcudluğu üçün canla-başla çalışıblar. Onlara himayədarlıq edir və Azərbaycan ərazilərində sərbəst hərəkət etmələrinə şərait yaradırlar. Belə olan halda, diversiya qrupları qudurğanlıq edir, yenidən dirçəlir və bizim mülki şəxslərə, eyni zamanda hərbçilərimizə qarşı vaxtaşırı təxribatlar törədirlər. Ötən gün hərbçi şəhid oldu, ondan əvvəl isə Suqovuşandan Kəlbəcərə gedən maşın karvanını atəşə tutdular və s. Hələ bundan sonrası üçün necə təxribat planları qurduqları bəlli deyil, hər şey gözləmək olar, çünki azğınlaşmış, cinayətkar qruplardırlar. İstənilən halda, Ermənistanı sülh müqaviləsi imzalamaq üçün məcbur etmək lazımdır və şükürlər olsun ki, Ermənistana bu təsiri göstərmək üçün Azərbaycanın əlində bir sıra imkanlar var. Bunlardan bir neçəsini işə salmaq kifayətdir ki, Ermənistan sülh müqaviləsi imzalasın və murdar niyyətlərindən əl çəksin".

Nəzrin Cavid

Tarix: 15 Oktyabr 2021, 11:03

Xəbər lenti