Üçtərəfli bəyanatın imzalanmasından 1 il ötür: “Ermənistan kapitulyasiya aktına imza atdı, bu, ümumxalq birliyinin təntənəsidir”

44 günlük Vətən müharibəsində Azərbaycan tam qələbə qazandı və bunun məntiqi nəticəsi kimi qələbəni rəsmiləşdirən 10 noyabr bəyanatı imzalandı. Bu, Ermənistanın kapitulyasiyası deməkdir. Üçtərəfli bəyanat uzun illər davam edən münaqişəyə son qoydu və bəyanata uyğun olaraq, münaqişənin hərbi mərhələsi başa çatdı, Ağdam, Laçın və Kəlbəcər rayonları qan tökülmədən Azərbaycana qaytarıldı.

Bunu Pravda.az-a açıqlamasında Milli Məclisin deputatı Cavid Osmanov 2020-ci ilin noyabrın 10-da imzalanan üçtərəfli bəyanatının əhəmiyyəti barədə danışarkən deyib.

Deputat qeyd edib ki, üçtərəfli bəyanatın imzalanması ümumxalq birliyinin təntənəsidir: “Bütün dünya gördü ki, Azərbaycan xalqı “dəmir yumruq” kimi birləşib və həmin birlik müzəffər Ali Baş Komandan İlham Əliyevin ətrafında nümayiş olunur. Hər bir azərbaycanlı cəbhədən gələn xəbərləri televiziya, radio və internet vasitəsilə həyəcanla izləyir və gələn şad xəbərlərə sevinirdilər. Ölkəmizdə yaşayan bütün millətlərin və dini konvensiyaların nümayəndələri cəsarətli şəkildə düşmənlə vuruşaraq Azərbaycanın ərazi bütövlüyünü bərpa etdilər. Həmrəylik bizim ən böyük sərvətimiz və dəyərimizdir. Məhz bu səbəbdən əminliklə demək olar ki, xalq-iqtidar birliyi qələbəmizin ideoloji təməlidir. Bundan başqa, üçtərəfli bəyanat status-kvonu da dəyişmiş oldu. Azərbaycan ordusunun Zəfər yürüşü nəticəsində imzalanan bu sənəd Azərbaycanın maraqlarına tam uyğundur. Müzəffər Ali Baş Komandan, Prezident İlham Əliyevin israrlı mövqeyi nəticəsində məğlub və çıxılmaz vəziyyətə düşən Ermənistan rəhbərliyi işğal edilmiş torpaqlardan qeyd-şərtsiz çıxmaq üçün qrafik təqdim etməyə məcbur oldu. Nəhayət, Qarabağa heç bir status verilmədi və hazırda "Dağlıq Qarabağ" adlı ərazi vahidi yoxdur. Döyüş meydanında qazanılmış qələbələr siyasi müstəvidə də qələbənin qazanılmasını şərtləndirən amildir. Üçtərəfli bəyanatın birinci maddəsində qeyd olunan "tərəflərin hazırda tutduqları mövqedə qalması" bəndi Azərbaycanın birbaşa xeyrinədir. Çünki Ermənistan Vətən müharibəsində hansısa uğur əldə edə bilməyib. Bəyanat Azərbaycan ordusunun şərtsiz hərbi üstünlüyünü təsdiq edir. Hazırda bütün dünya Vətən müharibəsində əməliyyatların hazırlanması və icra edilməsi imkanlarını öyrənir. Müharibə dövründə də dünya ölkələri 44 günlük hərbi əməliyyatları yaxından izləyirdilər".

C.Osmanov, həmçinin qeyd edib ki, Azərbaycanın yanında qardaşlıq nümunəsi göstərən Türkiyənin qəti mövqeyi də Zəfər qazanmağımızda çox böyük rol oynayıb: "Azərbaycan-Türkiyə qardaşlığı ayrı-ayrı qüvvələrin münaqişəyə müdaxilə etmək cəhdlərini tamamilə alt-üst etdi. Həmçinin Türkiyənin ölkəmizə dəstək və həmrəylik nümayiş etdirməsi Azərbaycan xalqını qələbəyə ruhlandırırdı. Daha sonrakı mərhələdə, bu ilin iyunun 15-də iki ölkə arasında imzalanan müttəfiqlik münasibətləri haqqında Şuşa bəyənnaməsi isə Azərbaycan və Türkiyə qardaşlıq əlaqələrini ən yüksək səviyyəyə qaldırdı. Heç şübhəsiz ki, İkinci Qarabağ müharibəsi Azərbaycanın şanlı qələbəsi kimi tarixdə əbədi qalacaq. Azərbaycanın tarixi qələbəsi ötən illər ərzində hazırlanan "Böyük Ermənistan" planını tamamilə fiaskoya uğradıb. Daha "Dağlıq Qarabağ" statusu məsələsi arxivə qovuşub, belə termin artıq yoxdur. Ötən 30 ildə Ermənistan danışıqlar prosesi zamanı nail olmaq istədiyi heç bir şeyə çata bilməyib. Azərbaycan ordusu "Böyük Ermənistan" mifini darmadağın edib, məğlubedilməz erməni ordusu mifi isə yerlə yeksan olub. Bu qələbə Azərbaycan haqqında məğlub xalq sindromunu sındırıb. İndi xalqımızın qalib xalq, ordumuz qalib ordu, dövlətimiz də qalib dövlətdir. Zəfər, həmçinin xalqın inamını da özünə qaytarıb. Birmənalı olaraq qeyd etmək olar ki, bütün dünya Azərbaycan xalqının məğlubiyyətlə heç zaman barışmaq niyyətində olmadığının şahidi olub. Prezident, müzəffər Ali Baş Komandan bütün mənalarda Azərbaycan xalqının milli maraqlarına söykənən siyasət yürüdür. Nəhayət, son 17 ildə həyata keçirilən tədbirlər, güclü dövlət və güclü ordu strategiyası torpaqlarımızın işğaldan azad edilməsinin başlıca səbəbidir".

Nəzrin Cavid

Tarix: 9 Noyabr 2021, 14:04

Xəbər lenti