PA-nın şöbə müdiri ilə görüşlərdə iştirak edən partiya sədrindən Müsavata cavab: “Sizi də eyni tale gözləyir”

“Müsavat Partiyasının Mərkəzi İcra Aparatının rəhbəri Gülağa Aslanlının iqtidar-müxalifət dialoqu ilə bağlı səsləndirdiyi fikirlərlə tanış oldum. Qeyd etməliyəm ki, “boğazdan yuxarı” səslənən bu fikirlər həm primitiv, həm də yalanla doludur. O, özü-özünü təkzib edir. Gülağa Aslanlı bildirib ki, “Siyasi partiyaların toplaşdığı hansısa tədbir nə vaxtdan dialoq hesab edilib?! Ölkədə heç bir dialoq keçirilmir. Müsavat Partiyası bu oyunda iştirak etmək istəmir. Ölkə rəhbərinin dediyini deyəcək, onun fikirlərinə imza atacaq partiyaların harası müxalifət oldu?! Müsavat partiyası bu cür məsələləri müzakirə mövzusu hesab etmir və ona görə də, dialoqa getmir!”

Bir müddət əvvəl, Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev Müsavat Partiyasının başqanı Arif Hacılı ilə görüşüb. O zaman bu nədir? Həyata keçirilən dialoqa təmsil olunduğunuz partiya qatılmırdı… Bu görüşləri gizlətməklə nəyə nail olmaq istəyirsiniz? Cavab verin, dialoq yoxdursa, Arif Hacılı bu görüşə hansı adla, statusda qatılıb? Ümumiyyətlə, görünən budur ki, Müsavat rəhbərliyi “dialoq” sözünün tərifindən məlumatsızdır. Öyrənmək, maariflənmək üçün heç zamam gec deyil...”.

Pravda.az-ın xəbərinə görə, bunu Gələcək Azərbaycan Partiyasının sədri Ağasif Şakiroğlu bildirib.

A.Şakiroğlu qeyd edib ki, iqtidar-müxalifət dialoqunda iştirak edən partiyalarının hər biri ölkə rəhbərliyinin dediyinə deyil, Qarabağ mövzusunda iqtidarla birgə olduğuna və müharibə dövründə orduyaa, dövlətə dəstək xarakterli bir sıra bəyanatlara imza atıb: “Ola bilər, sizin gözünüzü iqtidar hərisliyi tutduğundan dövlətə, xalqa və ölkəmizin ərazi bütövlüyünü təmin edən şanlı orduya dəstək vermək qəbahətdir, amma sizdən fərqli olaraq bizim üçün şərəfdir! Bəli, aparılan iqtidar-müxalifət dialoqunda iştirak edən partiya olaraq Prezident İlham Əliyevin Qarabağla bağlı apardığı uğurlu siyasətə, döyüş meydanında göstərdiyi prinsipial mövqeyə dəstək olmuşuq. Prezident İlham Əliyevin hərb meydanında qətiyyətli və kifayət qədər də məsuliyyətli qərarlarına öz dəstəyimizi ifadə etmişik, iqtidarla 44 günlük vətən müharibəsi zamanı həmrəy olmuşuq, “Təki vətən torpaqlarımız azad edilsin” prinsipindən məsələyə baxmışıq. Vətən torpaqlarımız olan - Qubadlının, Füzulinin, Ağdamın, Laçının, Cəbrayılın, Kəlbəcərin, Zəngilanın, Hadrutun və Şuşanın işğaldan azad edilməsi Sizin üçün, görünür, qürurverici, sevindirici deyil. Torpaqlarımızın işğaldan azad edilməsi sizi üzür… Hikkəniz və potensialınıza uyğun olmayan eqonuz sevinmək, xalqın, dövlətin yanında durmağa mane olursa, burada vətənini, millətini və dövlətini sevənlərin təqsiri nədir?! Anlayıram, hikkənizi başa düşürəm. Amma əbəsdir! Ömrünü siyasi alverə həsr edənlər, nəhayət dərk etməlisiniz ki, sizin alver etdiyiniz dövrlər Əli Həsənovlarla, Ramiz Mehdiyevlərlə tarixin zibilliyinə atıldı! Vətən, dövlət və torpaq müzakirə mövzusu olduğu halda, yenə siyasi alverçi xislətini saxlamaq istəyiniz, əmin olun, sizin siyasi bitişiniz olacaq. Sahibləriniz tarixin zibilliyinə qərq olduğu kimi, sizi də eyni tale gözləyir”.

Tarix: 30 Oktyabr 2021, 17:37

Xəbər lenti