“Münaqişənin başa çatması diplomatik müstəvidə mübarizənin bitməsi anlamına gəlmir, savaş davam edir” - RƏY

"Müzəffər Ali Baş Komandanın rəhbərliyi altında Vətən müharibəsindəki qələbəmizdən ötən bir il bizə nümayiş etdirməkdədir ki, məğlub olan yalnız erməni faşizmi deyil, bütövlükdə sülh və sabitliyə təhdid yaradan, əməkdaşlıq və inkişaf perspektivlərinə manə olan mühit darmadağın edilib. Bu mənada, zəfərimizin həm milli, həm də qlobal məzmunlu nəticəyə səbəb olduğu bütün müstəvilərdə qəbul edilir. Milli səviyyədə ərazi bütövlüyümüzü bərpa etdik, əsrlərdir, davam edən erməni zülmünün, şəhid edilən soydaşlarımızın qisasını aldıq".

Bunu Pravda.az-a açıqlamasında Milli Məclisin deputatı Bəhruz Məhərrəmov deyib.

Deputat bildirib ki, qlobal miqyasda isə Azərbaycan BMT Təhlükəsizlik Şurasının, BMT Baş Assambleyasının qətnamələri başda olmaqla, onlarla beynəlxalq təsisatın qəbul etdiyi rəsmi sənədlərin icrasını təmin edib: "Habelə, insan hüquqlarının dövlətdaxili məsələ olmadığını nəzərə alsaq, işğala son qoymaqla bir milyondan artıq məcburi köçkünün təməl hüquqlarının bərpa edilməsi qlobal hadisə hesab edilməlidir. Eləcə də Azərbaycan son yarım əsrdə Haaqa və Cenevrə hüquqlarının tələblərini tam nəzərə alınmaqla, ələlxüsus da mülki insanlara və əsirlərə münasibətdə prinsiplərə sadiq qalmaqla, müharibə aparan dövlət olmaqla Beynəlxalq Humanitar Hüququn adına yeni səhifə açdı. Bundan başqa, separatizm və separatçıların dəstəkçiləri üzərində köklü qələbə çalmaqla Azərbaycan bölgədə separatizmdən əziyyət çəkən dövlətlər üçün bir nümunəyə çevrildi. Həmçinin, Azərbaycan işğalçı Ermənistan ordusunu darmadağı etməklə, işğalçının hərbi potensialının 80%-ni yararsız hala salmaqla bölgəni uzun müddətə təcavüzkar meyllərin təhdidindən sığortaladı və bununla da cənab İlham Əliyev faktiki olaraq Cənubi Qafqazın taleyində müsbət mənada ciddi dəyişiklikər başlatdı. Zəfərimizin nəticələri isə müharibənin yekunlaşması ilə məhdudlaşmadı, əksinə, qələbəmizin əsas məzmunu müharibədən sonra daha aydın meydana çıxmağa başladı. SSRİ dağıldıqdan sonra Cənubi Qafqazda ilk dəfə olaraq məhz Azərbaycanın Zəfərinin nəticəsi olaraq tam mənada kommunikasiyaların açılması prosesinə başlanıldı. Artıq Azərbaycan və Ermənistan qarşılıqlı olaraq hava məkanlarından mülki məqsədlərlə istifadəyə icazə verib. Azərbaycan prezidentinin şəxsi təşəbbüsü və birbaşa qətiyyəti ilə Zəngəzur dəhlizi reallaşmaqdadır ki, bu da özlüyündə Şərq-Qərb tranzit imkanlarının genişlənməsi fonunda Azərbaycanın haba çevrilməsi, həm də Türk dünyasının birliyi adına müstəsna bir addımdır. Əlbəttə, münaqişənin başa çatması hələ informasiya savaşının və diplomatik müstəvidə mübarizənin bitməsi anlamına gəlmir. Bu cəbhələrdə savaş davam edir və Zəngəzur dəhlizi başda olmaqla, Azərbaycanın beynəlxalq hüquqa əsaslanan çoxsaylı tələblərinin reallaşması tendensiyası üstünlüyün Ermənistan rəsmilərinin özlərinin də etiraf etdiyi kimi açıq-aşkar bizim tərəfimizdə olduğunu göstərir".

Nəzrin Cavid

Tarix: 1 Noyabr 2021, 14:16

Xəbər lenti