BURADA REKLAMINIZ OLA
BİLƏR

BURADA REKLAMINIZ OLA
BİLƏR

Deputatların da maaşı artırılır? – “Bütün kateqoriyadan olanların əmək haqqlarının artırılmasının tərəfdarıyam”

"Növbəti ildən etibarən deputatların əmək haqqılarının artırılması barədə dəqiq məlumat yoxdur. Əlbəttə ki, müəyyən kateqoriyadan olan vətəndaşların əmək haqqları artırılırsa, deputatlarınkı da artırıla bilər. Bəzilərində elə təsəvvür yaranıb ki, guya Milli Məclisin deputatları həddindən çox yüksək maaş alırlar. Belə deyil, kifayət qədər fakt var, yəni, deputatların maaşı bəllidir. Bir sıra dövlət qulluqçuları, misal üçün Milli Məclisin Aparatında işləyən əməkdaşlar, şöbə müdirləri, hüquq mühafizə orqanlarının işçiləri, digər sahələrdə fəaliyyət göstərən müəyyən dövlət qulluqçularının hər biri deputatlarla müqayisədə daha yüksək maaş alırlar".

 

Bunu Pravda.az-a açıqlamasında Milli Məclisin deputatı Tahir Rzayev deyib.

 

Parlament üzvü bildirib ki, Azərbaycanda sosial layihələrin icrası istiqamətində mühüm işlər həyata keçirilir: "Vətəndaşların sosial rifahının qorunması üçün belə layihələrin icrası olduqca vacibdir. Regionların sosial-iqtisadi inkişafı ilə bağlı görülən tədbirlər bilavasitə həmin regionlarda yaşayan əhalinin sosial vəziyyətinin yaxşılaşdırılmasına xidmət edirsə, digər bir sıra sosial ödənişlər də xüsusilə həssas əhali qrupuna aid olanların daha yaxşı yaşayışının təmin edilməsinə xidmət edir. Prezident İlham Əliyevin oktyabrın 16-da imzaladığı "Əhalinin sosial rifahının qorunması sahəsində əlavə tədbirlər haqqında" Sərəncamı ilə növbəti ildən etibarən 1 milyon 800 min nəfərdən çox vətəndaşın sosial ödənişlərinin həcmi artırılacaq . Mən bir vətəndaş kimi bütün kateqoriyadan olanların əmək haqqlarının artırılmasının tərəfdarıyam. Əgər dövlət büdcəsində kifayət qədər vəsait varsa, əmək haqqları artırılmalıdır. Digər tərəfdən, ölkə iqtisadiyyatı güclənir və ixrac potensialımız artırsa, deməli gəlirlərimiz də çoxalır. Sözsüz ki, bu gəlirlər də bilavasitə vətəndaşların sosial rifah halının yaxşılaşdırılmasına yönləndirilməlidir".

 

T.Rzayev qeyd edib ki, deputatlarının əmək haqqlarının artırılması məsələsi həmişə sensasiyaya səbəb olub: Dövlət hamı üçündür: fəhləsi, müəllimi, jurnalisti, deputatı və ya dövlət qulluqçusu fərq etmir. Vətəndaşların sosial vəziyyətinin yaxşılaşdırılması bu gün dövlət başçısının siyasətinin prioritetlərindəndir. Elektrik enerjisi, təbii qazın, bəzi hallarda yanacağın qiymətinin qaldırılması dünya standartlarına uyğunlaşdırılır. Bunun fonunda əmək haqqlarının artırılması çətinliyi aradan qaldırır. Həmin sahələrdə tətbiq edilən 2-3 faiz artımın əvəzində Prezident İlham Əliyev sosial ödənişləri 20-30 faiz artırır. Əmək haqqlarının, pensiya və təqaüdlərin artırılması həmin boşluğu doldurur. Xidmət sahəsində müəyyən artım baş verən kimi ajiotaj yaratmaq lazım deyil. Nəzərə almaq lazımdır ki, ötən müddət ərzində Prezident sosial ödənişlərin artırılması, həssas qruplara müəyyən imtiyazların verilməsi barədə dəfələrlə sərəncam imzalayıb".

 

Nəzrin Cavid

Tarix: 20 Oktyabr 2021, 14:09   
-->
Xəbər lenti
Çox oxunanlar

Ən son xəbərləri səhifəmizdən də izləyin