“Prezident İlham Əliyev çıxışlarında mesaj verir ki, dünyanı yalnız sülh və qarşılıqlı əməkdaşlıq xilas edə bilər” - RƏY

"Zəfər Günündə Ali Baş Komandan, Prezident İlham Əliyevin nitqinin məğzi onun bəşəri ideyalarından xəbər verir. Ölkə rəhbəri Azərbaycanın qələbəsini qeyd etməklə yanaşı, bütün dünyaya mesaj verir ki, dünyanı yalnız sülh və qarşılıqlı əməkdaşlıq xilas edə bilər. Ali Baş Komandan Zəfər Günündəki çıxışında hər kəsi sülh və əmin-amanlığı, sərhədlərimizi qorumağa, iqtisadiyyatı gücləndirməyə və insanların xoşbəxtliyi üçün lazım olan bütün tədbirləri həyata keçirməyə çağırıb".

Bunu Pravda.az-a açıqlamasında Milli Məclisin deputatı Tahir Rzayev Prezident, Ali Baş Komandan İlham Əliyevin Zəfər Günü ilə bağlı hərbçilər qarşısında çıxışı ilə bağlı danışarkən deyib.

Parlament üzvü bildirib ki, Prezident İlham Əliyev azadlığımız, dünyada sülh və əmin-amanlığın qorunması uğrunda cəfakeş və liderdir: "Bütün dünya bunun fərqindədir. Bizim Vətən müharibəsindəki qələbəmiz də bunu sübut etdi ki, Prezident İlham Əliyev uzun illər boyu münaqişəni sülh yolu ilə həll etməyə çalışsa da, bu, mümkün olmadı. Məhz buna görə Azərbaycan hərbi yola əl atdı və tarixi Zəfər çaldı. Lakin indi də Azərbaycan dövləti dayanıqlı və davamlı sülhün tərəfdarıdır. Prezident çıxışı zamanı Ermənistana mesaj verdi ki, biz bəyanatdan irəli gələn məsələləri həll etməklə hər iki dövlətin inkişafına zəmin yarada bilərik. Prezident İlham Əliyev, həmçinin qeyd etdi ki, Ermənistan daxilində Azərbaycana qarşı rəvanşit meyillər gücləndiyi halda "dəmir yumruq" yerindədir. Odur ki, bütün deyilənlərə əməl edilməlidir".

T.Rzayev vurğulayıb ki, Azərbaycan xalqı uzun illər zəfər həsrəti ilə yaşayıb: "Ona görə də bu tarixi gün bizi çox sevindirir. İllər boyu çəkdiyimiz ağrı, acının fonunda bu gün qələbə sevincini yaşamaq, müxtəlif bayram tədbirləri təşkil etmək, Azərbaycan və dost ölkələrin bayraqlarının küçələrdə nümayiş etdirilmək bizə ruh və inam verir. Azərbaycan bundan sonra da dünyada demokratik və daim inkişaf edən dövlət kimi tanınacaq, ölkə rəhbəri müəyyən layihələri uğurla həyata keçirəcək. İsgaldan azad edilmiş ərazilərdə yenidənqurma və bərpa işləri reallaşdırılacaq və dövlət başçısının da dediyi kimi, həmin torpaqlar cənnətə çevriləcək. Bizim də istəyimiz bu məsələlərin həlli istiqamətində Ölkə Başçısına dəstək vermək, Prezidentin sülh siyasətinə əməli işlərimizlə köməklik göstərə bilməkdir. Bir vətəndaş olaraq Azərbaycanın inkişafı üçün əlimizdən gələni əsirgəməməliyik. Yeri gəlmişkən, Azərbaycan xalqının, o cümlədən dünya azərbaycanlılarının Zəfər bayramını ürəkdən təbrik edirəm".

Nəzrin Cavid

Tarix: 8 Noyabr 2021, 14:48

Xəbər lenti